Lukas 18:14-42

¹⁴Jesus a apasa, “Üpwe ürenikemi, ei chon ioni takises a küna pwüng fän mesen Kot lupwen a liwinla lon imwan, nge sap ewe Farisi. Pun iö a püsin atekiatä epwe küna tekison, nge iö a püsin atekisonatiu epwe küna tekia.”

¹⁵Iwe, ekoch aramas ra uwato nöür kükün semirit ren Jesus, pwe epwe afeiöchüür. Nge lupwen ekewe chon kaiö ra küneer, ra apwüngü ekewe aramas.

¹⁶Nge Jesus a körato ekewe semirit ren o a apasa, “Oupwe mwüt ngeni ekewe semirit pwe repwe feito rei, nge ousap epetiir, pun iö a wewe ngeni ekei semirit epwe mwüni Mwün Kot.

¹⁷Enlet, üpwe ürenikemi, are eman esap etiwa Mwün Kot usun eman semirit, esap tongeni tolong lon.”

¹⁸Iwe, eman sounemenem a aisini Jesus, “Sense mi mürina, met ngang üpwe föri ai üpwe eäni manau esemüch?”

¹⁹Jesus a üreni, “Pwota ka aita ngeniei mürina? Esap wor eman a mürina pwe Kot echök.

²⁰Ka silei ekewe allük: ‘Kosap lisowu, kosap niela aramas, kosap solä, kosap eäni kapas chofona usun eman, kopwe asamolu semom me inom.’”

²¹Iwe, ewe mwän a pölüeni, “Ekei allük meinisin üa fen apwönüretä seni leküküni.”

²²Lupwen Jesus a rong ekei kapas, a üreni, “Mi chüen wor eu mettoch ka mang ngeni. Kopwe amömöla meinisin mine ka eäni, nge ewe moni kopwe fangala ngeni ekewe chon wöüngau, pwe epwe wor woumw lon läng. Mürin kopwe feito o tapweto müri.”

²³Nge lupwen ewe mwän a rong ekei kapas, a fokun letipeta, pun a fokun pisekisek.

²⁴Iwe, lupwen Jesus a küna pwe a letipeta, a apasa, “A men fokun weires ngeni ekewe aramas mi pisekisek ar repwe tolong lon Mwün Kot.

²⁵Enlet, a mecheres än eman kamel epwe tolong lon pwangen efoch tikek, lap seni än eman chon pisekisek epwe tolong lon Mwün Kot.”

²⁶Iwe, ekewe aramas mi rong ekei kapas ra aisini, “Nge iö chök epwe tongeni küna manau?”

²⁷Jesus a pölüeni, “Mine esap tufich ngeni aramas a tufich ngeni Kot.”

²⁸Mürin Petrus a üreni Jesus, “Nengeni, äm aia likitala meinisin mine aia eäni o tapwela mürum.”

²⁹Jesus a pölüeniir, “Enlet, üpwe ürenikemi, are eman a likitala imwan are pwülüan, are pwiin, are saman me inan, are nöün kana fän iten ewe Mwün Kot,

³⁰ewe aramas epwe angei liwinin mi fokun watte lon ei fansoun, epwe pwal angei manau esemuch lon ewe fansoun epwe feito.”

³¹Mürin Jesus a aimwüela ekewe engol me ruoman chon kaiö o üreniir, “Oupwe rongorong! Oukich sipwe feitä Jerusalem. Ikenan mettoch meinisin mi makketiu me ren ekewe soufos usun Nöün Aramas epwe pwönüetä.

³²Epwe tolong lepöün ekewe chon lükün Israel, repwe urumwotei, repwe turunufasei o atufa.

³³Repwe pwal wichi o niela, nge mürin ülüngat rän epwe manausefälitä.”

³⁴Nge ekewe chon kaiö resap weweiti ekewe mettoch, pun ekewe kapas a monomon seniir, resap pwal silei wewen met Jesus a kapas usun.

³⁵Iwe, lupwen Jesus a arap ngeni Jeriko, eman mwän mi chun a mot lepekin al o tütüngor lifangan.

³⁶Lupwen a rongorong pwe chomong aramas ra fetalela won ewe al, a aisiniir, “Met a fis?”

³⁷Iwe, ra üreni, “Jesus seni Nasaret a feito.”

³⁸Mürin ewe mi mesechun a kökkö fän leüömong, “Jesus, Nöün Tafit, kopwe tongeei!”

³⁹Iwe, ekewe aramas mi nom mwan ra apwüngü o üreni pwe epwe fanafanala. Nge i a chök alapata leüan o kökkö, “Nöün Tafit, kopwe tongeei.”

⁴⁰Iei mine Jesus a üla o apasa pwe repwe emwenato ren ewe mi mesechun. Iwe, lupwen a kaneto, Jesus a aisini,

⁴¹“Met ka mochen üpwe föri ngonuk?” A pölüeni, “Ai samol, üa mochen küna mwei.”

⁴²Iwe, Jesus a üreni, “Kopwe küna mwomw, om lükülük a apöchökülok.”