1Jesu e ŋic mitidâŋ i jazaku jaza‐fârerâ Kafanaum haeo rawec.
2Ira momori soŋaŋ moc ere kiŋaŋ motec hâmozo ehuc fowec. Bomboŋ e motec ere maname biaŋkewec.
3Irec Jesure biŋe manarâ Judaŋic micne bapa Jesu hefârepie motec huc bâniniŋkecneocte jazawec.
4Eme jaŋe Jesurao fisirâ ʒiŋuc muhuc âzâcnembiŋ: “Momori soŋaŋ e jume biaŋkeekacte dâŋticne manazemec.
5E maŋticne Judaŋic nâŋerea domaekac. Erâ mitific‐nâŋec fuaocte ekizia moneŋ râeme sâckeme fua‐nârewec.”
6Iŋuc muhuc âzâcnepie manarâ jaŋehec rawec. Rarâ ficticne bâqiŋkezo ehame momori soŋaŋzi âgofâcne Jesurao sorec‐jopahuc dâŋ ʒiŋuc râeme rawec: “Wofuŋ, go ira domac, no iŋucne mac wemocte iqicnucmu.
7No nahacne manape mi sâckeme gorao fâzo quŋkepac hâcne. Irec go ira juhuc mâc miczi mutec kiŋaŋ motec‐nane ɋiɋic qazejec.
8No ŋic fekicne jaŋere kiŋaŋ qaqa, eme nore wahamicne momorifâc‐nane juŋgopieŋ. Eme jaŋeraonec moc ‘rac’ âzâcnepe raocmu, moc ‘warec’ âzâcnepe wareocmu, â kiŋaŋ motec‐nane ‘gie i bac’ mupe baocmu.”
9Eme Jesu e dâŋ i manarâ momori soŋaŋ seckecnerâ ŋicguru bâjâpembiŋ jaŋerao fotikierâ ʒiŋuc jazawec: “No ŋazape mananiŋ, Israe ŋic ŋoŋerao mamanasiŋ sâc iŋucne mi bâfuaekopac.” Iŋuc mume momori soŋaŋ âgofâcne jaŋe risierâ ficko ferâ kiŋaŋ motec ɋiɋic qame honembiŋ.
11Juku Jesuzi hae moc ʒâŋene Naiŋ ira rame motecfâcne â ŋic guru sâko bâjâpembiŋ.
12Eme hae mendâŋko fisihame qâŋɋâŋ moc reŋke wahambiŋ. Hozec moc ŋokâ‐ticne mocjaha e hâmowec, e hâcne duckeniŋte haeonec ŋic ŋokac waha‐fârembiŋ.
13Eme Wofuŋzi hozec honerâ bune sâqoreme muwec, “Mi kioc.”
14Iŋuc murâ ra katapa bâuame badomahapie ʒiŋuc muwec: “Motec, no gazakopac, faharec.”
15Iŋuc âzâcneme hâmocnezi faharerâ dâŋ dâŋ ewec. Eme Jesuzi neŋgoc‐ticnehec juocte râcnewec.
16Eme ŋic jaŋe i honerâ hâwic‐jopame Anutu muteŋkerâ ʒiŋuc mumbiŋ: “Porofete kâcɋene ŋondeŋ‐nâŋecko fuawec jukac.” Â gâcnezi mumbiŋ: “Anutu e ŋicfâc‐ticne jâmbomac iqic‐nâpokac.” Eme irec biŋe Judaia mâreŋko â mâreŋ ŋifec â ŋifec mâmâc qâfâuckerâ rawec.
18Johane kâpâcwâru ficko ŋehuc juhame motecfâc‐ticne jaŋe wiac fuawec irec dâŋ binaŋ ecnembiŋ.
19Eme dâŋ i manarâ motec jajahec hefârec‐jofarâ Wofuŋ ʒiŋuc muhuc wiocnenicte sorec‐jofawec: “Ware‐nâreocte mukicne go hâcne me? Me mocte woŋec junʒepeneŋ?”
20Sorec‐jofame motec jahe Jesurao fisirâ mupic: “Johane Miti Opâ fufuŋkezi kecʒiŋuc muhuc sorec‐nâfokac: Mesia ware‐nâreocte mukicne go hâcne me? Me mocte woŋec junʒepeneŋ?”
21Jesu e aua dameŋ ira ŋic huc ʒâic bâniniŋke‐jarewec â demoŋ jâpe‐jarewec â ʒâŋe tiŋtuŋ ʒâŋe fifi bacjopawec.
22Ehame ŋic jahe fisirâ wiocnepire ʒiŋuc jasawec: “Ŋohe rarâ wiac hone manac ekopirec irec dâŋ binaŋ Johane ecnehuc ʒiŋuc âzâcnenic: Tiŋtuŋzi ʒâŋe fitâcneŋgopieŋ, puriŋzi hata juŋgopieŋ, wicsanaŋheczi fâsâeŋgopieŋ, qepoŋzi dâŋ mamana eŋgopieŋ, hâmokicnezi ɋârerâ fahareŋgopieŋ, â waha qaqanezi Biŋebiaŋ manaŋgopieŋ.
23Eme moc e mana gâpârehuc qiqikiŋ mi enareocmu ere manape ʒerine ekac.”
24Eme Johanere motec jahec jahe risierâ rahapire Jesu e ŋic jumbiŋ jaŋe Johanere ʒiŋuc jazawec: “Ŋoŋe mâreŋ tuhuo wemo honeniŋte rambiŋ? Saparac moc mâŋâŋzi batac bawarec eme honeniŋte rambiŋ me?
