Luke 18:14-42

¹⁴Jedus tell de people say, “Wen dat man gone back home, God done fagib um fa de ebil e done, an e stan right wid God. Bot God ain paadon de Pharisee. Cause dem wa pit deysef op, God gwine bring um down. Bot dem wa tek low, God gwine raise um op mo den all.”

¹⁵Some people beena bring dey baby ta Jedus fa hab um pit e han pon dey head an bless um. Wen Jedus ciple dem shim, dey buke dem people fa do dat.

¹⁶Bot Jedus call de chullun. E tell e ciple dem say, “Oona mus dohn stop de chullun. Leh um come ta me. Cause de people wa like dese chullun yah gwine hab God rule oba um.

¹⁷A da tell oona fa true, de poson wa ain gree like a leeleetle chile fa leh God rule oba um, dat poson ain neba gwine hab God fa e King.”

¹⁸One Jew leada come aks Jedus say, “Good Teacha, wa A mus do fa git ebalastin life?”

¹⁹Jedus ansa um say, “Hoccome ya da say A good? Ain nobody good cep fa God.

²⁰Ya know wa God Law chaage we fa do. ‘Mus dohn sleep wid oda man wife. Mus dohn kill nobody. Mus dohn tief. Mus dohn tell lie pon nobody. Mus pay mind ta ya fada an ya modda.’ ”

²¹De leada tell Jedus say, “A done keep all dem law fom wen A been a boy.”

²²Wen Jedus yeh wa de leada say, e tell um, “Stillyet ya mus do one mo ting. Mus go sell ebryting ya got an gii de money ta de people wa ain got nottin. Ef ya do dat, ya gwine hab tredja een heaben. Atta ya done gii way ya money, come folla me.”

²³Wen dat leada yeh wa Jedus say, e been sad, cause e been too rich.

²⁴Jedus see de man been too sad an e say, “Fa true e ain easy eben a leetle bit fa rich people fa leh God rule oba um.

²⁵E mo easy fa mek de camel go shru a needle eye den fa a rich man fa come onda God rule.”

²⁶De people wa yeh wa Jedus say, aks um, “Den who dat kin git sabe?”

²⁷Jedus ansa say, “God able fa do wa people ain able fa do.”

²⁸Den Peter say, “Look yah! We done lef ebryting fa folla ya.”

²⁹Jedus say, “A da tell oona fa true, ebrybody wa lef e house, or e wife, or e broda dem, or e modda or e fada, or e chullun so dat e kin leh God rule oba um, dat one gwine git plenty mo fom God.

³⁰Een dis time yah, God gwine gim plenty mo den wa e done lef fa folla God. An God gwine gim ebalastin life een de wol dat gwine come.”

³¹Jedus tek de tweb ciple dem ta one side an tell um say, “Listen, we da gwine op ta Jerusalem. All de ting dem de prophet dem done write bout de Man wa Come fom God gwine happen fa true.

³²Dey gwine han um oba ta de people wa ain bleebe pon God. Dem people gwine shrow slam at um. Dey gwine hole um cheap an spit pon um.

³³Dey gwine whip um an den dey gwine kill um. Bot atta shree day, de Man wa Come fom God gwine git op fom mongst de dead an lib gin.”

³⁴Bot de ciple dem ain ondastan none ob dese ting. Dey ain know wa e mean. Dey ain know wa e beena taak bout.

³⁵Wen Jedus git close ta Jericho, a bline eye man been dey, da seddown side de road, an e beena beg.

³⁶Wen de bline man yeh de crowd da pass, e aks de people say, “Wa gwine on?”

³⁷Dey tell um, “Jedus fom Nazareth da pass long dis way.”

³⁸Wen de bline man yeh dat, e holla say, “Jedus, Son ob David, hab mussy pon me!”

³⁹De people wa beena lead de crowd buke de man, tell um e mus hush op e mout. Bot de man holla mo louda say, “Son ob David, hab mussy pon me!”

⁴⁰Jedus stop dey, an e chaage de people fa bring de bline man ta um. Wen e git close ta Jedus, Jedus aks um say,

⁴¹“Wa ya wahn me fa do fa ya?” De bline man ansa say, “Lawd, A wahn fa see gin.”

⁴²Jedus tell de man say, “A da mek ya see. Cause ya bleebe een me, ya done git well!”