Luk 18:14-42

¹⁴Dai maikka ngul sil ba ngen, i luqa i ai de qa ter ama takkis, dai ama Ngemumaqa qa mis ka ai ama seserl ka na qa. Dap luqa i ama Parasiqa na qa dai quasik. De ian mit aa saver ama luqup.” “Dai aip nemka i qa taarl ne aa rlenki dai laiv ama Ngemumaqa qe semagil ne aa rlenki. Dap nemka i qatikka qe semagil nanas, dai laiv ama Ngemumaqa qa raarl ne luqa aa rlenki veviit.”

¹⁵De iari ra men se araa uis sagel ma Iesus. I re narliip ke ru aa ngerik per a ra de qe raring bareq a ra. Dav aa risura ra lu liina de ama qurek per a ra ne ama qaqet de ngen ama arluis, de rem nem ta.

¹⁶De ma Iesus ka nes te ama arluis ip ta ren sagelna na qa. De qa ruqun ma’, “Kula ngenel kel ta. Dap mager ip ta ren sagel ngua. Lura ama qaqet i ra tu araa qevep ip taquarl lura ama arluis dai mager ip ta ran sever ama luqupki i ama Ngemumaqa qe uas.

¹⁷I maikka ngua taqen ne gua revan sagel ngen. I ariq aip nemka i quasik ka tu aa qevep sever a ngua ip taquarl lura iara ama arluis dai diip kuasik mager ip ka iit masarevuk saver ama Ngemumaqa aa Luqupki.”

¹⁸De iaq i ama Barlka qa snanpet ne ma Iesus ma’, “Gua Tiksiqa, i ama atluqa na ngi. Diip ngu rekmet nanaa ip laip ngu raneng ama iames masmas?”

¹⁹De ma Iesus ka guirltik ba qa ma’, “Ngu lu nanaa be ngia tis ngua ai ama atluqa na ngua? Katikka ama Ngemumaqa naik dai ama atluqa.

²⁰Dap sa ngiat drlem se ama Ngemumaqa aa Lo i nget taqurliani ma’, “Kula ngi rling mer ama berlim. De qula ngi peleng ama qaqeraqa. De qula ngi suam. De qula ngi kaak. De mager ip ngi rarlik gi mamiam de ngi narli gelem iam.” Lo 20.12-16

²¹De luqa ama Barlka qa ruqun ma’, “Katikka lua i murl ama gilka na ngua be deng iara dai qatikka ngua tit kut lungera ama lengi mai.”

²²De ma Iesus ka narli lungera ama lengi, de qa ruqun ma’, “Dav as ngia man de iani. Ngia iit ip ngi nem gia quvang iirang ip te ama qelaing de ngi qurl lura i quasiq araa qerang. I arik taqurla dai diiv ama Ngemumaqa qe qurl a ngi re ama tekmeriirang i buup per aa luqupki. De ngia ren ip ngia tit naser a ngua.”

²³Dap ka narli liina de maikka ama merlenka ver a qa. De ama arlem ka never aa tekmeriirang i buup be qa mit i ama arlemigl na qa.

²⁴De ma Iesus ka lu qa i ama merlenka ver a qa, de qa ruqun ma’, “Lura i buup ne ama qelaing gelem ta de buup ne araa tekmeriirang, dai diiv ama alkuil-ba-ra ip ta ran saver ama Ngemumaqa aa luqupki.

²⁵Nanaa, kua mager iv ama karabauqa qa ran mer ama ngiliini men ama kaviit? Maikka quasik. I qatikka ama alkuil ba qa. Dai nemka i buup ne ama qelaing gelem ka i qe narliip kat dan sagel ama Ngemumaqa, dai maikka diiv ama alkuil ba qa malai.”

²⁶De ama qaqet ta narli liina de ra ruqun ma’, “Ariq aip taqurla, dai ani quasik mager iv a qek ke raneng ama iames masmas?”

