San Lucas 18:14-42

¹⁴Nedaꞌ rëpaꞌ lbiꞌiliꞌ: Böjëꞌ lidxëꞌ bönniꞌ uquízxj naꞌ, nuhuöaquëꞌ tsahuiꞌ lahuëꞌ Dios, clëg yetúëꞌ bönniꞌ niꞌ. Nútiꞌtëz bönniꞌ run ba zxön cuinëꞌ, gunëꞌ Dios ga huötaꞌ huöxjëꞌ, san nu bönniꞌ rzoëꞌ nöxj ladxiꞌ, gunëꞌ Dios ga gacrëꞌ blau.

¹⁵Niꞌr guladxinëꞌ ga zoëꞌ Jesús yuguꞌ bönniꞌ len ngul, nachëꞌquëꞌ‑biꞌ biꞌidauꞌ quequëꞌ quië gxoa nëꞌë lecbiꞌ Jesús. Catiꞌ gulaléꞌinëꞌ lë ni bönniꞌ usë́d queëꞌ Jesús, guladil‑lëꞌ lequëꞌ.

¹⁶Niꞌr bulidzëꞌ bönniꞌ daꞌquëꞌ Lëꞌ Jesús, rnëꞌ: ―Gul‑güíꞌ‑biꞌ latj laꞌdxinbiꞌ ga zoaꞌ biꞌidauꞌ ni, cu uzágaꞌliꞌ xnö́zcbiꞌ, le gataꞌ quegac nup nacgac cni latj ga rna bëꞌë Dios.

¹⁷Le nactë rëpaꞌ lbiꞌiliꞌ: Nu cusíꞌ lu nëꞌi le rna bëꞌë Dios, ca runbiꞌ tubiꞌ biꞌidauꞌ, cutu caꞌ tsaz ga niꞌ rna bëꞌë Lëꞌ.

¹⁸Gnabnëꞌ Jesús bönniꞌ uná bëꞌ, rnëꞌ: ―Bönniꞌ Usëdi gdu dxiꞌa. ¿Bizxa ral‑laꞌ gunaꞌ quië gdél‑liꞌdaꞌ yöl‑laꞌ naꞌbán gdu?

¹⁹Jesús rëꞌ lëꞌ: ―¿Bizx quië rëꞌu nedaꞌ: “Gdu dxiꞌa”? Nutu nu bönniꞌ naquëꞌ gdu dxiꞌa. Tuzëꞌ Dios naquëꞌ gdu dxiꞌa.

²⁰Nözcznuꞌ yuguꞌ le gna bëꞌë Dios: Cutu gunuꞌ dul‑laꞌ le rguitsj zxba qui yöl‑laꞌ nutság naꞌ. Cutu gdödcduꞌ bunách. Cutu cuanuꞌ. Cutu gneuꞌ qui lzaꞌu le cunácz. Ben ba laꞌn xuz xnaꞌu.

²¹Rëꞌ Jesús bönniꞌ naꞌ, rnëꞌ: ―Yúguꞌtë lë ni runaꞌ ga gdel‑laꞌ nacaꞌ biꞌidauꞌ.

²²Catiꞌ byönnëꞌ didzaꞌ ni Jesús, rëꞌ lëꞌ: ―Yetú le ryadzj quiuꞌ gunuꞌ. Bëtiꞌ yúguꞌtë le dë quiuꞌ, atiꞌ lë naꞌ siꞌu bnödzj quegac bunách yechiꞌ, atiꞌ gataꞌ quiuꞌ yöl‑laꞌ tsahuiꞌ yehuaꞌ yubá. Niꞌr gda, gdaꞌ nedaꞌ.

²³Catiꞌ byönnëꞌ didzaꞌ ni bönniꞌ naꞌ, ruhuiꞌnnëꞌ, le dëtsca yöl‑laꞌ tsahuiꞌ queëꞌ.

²⁴Catiꞌ bléꞌinëꞌ Jesús ca naꞌ ruhuiꞌnnëꞌ bönniꞌ naꞌ, rnëꞌ: ―Bicaꞌ baníg gac, laꞌyáz ga rna bëꞌë Dios nup taꞌleꞌi yöl‑laꞌ tsahuiꞌ.

²⁵Gacr huëz tödbaꞌ nag yötsiꞌ böaꞌ, ca tsaziëꞌ ga rna bëꞌë Dios bönniꞌ rléꞌinëꞌ yöl‑laꞌ tsahuiꞌ.

²⁶Niꞌr nup gulayöni didzaꞌ ni taꞌná: ―¿Nuzxa caz gac ulá, chquiꞌnuꞌ?