25Me ŋic moc ŋaqi‐ticne eri qaraweŋnehec honezo rambiŋ? Manaŋgopieŋ, ŋic ŋaqi eri qaraweŋnehec rojueŋgopieŋ jaŋe ŋicwofuŋ ficko wiac âmbâŋ nâhuc foeŋgopieŋ.
26Me porofete moc honeniŋte rambiŋ? No ŋazape mananiŋ, ŋic honembiŋ e porofete gâcne jaŋere sâc mâcne, e sâc moc.
27Ere hâcne dâŋqâreŋ moc kecʒiŋuc fokac: ‘Manakic, no biŋe mumu ŋicnane sorepe fâ maigao fuaocmu, erâ hatage bâʒâwehuc bânie‐gareocmu.’
28No jâmbomac ŋazape, ŋokackonec fuakicne gâcne sasawa jaŋeraonec moczi Johane mi qâhuckekac. Â Anuture uucmaŋ fua tâcneme maŋnao wahakicne juocmuzi sifu e qâhuckeocmu.”
29Ŋic sasawa erâ takesi roro mâmâc jaŋe dâŋ manarâ Johanere Miti Opâ ruambiŋko Anuture dâŋ dopeckepie fâri fideteŋ ewec.
30Farisaio â sâcmutâc mamana saric jaŋe ine Johanere Miti Opâ qikiŋnehuc Anuture dâŋ râpeckepie jaŋerao fârimâc ewec.
31“Ŋicguru ʒi weni jaŋehec sâc hecjopape? Jaŋe weni jaŋe iŋucne?
32Jaŋe naru motec iŋucne. Naru motec jaŋe haeo ʒoŋao ŋehuc dâŋ ʒiŋuc mutac muwarec eeŋgopieŋ: ‘Gae hepene wemocte mi woŋgopieŋ’; ‘Ki makuc hepene wemocte mi kioŋgopieŋ!’
33Johane Miti Opâ fufuŋke e gie‐ticne fuŋkerâ nânâ qowi mi nâhuc sowa jume honerâ mumbiŋ: ‘E demoŋzi ecnekac.’
34Ŋic Fâri Wâtuŋne eki waharâ nânâ qowi nâme honerâ muŋgopieŋ, ‘Kec e ŋic nâ âmbâŋne, takesi roro â sâqocne bapa jaŋere âgo.’
35Anuture mamana biri ine qâjâpecfâcne jaŋe fuŋne‐ticne hewirickepie fâri fideteŋ ewec.”
36Farisaio moczi Jesu nânâre hefâreme ficticnao ferâ nânâ teboo ŋewec.
37Eme hae irec ŋokac sâqocne moczi Jesu e farisaiore ficko feme biŋe manarâ opâ âsu biaŋ moc kiruŋhec baferâ
38râpefuŋnao domahuc kiome ʒâŋeuc‐ticnezi kikene ruacneme qizec susuc‐ticnezi bâkereŋkewec. Erâ kike‐ticne muduckerâ opâ âsu ruacnewec.
39Ŋokac iŋuc eme farisaio Jesu hefârewec eki honerâ maŋnezi ʒiŋuc muwec: “Ŋokac ʒizi wiac ecnekac e sâqocne, Jesu e porofete jurâ muzac fuŋne‐ticne mana tarazac.”
40Eme Jesuzi ʒiŋuc âzâcnewec: “Simoŋ, no dâŋ moc gazape manac.” Âzânecme muwec, “Qaqazu, mutec manape.”
41Eme Jesuzi ʒiŋuc muwec: “Moneŋŋic moczi ŋic jajahec moneŋ jaba jactewec, moc 500 kina râcnewec â moc 50 kina.
42Eme okacne bazucnenicte moneŋ basapire tofa‐ticne qikiŋne‐jactewec. Eme jaheraonec mozi moneŋŋicte bubiaŋ fekicne bajuocmu, go more mukomec?”
43Wiocneme Simoŋ ʒiŋuc muwec: “Moneŋ bocjaha qikiŋnecnewec ere mukopac.” Mume Jesuzi ʒiŋuc âzâcnewec: “Go sâcne mukomec.”
44Iŋuc murâ ŋokacto forisierâ Simoŋ ʒiŋuc âzâcnewec: “Ŋokac kecʒi honekomec? No ficgao wefupe go kike ʒuʒure opâ mi râe‐naremec, ŋokac eki ine kike‐nane ʒâŋeuc‐ticnezi ruacnerâ qizec susucnezi bâkereŋkekac.
45Goki mi muducnumec, ŋokac eki ine kike‐nane ʒoɋac erâ muduckekac.
46Goki qizec‐nane wokemaŋ opâzi mi ruacnemec, ŋokac eki ine kike‐nane opâ âsu biaŋzi ruacnekac.
47Irec gazakopac, ŋokac e maŋjauŋ bocjaha enarekacte fuŋne‐ticne ʒiŋuc manac: E sâqocne bocjaha bâtâmirecnekicne. Moc e sâqocne afecne bâtâmirecnekicnezi maŋjauŋ afecne eocmu.”
48Iŋuc murâ ŋokac ʒiŋuc âzâcnewec: “Sâqocnege bâtâmire‐garekicne hâcne.”
49Iŋuc mume ŋic nânâ mâmâc nâhuc ŋembiŋ jaŋe maŋjeŋiczi ʒiŋuc mumbiŋ: “E mo ŋic mo, irec sâqocne bâtâmirekac?”
50Eme Jesuzi ŋokac ʒiŋuc âzâcnewec: “Mamanasiŋgere biaŋkekomec, buge âke mâteŋkeha ra juzemec.”
