San Lucas 18:14-42

¹⁴Cuichjá cojo nuju ta cha faha tujúnsa jan ne, xi tu cavuya cafe cha ndava cha ne, ha cafë jyë́ rë cha xcun Nina, peru cha fariseo jan ne, hacuiin cuatjin cafë jyë́ rë cha. Cuatjin camá ta, tsëhë xi yëjë xuta xi sahmi yehe suvá me yojo rë me ne, cuechú nixtin xi Nina ne, tsinguijne me cjuatacun rë. Hane xuta xi tsinguijne suvá me yojo rë me ne, Nina ne, sahmi jyë rë me. ―‍Cuatjin xu cachja Jesús.

¹⁵Hacuaha cjuicojo xu xuta nixti rë me hiscan tacun Jesús xi cuisanetsja me nixti jan. Peru hya xi cavëë xu xuta ladu rë Jesús xi cuatjin cjui xuta cojo nixti rë me ne, cavatëcja xu me cjuatacun rë xuta jan.

¹⁶Peru Jesús ne, cajindaya xu me nixti jan xi cjuetjengui rë me, sehe ngajan xi cachja xu me cojo xuta ladu rë me cuitjin: ―‍Tuhun rë nixti cahndë́ catinduva tjengui ná. Xicanichuun rë cahndë́ ta, tsëhë xi nixti xi cuacun ne, hatuxa visehen ngajan hiscan xi sahmi Nina gubiernu.

¹⁷Cuichjá cojo nuju cjuaquixi ta suvá ni xuta xi tsingatihin me xi sahmi Nina me gubiernu sacuatjin tsingatihin nixti ne, me vëhë ni xi cuisehen me hiscan xi sahmi Nina gubiernu. ―‍Cuatjin xu cachja Jesús.

¹⁸Ngu xuta xi matitjun ne, cavinenguise xu me Jesús cuitjin: ―‍Ngayun Maestro, jemu ndaja ngayun. ¿Mé xi meje rë xi sahme cojo sa xi sacú ná cjuahñu xatsë? ―‍Cuatjin xu cachja me.

¹⁹Sehe ngajan xi Jesús ne, cuitjin xu cafayangui me: ―‍¿Mé má cuatjin nújun xi ndaja ngahan? Tsajin yo xi ndaja. Ngu ni Nina xi ndaja me.

²⁰Ngayun ne, ha hyun hacutjin chja ley rë Nina xi chja cuitjin: “Xicanihñuu cjuatsehen cojo rë ngu chjuun o cojo rë ngu xihin xi hacuiin tsujun, xicanicuun xuta, xicanihñuu cjuachëjë, xicanujuun cjuandesu tsëhë xuta, chjuhunrcun nahmi nuju hacuaha chjuhunrcun na nuju.” ―‍Cuatjin xu cachja Jesús cjua rë ley rë Nina.

²¹Hane ngajan xi xuta xi matitjun jan ne, cuitjin xu cachja me cojo Jesús: ―‍Yëjë cjua vëhë ne, ha cáhndë tsëhë hisca cjualihndi naha. ―‍Cuatjin xu cachja me.

²²Hane xi cahndë xu Jesús cjua rë me ne, sehe cachja xu me cuitjin: ―‍Tjin sa ngu cjua xi machaja nuju: yëjë ni xcusun xi tjin nuju ne, titeñu, hane sehe tichuncjun tujún rë ngajñi rë xuta yuma. Hane xi cuatjin nihñu ne, jemu jyë cjuanchina sacú nuju ngajan ngahnga. Hane xi cjuë cuichuncjun tujún vëhë ne, sehe nduvun tisecun ná. ―‍Cuatjin xu cachja Jesús.

²³Peru xi cahndë xu xuta xi matitjun jan cjua xi cachja Jesús ne, jemu va camá cacun me, tsëhë xi jercu nchina camahani me.

²⁴Hane xi vutsejen xu Jesús xi jemu va camá cacun xuta xi matitjun jan ne, sehe cachja xu me cuitjin: ―‍Jemu chja xi ngu xuta xi tjin rë me cjuanchina cuisehen me hiscan sahmi Nina gubiernu.

²⁵Ha hitsë sa chjaain cuatju ngu chu camellu ngojo rë ngu níndu xi cuma rë xi cuisehen ngu xuta nchina hiscan sahmi Nina gubiernu. ―‍Cuatjin xu cachja Jesús.

