LUCAS 18:14-42

¹⁴Yna noo lo de yra de ne chene le men guin ne rgoob zeg impwest wberee ruxyuu men, che wun Dëdyuzh men perdon, per le men ne nak farisew, wundet Dëdyuzh men perdon. Porke yrandxee mén ne rlanon laake, mén guin bet nondet lo Dëdyuzh; le mén ne nuu lextoo ne bet nondet, mén guin gaknon lo Dëdyuzh.

¹⁵Wdxinno mén minwin lo Jesus chen yxob nya Jesus xtoo miin; per chene wii xpén Jesus, wakndux men lo yra men ne wdxinno miin.

¹⁶Per wbëz Jesus men yra men, lex re Ne lo men: ―Gudee si chiid minwin lo noo, ysoowdet de, porke ledne rnebééy Dëdyuzh, por mén ne nak zegnak minwin nako.

¹⁷Nligue yna noo lo de yra de ne mén ne rlaandet ylaa ne rnebééy Dëdyuzh gakdet tee men ledne rnebééy Ne belne gakdet men zegnak minwin ne ron diiz.

¹⁸Wnabdiiz te mén ne rnebééy lo men-Israel lo Jesus, re men: ―Maxter, laa de ne wen de, ¿pagox rap noo degne ylaa noo chen gap noo gyelembán ne nunk luzhdet?

¹⁹Wke Jesus, re Ne lo men: ―¿Penak na de ne wen noo? Yët menwen; nonchee Dëdyuzh wen.

²⁰Laa de che nan de gan pagox rkyeen Dëdyuzh: “Ykanodet de mén ne nakdet lzaa de, yketet de mén, kwandet de, ykagyiidet de mén, gugaknzebnëz lo xuz de, gugaknzebnëz lo xnaa de.”

²¹Orguin re mén guin lo Ne: ―Yrandxee negwa che rlaa noo axtegue ne win noo.

²²Chene won Ne ne re men zenga, re Ne lo men: ―Benak rak falt ylaa de ste kos: gutoo yrandxee ne rap de, lex gudee med lo menprob, chen gap de ne non ne nuu gyeybaa; lex chiid de chidnal de noo.

²³Per chene won mén guin zenga, kesentyent wunles lextoo men, porke kesentyent rik men.

²⁴Ne wii Ne ne wunles lextoo men, re Ne: ―¡Kesentyent ngan tee menrik ledne rnebééy Dëdyuzh!

²⁵Mazre mbëëdee tee te kamey gyeer ne zob nii gyëtsguzh ke ne tee te menrik ledne rnebééy Dëdyuzh.

²⁶Yra men ne won ne re Ne zenga, re men: ―¿Txuzh nak ne gun gan yláá lo kastig cheguin?

²⁷Lex re Ne lo men: ―Logne rundet mén gan ylaa men, Dëdyuzh si run Ne gan rlaa No.

²⁸Lex re Bëd lo Ne: ―Noo yra noo, wsan noo yrandxee ne rap noo, zëdnal noo de.

²⁹Lex wke Ne re Ne lo Bëd: ―Nligue yna noo lo de yra de ne kwaskyertee mén ne rsan xyuu, rsan xegwzan, rsan bech, rsan xewnaa, o rsan zhiin por ne rlaa men ne rkyeen Dëdyuzh,

³⁰kesentyent ndaldee ne ykakwent men nee gyëzlyuree, no sdxiin dxe ne gap men gyelembán ne nunk luzhdet.

³¹Wbëz Jesus yra chibtxup xpén Ne waandxee, lex re Ne lo men: ―Orree tsa be Jerusalén ledne gak yra xkwent Men ne wdxiid wak Mén zegne wkaa yra profet.

³²Ydekwent mén men lo menzit, no yzhidxno mén men, yninyaan mén lo men, no ytxonxen mén lo men.

³³Ydee mén xkwent men; luzh nga yket mén men; per chene gyon gbiz, yban ke men.

³⁴Bet wdeedet men kwent gan penak re Ne zenga, ni nandet men gan pe rna ne re Ne zenga.

³⁵Chene che guex ydxiin Jesus gyëz-Jericó, nga zob te menngwlëë runëz rnab men goon.

³⁶Ne won men ne rzheedx rdee ndal mén, wnabdiiz men gan kox rak.

³⁷Lex re mén lo men ne Jesus men-Nazaret za nga.

³⁸Lex wkarëz men, re men: ―¡Jesus, XPee David, gules lextoo de noo!

³⁹Yra mén ne zaner wakndux men lo mén guin chen gyakchi men, per lel mazre rkarëz men, re men: ―¡XPee David, gules lextoo de noo!

⁴⁰Orguin wzutsë Ne, lex wkyeen Ne mén waxii mén men. Chene wdxiin men guex lo Ne, wnabdiiz Ne lo men, re Ne:

⁴¹―¿Pagox rlaan de ylaa noo por laa de? Wke menngwlëë guin, re men: ―Dechey, rlaan noo gyenii bzalo noo.

⁴²Orguin re Ne lo men: ―¡Gyenii bzalo de! Por ne wlaleedx de noo, wyenii we.