Arókasi 18:14-42

¹⁴Ininiã Xesosi txari: —Atãopitikara nisãkire. Ikara inakari kiki Teoso kamaerekata. Isikasaaki iua aapokomoni, erekari itxapekaua. Iua pariseopekana, Teoso !ikamaerekatari iua. —Iuikakariua, poiãori itxauako. Poiãoripekana, apiatakari itxauako —itxa Xesosi.

¹⁵Ãti õti kãkiti minari amarini Xesosimoni erekari ninoamoni itakini ĩkapani. Txamari Xesosi moianariakori atapakasaakiri kãkiti imiakori mĩkani, isipikapana. —Hĩkanapiripeka. Hĩsipeka —itxana.

¹⁶Txamari Xesosi txari imoianariakori: —Hãuiritanako amarini notamoni apokini. !Hĩsipikapapena amarini, kotxi nitiretapitikana ninoa. Nisãkire auiãkani auikari nisãkire amarini auikini atoko. Kãkiti nisãkire amarini auikini atoko inakaninokara apoka Teoso auĩtetxi ininiãtaãua.

¹⁷Amarini auikari iri sãkire. Ininiã hĩxinikariko ia: Amarini atoko himinakaniã, Teoso sãkire iteene himauikakaniã, ininiã Teoso auĩtetxi ininiãtaãua !hiĩroã —itxa Xesosi.

¹⁸Xoteo auĩte pimaãri Xesosi: —Koerekareri erekari, kiripa nikama Teosokata ãtipirika nauini ĩkapani? —itxa.

¹⁹Xesosi txari iua: —Kininiãpa “erekari,” pitxano? Kãkiti erekari !auari. Teosonanira erekari.

²⁰Pite imarotapitikari Teoso paniãtakiti: “!Pisirĩkape ãti ĩtanorokata. !Pokaniuatape. !Piĩtiriuatape. Apanakini !pimisirienetape. Piri, pinoro pakini pipaxitako.” Ikara atoko pimarotapeka —itxa Xesosi sãkire.

²¹Ininiã iua kiki apakapapiretari: —Nota axapitipanika ninakasaaki, nikĩpitari ikara atoko inakari sãkiretxiti Teoso paniãtakiti —itxa.

²²Xesosi kenakotakasaakiri iua kiki sãkire, itxari: —Auapanika ãtinoka pikamini tĩkane. Ikinika pitii pivẽtxitako, eereka oa txineiro pisikanako minakati mauakinimoni. Eereka pisa notakata. Ikara atoko inakari pikaminiã, Teoso tixine papokasaaki ikinipoko erekari auiniiko pite —itxa Xesosi sãkire.

²³Iua kiki ikara ikenakotakasaaki, imatinaniuata, kotxi iua iteene katiiri itxaua.

²⁴Xesosi atamatakasaakiri iua matinaniuatini, itxari: —Pamimari katxineiroteri auĩtetiniri Teoso.

²⁵Atauako kamero napatari ãkorike sonakiã? Apia mimari kãkiti katxineiroterini auĩtetiniri Teoso —itxa Xesosi.

²⁶Ikara inakari kenakotakani txari: —Pamimari pisãkire. Ininiã kiripa apoka Teoso auiniãtaã? —itxana.

²⁷Ininiã Xesosi txana: —Kãkiti maposotakiniti Teoso posota ikamini —itxa Xesosi.

²⁸Ininiã Petro txari: —Ate takanapapekari ikinipoko pitekata asini ĩkapani —itxa.

²⁹Ininiã Xesosi txari: —Atãopitikara, ininiã ia atoko nitxai hĩte. Pauini pitakanapiniã, pĩtanoro, pitariakori, piri, pinoro, pamariteakori pakini pitakanapiniã, Teoso auĩtetxi ininiãua pirena pisãpiretini ĩkapani,

³⁰ininiã ĩkorasaaki apiata erekari papakapa. Ininiã ãti õti pipĩkasaaki iaxiti papokasaaki, pauapininiika pitxako —itxa Xesosi.

³¹Ãti õti Xesosi anikari imoianariakori ikira atoko, misãkireta itxana: —Uatxa Xerosareẽmoni asa. Kitxakapirĩka Teoso sãkire sãpiretakani sãpiretapekari nota hĩtari iaxitikiri pirena. Ninoa sãkire iõkatsopatakitina paĩtiki apokapitikako,

³²kotxi nisikaãkako Xoteo minakonimoni. Ninapetaãkako. Nimisãkirepiretaãkako. Nikiisokaãkako.

³³Niaritaãkako. Eereka nokaãkako. Ipi, ãti pakini õtisaaki iuaĩkana nõkitikaua —itxa Xesosi.

³⁴Xesosi moianariakori !imarotari isãkire. Ikara sãkiretxi kipatakori atoko itxa. Ininiã kona ninoa imarotari isãkire.

³⁵Xesosi apokaãpota Xerikoo sitatxiti takote. Mõsiãreti kimapori tiniãpo iitopãkanãta. Amanaãnãtaro txineiro.

³⁶Ikenakotari kãkiti kimaporiã napakani, ininiã: —Kiripa ikara? —itxa.

³⁷—Xesosi Nasaree sitatxitikiri, iuara napaãpota —itxana apanakini.

³⁸Ininiã iua mõsiãreti akirikata: —Xesosi, Taviini apika mekanirii, piamonĩkanoko —itxa.

³⁹Ninoa ĩkiikakani txitari iua: —!Pakiripoatape —itxana. Txama iteene iua akirikata iuaĩkana: —Taviini apika mekaniri, piamonĩkano —itxari.

⁴⁰Ininiã Xesosi iotoka. Amanaãna kãkiti: —Ere kiki himina notamoni —itxa Xesosi.

⁴¹Xesosi takote apokasaaki, Xesosi pimaãri: —Kipa pinireka nikaminii pitemoni? —Kõsiãrepeka ninini ninireka —itxari.

⁴²Ininiã Xesosi txari: —Kõsiãrepekai uatxa, kotxi pauikari nisãkire —itxa.