SAN LUCAS 18:14-42

¹⁴Te cáhán rī jiín ró jeē tēe stútú xúhun renta, ni jetáhú Yaā Dios de, te cuanuhun de vehe de. Te tēe fariseo chi tu ní jétáhú yá de. Chi ñayuu jeē sajéhnu i máá i, sa ndululí i. Te ñayuu jeē sálulí i máá i, sa ndujéhnu i. Achí yá.

¹⁵Te ni quecoo ñayuu jiín súchi lúlí núū Jesús, jeē na sóó yá ndaha ya xinī i. Te tēe cáscuáha un ní cajini de jeē súcuan cúu, te ni cacahān de nuū ñáyuu vējicoo jíín i.

¹⁶Te máá Jesús ni cana ya de, te ni cahān yā: Cuāha jnūhun na quíjicoo sūchi lúlí jíñā nuū rī, te ma cásɨ rō jeē quíjicoo i. Chi ñayuu jeē ndió cóo ni i cani ni i nájnūhun sūchi yáha, suu i quɨ́vɨ ndaha Yaā Dios jeē ndacu ya jniñu nuū i.

¹⁷Te jendaá cahán rī jiín ró, núu ɨɨn ñayuu tú cuatáhú i jeē ndácu Yaā Dios jniñu nuū i, nájnūhun jétáhú ɨɨn sūchi lúlí, ma quɨ́vɨ cuɨtɨ i ndaha ya, achí yá.

¹⁸Te ɨɨn tēe cújéhnu ni cajnūhún de ya: Tēe vāha cúu ní Maestro. ¿Te na jniñu váha sáha ná te nihīn tahú na cotecu na nɨ́ɨ́ cáni andɨvɨ́? Achí de.

¹⁹Te ni cahān Jesús jiín de: ¿Naun cáhán rō jeē tée vāha cúu ri? Tú ni ɨɨn tēe vāha íyó, chi máá ɨɨn‑ni Yaā Dios.

²⁰Je jíní rō tācá jniñu ní ndacu Yaā Dios: Ma cosɨ́quɨ́ ndéē jnáhan ró. Ma cáhni rō ndɨ̄yɨ. Ma sacuíhná ró. Ma sajnúhún ró. Cuatáhú ró nuū tatá rō nuū naná rō. Achí yá.

²¹Te ni cahān maá de: Tācá jniñu yáha je ni squícu ná ndé ná lulí ná, achí de.

²²Te Jesús ni jini ya jnūhun yáha, te ni cahān yā jiín de: Ɨɨn na jniñu cúmanī sáha ró núu súcuan. Xīcó ndɨhɨ jeē névāha ró, te cuāha ró núū ñáyuu ndahú. Te nde andɨvɨ́ cuāha ya jeē váha ndasɨ́ núū rō. Yūcuán na te quiji ró condiquīn rō ruhū, achí yá.

²³Te ná ni jini sōho de jnūhun yáha, te yōhyo ni cucuíhyá ni de, chi cúcá ndasɨ́ de.

²⁴Te jíto Jesús jeē súcuan cúcuíhyá ni de, te ni cahān yā: Tēe cúcá chi yōhyo yɨɨ́ quɨ́vɨcoo de ndaha Yaā Dios jeē ndacu ya jniñu nuū de.

²⁵Yachī gā yāha ɨɨn camello yaū yutɨ́cuɨ vēsú jeē quɨ́vɨ ɨɨn ñayuu cucá ndaha Yaā Dios jeē ndacu ya jniñu nuū i, áchí yá.

²⁶Te tēe ní cajini jnūhun yáha, ní cacahān de: ¿Ndé ñáyuu cúu jeē cácu núu súcuan? Achí de.

²⁷Te ni cahān yā jiín de: Ñayuu chi ma cúu squɨ́vɨ i máá i ndaha Yaā Dios, te máá yá chi cuu sáha ya, achí yá.

²⁸Yūcuán na te ni cahān Pedro: Sāña jíjnáhan ná ní castóo ná ndɨhɨ jeē cánevāha ná, te cándiquīn na níhín, áchí de.

²⁹Te máá yá ni cahān yā jiín de: Jendaá cahán rī jiín ró jijnáhan ró, núu na‑ni ñayuu stóo i vehe, chí tátá, chí ñani, chí ñasɨhɨ́, chí séhe, jeē sɨquɨ́ jeē scáca i jnūhun jeē ndácu Yaā Dios jniñu nuū ñáyuu,

³⁰núu súcuan te nanihīn cuehē gā i ini ñayɨ̄vɨ yáha, te tiempo quiji te cotecu i nɨ́ɨ́ cáni, áchí yá.

³¹Te ni cana sɨ́ɨn ya ndɨhúxí uū tēe cáscuáha jíín yá, te ni cahān yā jiín de: Vijna je cuángoo yó ñuu Jerusalén. Te yūcuan squícu ndɨhɨ jnūhun ndese ndoho ruhū, Yaā ní nduu tēe, nájnūhun ni catee tēe ni canacani jnūhun Yaā Dios nde jenahán.

³²Chi ñayuu nastúu i ruhū nuū tée nación Roma jeē cáyūcú Jerusalén cándacu jniñu. Te tēe un sácatā de nuū rī, te cahān neé de nuū rī, te tesɨ̄hɨ́ de nuū rī.

³³Te cani de ruhū, te sáá te cahni de ruhū. Te nuū uní quɨvɨ̄ te natecu rī. Achí yá.

³⁴Te máá de tu ní cájecūhun cuɨtɨ ni de tāca jnúhun yáha. Chi jnūhun yɨɨ́ cúu, te tu ní cúu jecūhun ni de jeē cahán yā.

³⁵Te ni cuyajni ya cuahān yā ñuu Jericó. Te ɨɨn tēe cuáá néne de yuhíchi, jícán de caridad.

³⁶Te ni jini sōho de jeē yáha cuehē ñayuu cuangoo i, te ni cajnūhún de naun cuángoo i.

³⁷Te ni cacahān i jíín de jeē Jesús, tēe ñuu Nazaret, yáha ya cuahān yā.

³⁸Yūcuán na te ni cana jee de: Jesús Sēhe yucūn David, cundáhú ni ni sáña, áchí de.

³⁹Te ñayuu cuangoo ichi núú yā, ni cacahān i nuū de jeē na cásɨ de yuhu de. Te máá de víhyá gā ni cana jee de: Máá ní jeē cúu ní Séhe yucūn David, cundáhú ni ni sáña víī, achí de.

⁴⁰Yūcuán na te ni jecuɨñɨ̄ Jesús, te ni cahān yā jeē na quíndeca i de. Te nuū ní cuyajni de nuū yā, te ni cajnūhun yá de:

⁴¹¿Na vé cuní rō jeē sáha ri jiín ró? achí yá. Te ni cahān de: Jeē na ndúndijin tɨnūu ná cuní na, áchí de.

⁴²Te ni cahān Jesús jiín de: Ndundijin tɨnūu ró núu súcuan. Ni candíje ró jeē cuu nasávāha ri rohó, te jeē yúcuan ní nduvāha ró, áchí yá.