SAN LUCAS 18:14-42

¹⁴Cua̱co rá̱hn rí nchuhn te sa̱hn che necun me ne, a nchahco Dendiohs yahn se, ne cona̱hn se. Ate sa̱hn che ya̱de me ne, hua nta̱ca se vederenchahco. A tihca̱ va ca̱de, te adecoduhno ihyan che rendeva ma̱n ye yavena̱n ye ne, co cuihna̱n ye na̱n Dendiohs, ne adecoduhno ihyan che necun ye ne, ndeva Dendiohs ihyan.

¹⁵A̱ma ro ne, nda̱ ihyan, nda ye checa̱hya yahn ye ca̱va che nahn ta̱h Dihvo vo, cova̱h ye ca̱va. Ate ihyan apóstol ne, hua nahn ca̱h yune ye che ca̱hn nda̱ ihyan chahn na̱n Dihvo vo.

¹⁶Tuhme cah Dihvo vo ihyan apóstol chahn na̱n ye, ne ra̱hn ye: ―Hua ca̱hdenun nchuhn yune yahn checa̱hya che chi ná̱n, te dema̱n ihyan che necun ye nduhca̱ checa̱hya sih renevahnecun ye che rihquentiyon Dendiohs ihyan.

¹⁷Cua̱co rá̱hn rí nchuhn te adecoduhno ihyan che hua necun ye nduhca̱ checa̱hya ne, hua co nevahnecun ye vederihquentiyon yahn Dendiohs.

¹⁸A̱ma sa̱hn ndina̱n ne, tumerune se Dihvo vo: ―Ihyan Ricuahn Ndah, ¿deh va che dín ca̱va che conán vahchetero numacuahn ro ne?

¹⁹Ndahconan ye: ―¿Dehco che rahn che ndah u? Metah nde a̱ma ihyan che ndah ye, atena̱n Dendiohs.

²⁰A devene vederihquentiyon yahn Dendiohs: “Hua cahne ihyan. Hua din doche yehn che nihnevaque. Hua doque. Hua cahme ndudo cuahnde. Cuendeva yavena̱n chide ma̱n, cheque ma̱n.”

²¹Ra̱hn se ri se ihyan: ―Nducuahn vederihquentiyon cuh ne, redináhn nde ro che lihn u.

²²Chihnevan Dihvo vo che tihca̱ ra̱hn se, ne ra̱hn ye ri ye sa̱hn: ―Va ca ta̱ma na̱n che va che din. Condihcue nducuahn che va yehn, ne cuinen ihyan cheva̱h ca̱va che co conen vahchetero. Tuhme cochi, condoque u.

²³Cuahn che chihnevan se che tihca̱ ra̱hn ye ne, a̱ma chi nda̱che se, te a̱ma cuihca se.

²⁴Ndihchero Dihvo vo che a̱ma chi nda̱che se, ne ra̱hn ye: ―Ihyan cuihca ne, ¡a̱ma va̱hche ca̱va ye che nevahnecun ye che rihquentiyon Dendiohs ihyan!

²⁵Nde hua co nevahnecun ye.

²⁶Ihyan che chihnevan ye che tihca̱ ra̱hn Dihvo vo ne, ra̱hn ye: ―¿Duhra ihyan co ndevahn ye tuhme?

²⁷Ndahconan Dihvo vo yahn ye: ―Nducuahn che hua co din ihyan ne, Dendiohs ne, ri redin ye.

²⁸Tuhme ra̱hn Pedro: ―Ndihche ne, a chihcoma̱n nuhn nducuahn che va yahn nuhn, ne chinduco nuhn ndih.

²⁹Ra̱hn Dihvo vo ri ye ihyan chahn: ―Cua̱co rá̱hn rí nchuhn te adecoduhno ihyan che rihcoma̱n ye a va̱co ye ma̱n, a indihte yahn ye ma̱n, a dihno ye ma̱n, a ihyan nda̱hta yahn ye ma̱n, a da̱ya ye ma̱n, ca̱va che co nevahnecun ye che rihquentiyon Dendiohs ihyan ne,

³⁰ihyan min ne, tahque ndeh ca nuhnde menun yahn ye ma̱n ro cuh, ne adive ne, conan ye vahchetero numacuahn ro.

³¹Nedin da̱ma Dihvo vo nduh che ndichio ihyan apóstol yahn ye, ne ra̱hn ye ri ye ihyan: ―Ma̱n ne, cuhn vo nduco nchuhn ya̱n Jerusalén. U che rinducó nducoya̱ca ihyan ne, min va che chuhríhn nduhca̱ che dirun ihyan profeta nde ro mena̱n.

³²Neca̱h ihyan u ta̱h sa̱hn ta̱ma nación, din duche yahn se u ma̱n, din ta̱n se nducó ma̱n, ca̱hnan dan se u ma̱n.

³³Cuihno cuahn se u ne, ca̱hno se u. Ate cuihno ino ro ne, ntuché va̱n tena̱hn.

³⁴Ihyan chahn ne, hua chenahn ye che tihca̱ ra̱hn Dihvo vo, te va̱hche ri yahn ye ca̱va che conahn ye.

³⁵Ura che cuahn nino Dihvo vo ya̱n Jericó ne, a̱ma sa̱hn na̱n ve ne, va se chihto yune, rica se che din ihyan vedeva̱hino nduco se.

³⁶Nducote a̱ma rechuh ihyan yune ne, tumerune se deh ri.

³⁷Ra̱hn ihyan ri ye sa̱hn: ―A ta̱n cochi Jesús yahn ya̱n Nazaret.

³⁸Tuhme ra̱hn se numa dito se: ―Jesús, Da̱ya David, ¡conan va̱hino ne u!

³⁹Ihyan che nda̱hna̱n ye ne, ra̱hn ye ri ye sa̱hn che cuhnde dihn chende se. Ate nde tahque yudo na̱n se ra̱hn se: ―Da̱ya David, ¡conan va̱hino ne u!

⁴⁰Tuhme chandi Dihvo vo, ne tahve ye che chehua sa̱hn. Cuahn che nda̱ se na̱n ye ne, tumerune ye sa̱hn:

⁴¹¿Deh nehn che dín ndoque ne? Ndahconan se yahn ye: ―Dihvé, codin ne che co ro ná̱n.

⁴²Tuhme ra̱hn Dihvo vo ri ye sa̱hn: ―Nducote chitehne ne, a co ro nan.