²⁷Jesús gudxëꞌ lequëꞌ: ―Le cugác lunëꞌ bönniꞌ, huac gunëꞌ Dios.

²⁸Niꞌr Pedro rëꞌ Jesús: ―Byutscaꞌ, netuꞌ nucaꞌntuꞌ yúguꞌtë le dë queëtuꞌ, len daꞌtuꞌ Liꞌ.

²⁹Niꞌr Jesús rëꞌ lequëꞌ: ―Le nactë rëpaꞌ lbiꞌiliꞌ, nu bönniꞌ ucaꞌnëꞌ lidxëꞌ, o xuz xnëꞌë, o yuguꞌ böchiꞌ zanëꞌ, o ngul queëꞌ, o yuguꞌ zxiꞌnëꞌ, le ruiꞌ ladxëꞌë gna bëꞌë Dios,

³⁰bönniꞌ ni huaziꞌrëꞌ dza ni zoaruꞌ naꞌa, atiꞌ dza ziꞌa zaꞌ gdél‑liꞌnëꞌ yöl‑laꞌ naꞌbán gdu.

³¹Bchëꞌë quizi queëꞌ idxínnutëꞌ bönniꞌ usë́d queëꞌ Jesús, len rëꞌ lequëꞌ: ―Gul‑yutscaꞌ, rbenruꞌ zijruꞌ Jerusalén, ga niꞌ lutság yúguꞌtë le nayujgac lu guich ca gulanë́ꞌ bönniꞌ gluꞌë didzaꞌ uláz queëꞌ Dios ca ral‑laꞌ gac quiaꞌ nedaꞌ, Bönniꞌ Nuhuöaquëꞌ Gdu Bunách.

³²Ludödëꞌ nedaꞌ bönniꞌ Jerusalén lu naꞌquëꞌ bönniꞌ ziꞌtuꞌ, atiꞌ lutitjëꞌ nedaꞌ, len lulídz ziꞌë nedaꞌ, len luchijëꞌ nedaꞌ zxönaꞌ.

³³Laꞌguinëꞌ nedaꞌ, atiꞌ tödr niꞌ ludöddëꞌ nedaꞌ, san catiꞌ gac tsonn dza ubanaꞌ.

³⁴Cutu gulayéjniꞌnëꞌ didzaꞌ ni bönniꞌ usë́d queëꞌ, len cutu gláquibeꞌinëꞌ le ruíꞌlenëꞌ lequëꞌ didzaꞌ qui, le nac le cusaquiꞌ laꞌyéjniꞌndëꞌ.

³⁵Catiꞌ chzoa gdxinëꞌ Jesús yödz Jericó, zoëꞌ niꞌ bönniꞌ nachúl lahuëꞌ. Röꞌë raꞌ nöz rnabëꞌ nu bi gunnz queëꞌ.

³⁶Bönniꞌ niꞌ byönnëꞌ taꞌdö́d niꞌ bunách zian, atiꞌ gnabëꞌ bizxa naꞌ rac.

³⁷Bunách niꞌ të lëꞌ: ―Jesús, bönniꞌ Nazaret, rdödëꞌ ni.

³⁸Niꞌr bëꞌë zidzj didzaꞌ bönniꞌ naꞌ nachúl lahuëꞌ, rnëꞌ: ―Jesús, Zxiꞌn xsoëꞌ David, buechiꞌ ladxiꞌ nedaꞌ.

³⁹Guladil‑lëꞌ bönniꞌ naꞌ nachúl lahuëꞌ bönniꞌ nanörquëꞌ lahuëꞌ Jesús, quië uséyj ruꞌë, san lëꞌ zidzjr bëꞌë didzaꞌ, rnëꞌ: ―Zxiꞌn xsoëꞌ David, buechiꞌ ladxiꞌ nedaꞌ.

⁴⁰Niꞌr gzëꞌ dxiz Jesús rbözëꞌ, atiꞌ gna béꞌinëꞌ nu tsajlídz lëꞌ gdxinëꞌ lahuëꞌ. Catiꞌ bdxinëꞌ lahuëꞌ Jesús bönniꞌ naꞌ nachúl lahuëꞌ, gnabnëꞌ lëꞌ Jesús,

⁴¹rnëꞌ: ―¿Bizxa rëꞌnnuꞌ gunaꞌ quiuꞌ? Bönniꞌ naꞌ nachúl lahuëꞌ rnëꞌ: ―Rëꞌndaꞌ huöalj yöj lahuaꞌ.

⁴²Jesús rëꞌ lëꞌ: ―Chböalj yöj lauꞌ. Chböacuꞌ le réjlëꞌu nedaꞌ.