SAN LUCAS 18:14-42

¹⁴Cälbenetla que jinda winic Dios u yäc'bi colac tu toja tu bixe tu yotot, y ni otroba mach une, uc'a upete machca chichca u chen uba fama cache' u chen tu toja u xe tä quisnäjescan y machca u chen uba de ajch'och'ocaba u xe tä äc'binte xic de untu ajnoja.

¹⁵De ya'i ajni machcatac u täsbijob aj Jesús bijch'oc tuba u yäq'ue' u c'äb tuyac'o u ch'u'ul chenob, pero jinq'uin u yajcänt'anob u chänijob ca' jini u q'uejpijob.

¹⁶Pero aj Jesús u joq'uijob ni bijch'oc bajca an y u yäli ca'da: ―Äctanla ticob ni bijch'oc bajca anon y mach a ch'acbenla u biji uc'a ca' jinijob machca u yochejob t'oc Dios tuba utic manda.

¹⁷Cälbenetla que si mach a sapäla u manda Dios ca' u sapän untu bijch'ocba mach uxet tä ochela t'oc Dios tuba u chenet mandala. Toj une ni cälbenetlaba.

¹⁸De ya'i untu ajnoja tuba aj judíosob u yälbi ca'da: ―Maestro, utz a c'ajalin ane. ¿Cua' une c'änä cä chen tuba paq'uin cuxlecon?

¹⁹Aj Jesús u yälbi ca'da: ―¿Cua' uc'a a wälbenon cache' utz cä c'ajalin? Niuntu mach'an utz u c'ajalin seq'uen Dios une.

²⁰A wi chich cua' u yäle' ni ley ta Dios: “Mach a cänäntan a tz'ijte'; mach a chen tzämsa; mach a chen xuch'; mach a sube' a lot t'oc jop'ojti'; olin a pap y a na'”.

²¹Une u yäli ca'da: ―Upete ni jindaba cä laj tz'oni desde jinq'uin ch'ocon toba ixta bada.

²²Jinq'uin u yubi aj Jesús ca' jiniba u yälbi ca'da: ―U colan to ump'e cosa a chen: chono upete lo que a cänäntan y laj pucben u taq'uini pobrejilba y a xe a cänäntan q'uen a matän tä cielo tä' choj u valorba, y la'ix bada tzäypätinon.

²³Jinq'uin u yubi ca' jini coli mäx triste uc'a tä' q'uen u taq'uin jini winic.

²⁴Jinq'uin aj Jesús u chäni cache' coli mäx triste u yäli ca'da: ―¡Mäx cach tuba ochic untu ajtaq'uini bajca u chen manda Dios!

²⁵Untu ajcamello más seb u nume tu jut untz'it putz' que ochic untu ajtaq'uini bajca u chen manda Dios.

²⁶Machcatac u yubijob jini que u yäli aj Jesús u yälijob ca'da: ―¿Caxca une u xe u ch'e' u japän uba jiq'uin?

²⁷Aj Jesús u yälbijob ca'da: ―Lo que mach u ch'ä u chenob winicobba, Dios u ch'e' u chen.

²⁸Aj Pedro u yälbi ca'da: ―Ubixto, no'on t'ocob acä waläcti upete lo que cä cänäntan t'ocob tuba cä tzäypätinet t'ocob.

²⁹De ya'i une u yälbijob ca'da: ―Totojtoj cälbenetla que machca u yäcti yotot o u pap y u na', o u jitz'inob y u säcunob, o jit'oc o u bijch'oc uc'a u manda Dios,

³⁰u xe tä äc'binte q'uen más bada tu pancabba de lo que u yäctiba, y jini q'uin que u xe tä c'oteba u xe tä äc'binte paq'uin cuxlec.

³¹De ya'i aj Jesús u ch'i ni docejob u yajcänt'anob y u yälbijob ca'da: ―Ubixtola, bada cä bixela tä Jerusalén. Ya'i upete lo que u tz'ibijob ajt'anob ta Dios que u xe u chenon pasa no'on que sutwänon de winicba, u xe tä pase toj ca' chich tz'ibintiba.

³²Uc'a cä xe tä äc'can tu c'äb ni gente que mach jin aj judíosob y cä xe tä xic'can y tä tz'ibajtescan y cä xe tä tubinte.

³³U xe u jätz'e'onob y de ya'i u xe u tzämsenonjob y u yuxp'elib q'uin cä xe tä cuxpan.

³⁴Ni doceba mach u chi entendejob niump'e cua' de lo que u yäliba uc'a ca' a wälä mäcbinti u c'ajalinob, y mach u yäc'bi uba cuentajob lo que älbintijob.

³⁵Jinq'uin aj Jesús c'oti nätz'ä tä Jericó ya'an untu ajchoc' que ya' chumca tu ch'ejpa bij tä tentenbäji.

³⁶Jinq'uin ni ajchoc' u yubi cache' nume u chen noj q'uenel gente bajca anba, u c'ati cua' jini ayan.

³⁷Ni gente u yälbijob cache' nume u chen aj Jesús, jini u cab tä Nazaretba.

³⁸De ya'i ni ajchoc' u chi noj awät u yäle' ca'da: ―¡Jesús, ane que u natil ch'oquet tuba ni rey aj David, ch'ämbenon yajin!

³⁹Machcatac u bixe pänte'ba u q'uejpijob uc'a ch'ijcäbac, pero une más noj gran awät u chen u yäle' ca'da: ―¡Ane que u natil ch'oquet tuba ni rey aj David, ch'ämbenon yajin!

⁴⁰De ya'i aj Jesús tajwa'wäni y u täsqui tä ch'ämcan, y jinq'uin c'oti ca'anba u c'atbi ca'da:

⁴¹―¿Cua' a wo cä cherbenet? Ni ajchoc' u p'ali ca'da: ―Cajnoja, co äc'binticon cä chen chanä.

⁴²Aj Jesús u yälbi ca'da: ―¡Chänen jiq'uin! U jäbi uba a jut uc'a a tz'oni.