1Tiberio e jara 15 Roma ŋicwofuŋ jurakuhame Johanezi gie‐ticne fuŋkewec. Dameŋ ira Pontio Pilatozi Judaia mâreŋko kia juwec â Herode eki Galilaia mâreŋko mâreŋ soŋaŋ juwec â ɋâticne Filipo e Ituraia â Trakoniti irec ŋicwofuŋ juwec, â Lisania e Abilene mâreŋko ŋicwofuŋ juwec.
2Â taha bapa sâko jajahec jupic, Hanasi â Kaifa. Ŋic izi hâcne ŋicwofuŋ â taha bapa jurambiŋ dameŋ ira Zakariare ŋokâ Johane mâreŋ burocnao juhame Anutuzi giedâŋ mucnewec.
3Giedâŋ mucneme Jordaŋ ʒiŋuc ocninuc jufârehuc ŋic maŋjenic bârisierâ Miti Opâ ruapie sâqocne‐jeŋic tâmireocte jazawec.
4Porofete Jesajazi irec findaŋdâŋ kecʒiŋuc qâreŋkewec fokac: “Mareŋ tuhuo wiwira moc fuakac: Wofuŋte hata bâʒâweniŋ, hata‐ticne hepie wâneŋkeoc;
5wâcne wâcne hemase‐fârezo, tikine facne hezu hewâneŋ ezo; hehesicne hetiŋnezo â bahacne hefâsâezo.
6Eme mâreŋŋic ʒeŋgoma Anuture bâbâpiaŋ honeniŋmu.”
7Eme ŋic guru sâko Johanerao ra Miti Opâre mupie ʒiŋuc jazawec: “Homare ɋâric, ŋoŋe sâqocnere okacne fisizo ekac i wisecneniŋte mozi ŋazawec?
8Ŋoŋe maŋŋeŋic bârisiehuc irec sâcko fârine bâfuaniŋ me! Erâ maŋŋeŋiczi ʒiŋuc mi muniŋ: Nâŋe Abrahamte ɋâricfâc. No ŋazape mananiŋ: Anutu e muzo murâ sâcne mume qânâ ʒizi Abrahamte ɋâricfâc fuaniŋmu.
9Râric biac jâcfuŋko râekicne. Irec jâc moc fâri tâmiric domame qafararâ ʒocko rikezo.”
10Iŋuc muhuc jazame ŋic jaŋe wiocnerâ mumbiŋ: “Wemo enʒepeneŋ?”
11Mupie jazawec: “Ŋic moc e ŋaqi jajahec bajurâ âgone ŋaqi tâmiric honerâ moc râcnezejec. Â nânâre iŋuc jaha enʒepieŋ.”
12Eme takesi roro jaŋe iŋuc jaha Miti Opâre fisirâ indiŋkerâ mumbiŋ: “Qaqazu, nâŋe weniŋuc enʒepeneŋ?”
13Mupie jazawec: “Ŋoŋe mumutâc qâsuahuc ŋic moneŋ mi jowac ronʒepieŋ.”
14Â momori jaŋe iŋuc jaha fisirâ mumbiŋ: “Eme nâŋe wenac enaŋmu?” Mupie jazawec: “Ŋoŋe ŋic jopa qâʒâic me qoqoric kosa mi ejarenʒepieŋ. Mosare wiac roeŋgopieŋ irec manapie tarazejec.”
15Eme ŋic jaŋe Johanere buâkec ejareme mana kikiwehuc ʒiŋuc mumbiŋ: “E Kristo ine hâcne mecne.”
16Iŋuc mupie mâmâc sasawa dâŋ ʒiŋuc jazawec: “No opâ rua‐ŋarekopac. Râpefuŋ‐naneo warehuc jukac, e ine tâpiri sâc moc focnekac. E sâko no iŋucnezi mafahe decnepe mi sâckeocmu. Eki hâcne Tiri Mâro â ʒoc rua‐ŋareocmu.
17E oofaŋ‐ticnehec warerâ nânâfic‐ticne emasaŋkeocmu, ehuc nânâ fârine wosâerâ ficko râeme ŋeocmu â jawa rasa wiac ofaŋne behec eme ʒocsanaŋko ʒaocmu.”
18Johanezi uŋdâŋ i â gâcne muhuc ŋic Biŋebiaŋ jazawec.
19Jaŋe jazahuc ŋicwofuŋ Herode e iŋuc jaha mumu hehec ecnewec. E ɋaticnere ŋonâŋ, ʒâŋene Herodia, jâoc rowec â sindaŋ gâcne wâc ewec.
20Eme irec fainao qizecne sâko ehuc Johane kâpâcwâru ficko râewec.
21Ŋic bocjaha Johanerao fisirâ Miti Opâ ruahapie Jesu e iŋuc jaha rârâ ruawec. Ruarâ numuhame sambâŋ aŋkeme
22Tiri Mârozi sahac fârihec erâ hâpâ hawario ere faio wahawec. Ehame sambâŋkonec dâŋ ʒiŋuc wahawec: “Joroc Ŋokâ biaŋ‐nane, go hone aŋac agareekopac.”
23Jesu e jara‐ticne 30 qâririŋ bazurâ gie‐ticne fuŋkewec. Eme ŋic jaŋe ere manapie Josefere ŋokâ ewec. Josefe e Elire ɋâric,
24e Matatare ɋâric, e Lewire ɋâric, Lewi e Melikire ɋâric, e Janaire ɋâric, e Josefere ɋâric,
25e Matatiare ɋâric, e Amosire ɋâric, e Nahumte ɋâric, e Esilire ɋâric, e Nagaire ɋâric,
26e Maatare ɋâric, e Matatiare ɋâric, e Semeiŋte ɋâric, e Josecte ɋâric, e Jodare ɋâric,
27e Johanaŋte ɋâric, e Resare ɋâric, e Serubabere ɋâric, e Sealitiere ɋâric, e Nerire ɋâric,
28e Melikire ɋâric, e Adire ɋâric, e Kosamte ɋâric, e Elimadamte ɋâric, e Erere ɋâric,
29e Jesure ɋâric, e Elieʒere ɋâric, e Jorimte ɋâric, e Matatare ɋâric, e Lewire ɋâric,
30e Simeoŋte ɋâric, e Judare ɋâric, e Josefere ɋâric, e Jonamte ɋâric, e Eliakimte ɋâric,
31e Meleare ɋâric, e Menare ɋâric, e Matatare ɋâric, e Nataŋte ɋâric, e Dawidire ɋâric,
32e Isaire ɋâric, e Obedere ɋâric, e Boasire ɋâric, e Salare ɋâric, e Nasoŋte ɋâric,
33e Aminadare ɋâric, e Adamiŋte ɋâric, e Aranire ɋâric, e Hezoroŋte ɋâric, e Peresere ɋâric, e Judare ɋâric,
34e Jakobore ɋâric, e Isakare ɋâric, e Abrahamte ɋâric, e Tarare ɋâric, e Nahore ɋâric,
35e Serugure ɋâric, e Ragaure ɋâric, e Pelegere ɋâric, e Ebere ɋâric, e Selare ɋâric,
36e Kenaŋte ɋâric, e Arapakisare ɋâric, e Semte ɋâric, e Noare ɋâric, e Lamecte ɋâric,
37e Metuselare ɋâric, e Enokore ɋâric, e Jaredere ɋâric, e Mahalalere ɋâric, e Kenaŋte ɋâric,
38e Enosire ɋâric, e Setere ɋâric, e Adamte ɋâric, e Anuturaonec.
