Luk 18:14-42

¹⁴“Na tulengu gamu i kaglutan, di kulê i to msal ani, matlu kenen di kite Dwata, bay i satu, là, du balù simto to fdatah i kton, fdanà sa kadang, na balù simto to fdanà i kton, fdatah sa kadang.”

¹⁵Nun dad to mebe balù i too malnak dad ngàla di ku Dyisas du fye nagotan ale na dnasalan. Kabay di kite i dad mlalò kenen i nimòla, nngakla i dad to mebe i dad ngà.

¹⁶Kabay tlo Dyisas i dad ngà di kenen, manan, “Falohyu dad ngà salu di deg, na nangyu ale fnang, du ku simto to nun ksalig salngad i dad ngà ani, gakuf ale di kagot Dwata.

¹⁷Tulengu gamu i kaglutan, ku i ksalig i satu to là salngad di dad ngà ani, là kenen gakuf di kagot Dwata.”

¹⁸Nun satu ganlal i dad Dyu smalek ku Dyisas, manan, “E To Tamdò, too ge tlu to, taman ani snalekgu di ge, tan i nimògu fye gfungu i nawa landè sen.”

¹⁹Na man Dyisas di kenen, “Kan ku manam agu tlu to? Alò satu to tlu, dunan Dwata.

²⁰Tagadeam i dad flalò blé Dwata fagu di ku Mosis i gman, ‘Nang ge mlafà yaanam, nang ge manò, nang ge tmaku, nang ge tmulen kéng di gususay, na mafè ge i maam na yéam.’ ”

²¹Na man i ganlal, “Tanimengu i kdee dad flalò én mdà fa di gutukaygu.”

²²Kaklinge Dyisas ani, manan, “Kabay nun satu gukulangam. Mdà ge, na fablim i kdee dad knunam, na blém i bayadan di dad to landè. Na fagu déén nun bong knun gfunam di langit. Kafnge én, samfulê ge na mlalò ge deg.”

²³Kabay di kaklinge i ganlal i man Dyisas, mbaling kenen too mlidù du too bong knunan.

²⁴Di kite Dyisas i kliduan, manan di kenen, “Too malima kagfusuk i to nun bong knun di kagot Dwata.

²⁵Glut ani, malima fusuk i bong lmanaf kamél di sol i dalum, bay malima fa i satu to nun bong knun fusuk di kagot Dwata.”

²⁶Na smalek i dad to mlinge dun, manla, “Ku glut én, simto fakay galwà?”

²⁷Kabay man Dyisas, “Nè i là gagan i dad to, gagan Dwata.”

²⁸Na man Fiter, “Neyem gami, tatnagakmi i kdee du mlalò gami ge.”

²⁹Na man Dyisas di dale, “Tulengu gamu i kaglutan, ku nun to tmagak i gumnean, ku demen i yaanan, ku demen dad flanekan, ku demen dad tuan, ku demen dad ngaan du mdà di klaloan kagot Dwata,

³⁰too matnù fa i kdee gdawatan di bang ani di gtagakan, na gdawatan fa nawa landè sen di fulé duh.”

³¹Na santifun Dyisas i sfalò lwe to gal mlalò kenen, du manan di dale, “Flinge gamu, du ani salu ito di Dyérusalém, na ditù gugdohò i kdee tagsulat i dad tugad Dwata gablà di deg, agu i dnagit Tingà To.

³²Bléla agu di agot i dad to ise Dyu, na toola agu snilo, na fyà, na dnulàla agu,

³³na bnadasla, na flesla agu fnati. Kabay di gatlun duh, mték agu mdà di fati.”

³⁴Kabay là gamlabat i dad gal mlalò kenen i manan. Gbuni di dale i gumtatekan, na làla gadè dun.

³⁵Na di kagdadong ale Dyisas di tukay lunsud Dyériko, nun lagi butè sudeng di kilil i dalan du mni.

³⁶Na di kaklingen i lduk i kdee dad to magu mlius déén, snalekan ku tan i mkel.

³⁷Na manla, “Dyisas mdà di Nasarét i magu dini.”

³⁸Na tamlo kenen, manan, “E Dyisas, Bel Harì Dabid, begam agu kando!”

³⁹Na i dad to di muna, nngakla kenen, na manla kenen fanak, bay baling matnù kakitan, manan, “Bel Harì Dabid, begam agu kando!”

⁴⁰Na tlag Dyisas magu, na dekan ale mebe i to butè di kenen. Di kagdadongan, smalek Dyisas, manan,

⁴¹“I tan kayeam nimògu di ge?” Na man i to butè, “Amu, kayègu ku beg agu mite.”

⁴²Na man Dyisas di kenen, “Mite ge sa. Mdà di kafaglutam mgulê ge.”