Luka 18:14-42

¹⁴Vaćerava tumenđe: akava cariniko irinđa pe čhere opravdime anglo Devel, a na o fariseji! Adalese so đijekh kova povazdela pe, ka ovel peravdo; a o ponizna ka oven povazdime.”

¹⁵O manuša anena ine anglo Isus pumare tikore čhavoren te čhivel ple vasta upro lende hem te blagoslovini len. I ked o učenici dikhle adava, na mukle lenđe.

¹⁶Ali o Isus vičinđa len angla peste vaćerindoj e učenikonenđe: “Muken e čhavoren te aven kora mande hem ma ispudinen len adalese so esavkenđe preperela o carstvo e Devlesoro!

¹⁷Čače vaćerava tumenđe, ko na primini o carstvo e Devlesoro sar adala čhavore, na ka đerdini ano leste.”

¹⁸I nesavo šerutno pučlja e Isuse: “Učitelju šukareja, so te ćerav te dobinav o večno dživdipe?”

¹⁹A o Isus phenđa lese: “Sose vičineja man šukareja? Samoi o Devel šukar.

²⁰O naredbe e Devlesere džane: 'Ma ćer preljuba!' 'Ma mudar!' 'Ma čor!' 'Ma svedočin xovavne!' 'Poštujin te dade hem te daja!'”

²¹Tegani o šerutno phenđa: “Sa adava ćerđum taro tikvarila.”

²²Ko adava, o Isus phenđa lese: “Pana akava ačhola tut te ćere: biknin sa so isi tut, a o love de e čororenđe i ka adžićeri tut barvalipe ano nebo. Tegani ava hem phir pala mande.”

²³A ov ked šunđa adava, rastužisalo adalese so na manglja te biknel plo baro barvalipe.

²⁴A ked dikhlja le o Isus sar rastužisalo, phenđa: “Kobori pharo e barvalenđe te đerdinen ko carstvo e Devlesoro!

²⁵Po lokhei e kamilaće te nakhel maškaro kan e suvjakoro nego e barvalese te đerdini ko carstvo e Devlesoro.”

²⁶A o manuša kola šunde adava, phende: “Ko onda šaj te ovel spasime?”

²⁷A o Isus phenđa lenđe: “Soi nemoguće e manušenđe, mogućei e Devlese.”

²⁸O Petar phenđa: “Ače, amen sa ačhavđam te dža pala tute.”

²⁹A o Isus phenđa lenđe, e učenikonenđe: “Čače vaćerava tumenđe, đijekh kova ačhavđa plo čher, ili e romnja, ili e phraljen, ili e dade hem e daja, ili e čhaven zbog o carstvo e Devlesoro

³⁰ka primini po više ko akava sveto adalestar so ačhavđa hem ka primini o večno dživdipe ko sveto savo avela.”

³¹O Isus cidinđa pe e dešuduje apostolencar ki strana hem phenđa lenđe: “Ače, đerdinaja ko Jerusalim. Adari ka ovel sa adava so o proroci pisinde ko Sveto Lil mandar, e Manušesere Čhavestar.

³²O manuša ka den man ko manuša kola nane Jevreja. On ka maren muj mancar, ka vređinen man hem ka čhungaren man.

³³Ka šibinen man hem ka mudaren man, ali o trito dive ka uštav taro mule.”

³⁴O učenici na xalile ništa adalestar so o Isus vaćerđa lenđe. O značenje adale lafonengoro inele garavdo olendar i na džande sostar o Isus vaćeri.

³⁵Ked o Isus alo paše uzalo Jerihon, ko drom bešela ine nesavo kororo manuš hem prosini.

³⁶Ked o kororo manuš šunđa sar o narodo nakhela, raspučlja pe soi adava.

³⁷I phende lese so o Isus taro Nazaret nakhela.

³⁸Tegani o kororo vičinđa: “Isuse, Čhaveja Davidesereja, smilujin tut maje!”

³⁹A o manuša kola phirde anglo Isus phende lese te traini, ali ov pana po zorale vičinđa: “Čhaveja Davidesereja, smilujin tut maje!”

⁴⁰Tegani o Isus terdino hem naredinđa te anen e korore anglo leste. I ked ande le, o Isus pučlja le:

⁴¹“So mangeja te ćerav će?” A o kororo phenđa: “Gospode, mangava te dikhav.”

⁴²I o Isus phenđa lese: “Dikh! Sasljardo injan adalese so verujinđan.”