Lucas 18:14-42

¹⁴Omoɨna dáɨitɨcue, afe úcube llɨ́ɨnoraɨma Juzíñamui anamo ñue illano jofomo jaide, mei íadɨ afe fariseo ímɨe ñue fɨ́noñega jailla. Mei uáfueza, abɨ ɨ́ɨnota jamánomoiacadɨmɨe anáfeficaide. Mei íadɨ abɨ́ ɨ́ɨnoñeno comécɨna mánaɨdɨmɨe daɨdɨ́mɨe jamánomoidɨmɨena jailla, —daɨde.

¹⁵Afe llezica comɨnɨ íaɨoɨ jézaɨnidɨno Jesumo atɨ́diaɨoɨ, afémacɨmo onoɨ bɨtállena. Mei íadɨ áfena ie llófuegamacɨ cɨ́oillano afe atɨ́dɨnona rairuídiaɨoɨ.

¹⁶Mei jɨáɨfodo Jesús ie llófuegamacɨ uáiduano daɨde: —Afe úruiaɨ dama cue dɨné bitíaɨoɨza. Afémacɨna rairuíñeno iri. Mei Juzíñamui illáɨmana illɨ́ruimo jáitɨno bie úruiaɨ izóidiaɨoɨ.

¹⁷Uáfuena ómoɨna dáɨitɨcue, fia comécɨna mánaɨde úrue izóiñedɨmɨe Juzíñamui illáɨmana illɨ́ruimo jaca jofo jáiñeite, —daɨde.

¹⁸Illáɨcomɨnɨmona dáamɨe Jesumo jɨcánote: —Ñuera Llófueraɨma, zíiñona cue íllena ¿nɨe izói íredɨcue? —daɨde.

¹⁹Jesús íena daɨde: —¿Nɨbái mei cuena “Fɨ́gomɨedɨo” daɨdɨo? Abɨ dɨne jɨáɨe ñúemɨena iñede. Dama Juzíñamui ñuena.

²⁰Caɨ ocuíina uáillaɨna cacádɨoza: “Jɨruífuena fɨnóñeno iri, jɨáɨmana fañeno iri, merɨ́riñeno iri, jɨáɨmamo taɨno lloñeno iri, o moo o ei dɨga ñue jacɨ́ruiri,” —daɨde.

²¹Jira afémɨe Jesuna daɨde: —Bíuaillaɨna cue dúemɨeniadɨ jaca naɨ biruido jeire ófɨredɨcue, —daɨde.

²²Afena cacáillano Jesús daɨde: —Mei íadɨ omo naɨ daafue fɨébide. Nana omo ite ráanɨaɨ fécano, afe ɨba dúeredɨnomo ine. Afemona monamo ite zíiñona ráifide raa óɨena íteza. Afe o ráanɨaɨ fecalle mei, mai cuedo bi, —daɨde.

²³Mei íadɨ áfena cacáillano ɨere zúucaide, mei afémɨe ɨere ráaredeza.

²⁴Jesús ie zúucaillana cɨ́oillano daɨde: —Ɨere ráaredɨmɨe mei íadɨ ie ráanɨaɨna cue baɨmo afémɨe izíruiadɨ, Juzíñamui illáɨmana illɨ́ruimo jofo jáillena ¡nɨɨ juárena!

²⁵Camello mámecɨrede áillue rɨlle eedo uífodo enéfenemo jailla juánide, mei jɨáɨfodo ɨere ráaredɨmɨe Juzíñamui illáɨmana illɨ́ruimo jaille ɨere juárede, —daɨde.

²⁶Aféfuena cacádɨno íena daɨdíaɨoɨ: —Ɨemona ¿nɨ́ɨmɨe jílloille? —daɨdíaɨoɨ.

²⁷Jira Jesús íaɨoɨna daɨde: —Comɨ́nɨmona fɨnónide raa Juzíñamui fɨnórede, —daɨde.

²⁸Afe mei Pedro íena daɨde: —Ocuíraɨma, odo bíllena caɨmo ite raana fɨénocaidɨcaɨ, —daɨde.

²⁹Jira afémɨe uai ote: —Uáfuena ómoɨna dáɨitɨcue, Juzíñamui illáɨmana illano ɨ́coɨnia jofo fɨénocaitɨmɨe, daje izói ie móotɨaɨ naa ie ámatɨaɨri fɨénocaitɨmɨe, daje izói ie aɨ naa úruiaɨri fɨénocaitɨmɨe

³⁰naɨ bínɨemo ie illa llezica aillo baɨmo llɨ́ɨnoite. Afe mei monamo zíiñona illɨno máiñoite, —daɨde.

³¹Jesús oni eneno doce dɨ́gade ie llófuegamacɨ uillano daɨde: —Ja birui Jerusalemo jáitɨcaɨza. Afénomo nana jaiai Juzíñamui uai llóraɨnɨ Nanoide Ɨima Jitó cuega uai jino zúilleza. Nanoide Ɨima Jitódɨcueza.

³²Afeno jɨcánemacɨmo cue fécaitiaɨoɨ, íemo cuena jɨfánodoɨitiaɨoɨ, íemo cuena báiñoitiaɨoɨ, íemo cuena túallaɨtiaɨoɨ.

³³Iemo cuena rázɨdo fáitiaɨoɨ. Afe mei cuena tɨ́taitiaɨoɨ. Mei íadɨ daaruiámani íllemona tɨ́idɨnomona meine abɨdo cáadɨmɨena íitɨcue.

³⁴Afe bífuiaɨna afémacɨ jaca onóñediaɨoɨ. Daje izói nɨ́mɨedo úriteza onóñediaɨoɨ, mei aféfuiaɨ afémacɨ baitánide.

³⁵Jesús Jericó jófuemo áɨnozilla llezica daa uínidɨmɨe io fuemo ráɨide. Afémɨe fia úcube jɨcáfɨrede.

³⁶Aillo comɨ́nɨaɨ jáillana cacáillano afémɨe, “¿Nɨ́ɨfue comuilla?” daɨde.

³⁷Jira afémɨemo llotíaɨoɨ, “Nazaret ímɨe bíedo jailla,” daɨdíaɨoɨ.

³⁸Jira afémɨe jɨ́ɨrioicaide: —Davidmona comuídɨmɨe Jesús, Mesía daɨnámɨe mai cuemo dúecai, —daɨde.

³⁹Uícodo jáidɨno afémɨena “Uriñeno llɨɨcai,” daɨdíaɨoɨ. Mei íadɨ afémɨe naɨ rɨire caillɨde: —Davidmona comuídɨmɨe, Mesía ímɨe mai cuemo dúecai, —daɨde.

⁴⁰Iemona Jesús náidade. “Afémɨe cue dɨné omoɨ uaji,” daɨde. Afémɨe dúcɨzaɨbilla llezica Jesús jɨcánote:

⁴¹¿Mɨnɨ́cana jítaidɨo, omo cue fɨnólleza? Jira uínidɨmɨe uai ote: —Ocuíraɨma, meine uído cɨóacadɨcue, —daɨde.

⁴²Jira Jesús íena daɨde: —Mai érocai. O ɨ́ɨnua ɨ́coɨnia ja jíllodɨo, —daɨde.