²⁷De ma Iesus ka ruqun ma’, “Katikka ariq aiv iak i qa tit kur aa tekmeriirang dai diip kuasik maget na qa. Dav ama Ngemumaqa dai mager ip ke rekmet ne liirang aa i uut tu auur a qevep ai ama alkuil maden, i qa, dai mager ip ke qurl a ngen te ama iames masmas.

²⁸De ma Pita qa ruqun na qa ma’, “Ngi lu, sa uut mit naver auur a luqup de namen auur a tekmeriirang de uut tit naser a ngi.”

²⁹De ma Iesus ka ruqun na ra ma’, “Ngua taqen ne ama revan sagel ngen. I lura i ra mit naver araa luqup, de araa ngerlviq ama nankina, de ngen araa qelatpik, de ngen araa lavu, dap kuarl araa uis i raquarli ra tu araa qevep ai maikka mager iv ama qaqet ta ran iasai sagel ama Ngemumaqa qe uas.

³⁰Dai diip te raneng liirang aa i as maikka iirang malai daleng liirang aa i ra mit namene iirang. I diiv ama Ngemumaqa qe virliit ba ra vet lunger iara ama niirl. De diip nasat dai re raneng ama iames masmas.”

³¹De ma Iesus ka mer ama malepka ngen a iam na ra de qa ruqun na ra ma’, “Ngene narli, iara uut tit savet ma Jarusalem. Be ama lengi mai i murl ama Slurlka aa Aamki na ra, ra iil sever ama qaqet araa Rarlimka, dai diiv iara verlverleset met nget marevan.

³²De diip te quarl tem ka semet lura iara araa ngerik i quasiq ai ama Judaqena na ra. Be diip ta tuma se qa de re tekmet na qa mavik de re kuat per a qa.

³³De diip te urlistik per a qa de re veleng ka ip ke ngip. Dap diip luqa ama nirlaqa ip ma depguas dai saqiaskerlka diip ke raarlviit naver ama aapngipki.”

³⁴Dav ama risura dai quasik tat drlem lungera ama lengi. I ama rarlimini ve lungera angera rleng ama lengi dai qurli iini ve ama trleses, be quasik te taqa mu araa qevep sevet lungera ama lengi i qa meraqen na nget.

³⁵Baip kat den be sagelna ne ma Jeriko, dai aa gel iaq ama rlenka i qurli qa i qa mugun per ama aiska aa garli. De ai de qe snanpet ne ama qaqet ip terl kurl a qa re ama qelaing.

³⁶Dai qe narli sever ama buurlem ne ama qaqet i rat den. De qa snanpet ne iari ama qaqet ma’, “Te sana?”

³⁷De ra ruqun na qa ma’, “Ma Iesus i qa navet ma Nasaret dai qa iinamuk i qat den.”

³⁸Taqurla de qes nes ma’, “Iesus, Iesus. Katikka ngi navet ma Daivit aa liinka i diip ngi iames na uut nagel auur a qumespik. Dai maikka gia arlem naver a ngua.”

³⁹De lura ama qaqet i rat den i re ruirl dai re serlin a qa ma’, “Sung na ngi!” Dap katikka qa dai ai de qes nes maden taqurliani ma’, “Ngi navet ma Daivit aa liinka. Gia arlem naver a ngua.”

⁴⁰De ma Iesus ka men be qa maarl de qa ruqun na ra ma’, “Ngen den se qa sagel ngua.” Baip ka men sagelna, de ma Iesus ka snanpet na qa ma’,

⁴¹“Ngi narliip ngu sana na ngi?” De qa ruqun ma’, “Gua Barlka, saqiaskerlka ngu narliip ngum ngim.”

⁴²De ma Iesus ka ruqun na qa ma’, “Saqiaskerlka ngil vet ngia ves. I ngia tu gia qevep dai be saqiaskerlka maget na ngi.”