²⁶Ngajan xi xuta xi cahndë me cjua jan ne, cuitjin xu cachja me: ―‍Sá cuatjin ne, ¿yo xi cuma cuetjutje ni? ―‍Cuatjin xu cachja me.

²⁷Hane Jesús ne, cuitjin xu cafayangui me: ―‍Yëjë ni xi maji sahmi xuta ne, Nina ne, hatuxa ma sahmi me. ―‍Cuatjin xu cafayangui Jesús.

²⁸Ngajan xi Pedru ne, cuitjin xu cachja me cojo Jesús: ―‍Chutsujun ni. Ngayin ne, ha canismitacuín yëjë ni xcusun xi tjin niji, hane tivisecuin nuju. ―‍Cuatjin xu cachja Pedru.

²⁹Hane Jesús ne, cuitjin xu cachja me: ―‍Cuichjá cojo nuju cjuaquixi ta yëjë xuta xi tsismicacun me ndava me, tsismicacun me chjuun rë me, tsismicacun me xicjin me, tsismicacun me xutacha rë me, tsismicacun me quihndi rë me, xi cjuetjengui me ndiya rë Nina ne,

³⁰hatuxa cjín sa cahndë́ sacú rë me xi cuma sacuaha ndava me, hacuaha hatuxa cjín sa xuta sacú rë me xi cuma sacuaha xuta rë me, quihndë xi siu me ngasunhndë vihi, hane hya xi cueya me ne, sacú rë me ngu cjuahñu xatsë. ―‍Cuatjin xu cachja Jesús.

³¹Hya xi camá xu ne, quijicojoxin Jesús tejó xuta ladu rë me, sehe cachja xu me cojo cuitjin: ―‍Quihndë ne, tivanguen Jerusalén. Hane xi cjuehen jan ne, cuetjucaa yëjë sacuatjin catsihindu profeta tsahan, ngahan xi Quihndi rë Xuta Jain ngahan.

³²Ngahan ne, cuma ngahan entregadu tsja xutaxín, cuejnucëë ná xuta, choho cuichja me tsahan, cuëhënatya ná me.

³³Hane xi cjuë cuaja ná me ne, sehe tsiquehen ná me. Peru xi ma jyan nixtin ne, cúya nga cjuahñu. ―‍Cuatjin xu cachja Jesús.

³⁴Peru xuta ladu rë me jan ne, hisca ngu xu cjua vëhë cajnii rcu me ta tjihma cjuatacun vëhë xi cuma rë me. Vëhë xi hvíin xu me mé vijne cjua xi cachja Jesús jan.

³⁵Hya xi camá ne, xi camatiña xu Jesús tsëhë nandya Jericó cojo xuta ladu rë me ne, ngajan tacun xu ngu cha rcá tjehen ndiya, fehya cha caridad.

³⁶Hane xi cahndë cha xi jercu cjín xuta fane ntsacu me ne, sehe cavinenguise xu cha mé jima jan.

³⁷Hane tjin xu yo cachja cojo cha xi Jesús tsëhë nandya Nasaret tivatju me cojo xuta ladu rë me.

³⁸Hane cha rcá jan ne, cuitjin xu cajindaya cha cachja cha: ―‍¡Ngayun Jesús, tjë rë David! Catamayuma nuju ngahan. ―‍Cuatjin xu cachja cha.

³⁹Hane xuta xi cjui titjun jan ne, cavisiajmi cjan xu me cojo cha xi sejyu cha. Peru cha vëhë ne, hitsë sa jercu cajindaya xu cha cachja cha, cuitjin cachja cha: ―‍¡Ngayun tjë rë David! Catamayuma nuju ngahan. ―‍Cuatjin xu cachja cha.

⁴⁰Ngajan xi Jesús ne, xi casecunhñu xu me ne, sehe cavitexa me xi cuinduva cojo xuta cha rcá jan hiscan xi secun me. Hane xi camatiña cha tsëhë Jesús ne, sehe cavinenguise xu me cha cuitjin:

⁴¹―‍¿Mé xi meje nuju xi sahme cojo nuju ni? ―‍Cuatjin xu cavinenguise me. Sehe ngajan xi cha rcá jan ne, cuitjin xu cachja cha: ―‍Tatá. Meje ná xi cuma tsejen nga ná. ―‍Cuatjin xu cachja cha.

⁴²Hane Jesús ne, cuitjin xu cachja me cojo cha: ―‍Catamatsejen nga nuju. Ngayun ne, camandaja túxcun ta, tsëhë xi camangutacún cojo ná. ―‍Cuatjin xu cachja Jesús.