Luuka 18:14-42

¹⁴Haya, miɗo wiya on: oo hooti yo nanngiraaɗo pooccitiiɗo, wanaa oo too. Sabi mawninkiniiɗo fuu leyɗinte, leyɗinkiniiɗo fuu toownete.

¹⁵Won waddanɓe Iisaa cukaloy keccoy, yalla omo mema koy. Kaa nde taalibaaɓe ɓee njiinoo ɗum ndee, ndarii ana njahoo e yimɓe ɓee.

¹⁶Non Iisaa noddi taalibaaɓe ɓee, wii ɗum'en: —Accee cukaloy koy ngara e am, pati kaɗee koy, sabi wa'uɓe no makkoy nii ɓee njey Laamu Laamɗo oo.

¹⁷Miɗo haalana on goonga: mo jaɓiraali Laamu Laamɗo oo no cukalel nii fuu, naatataa hen!

¹⁸Gooto e hooreeɓe Yahuudiyankooɓe lamndii mo, wii: —Moobbo moƴƴo, koɗum kaan-mi waɗude faa mi heɓa nguurndam nduumiiɗam?

¹⁹Iisaa wii mo: —Ko saabii so aɗa noddira kam moƴƴo? Moƴƴo walaa so wanaa gooto, oo woni Laamɗo.

²⁰Aɗa anndi ɗii ɗoo sariyaaji: «Pati jeenu, pati ɲaaɗu hoore, pati wujju, pati seeda fenaande, teddin inna maa e baam maa.»

²¹Hooreejo oo jaabii mo, wii: —Miɗo haybi ɗum fuu gila e cukaaku am.

²²Nde Iisaa nanunoo ɗum ndee, wii mo: —Aɗa ɲakoraa huunde wootere: soottu ko njogi-ɗaa koo fuu, ndokkaa kaalisi oo misikiina'en. Nden, a heɓan jawdi dow kammu. Caggal ɗum, ngaraa, njokkaa kam.

²³Kaa nde mo nanunoo ɗum ndee, mo ɲirɓinii, sabi o arsukunte ɲolɗo.

²⁴Iisaa ƴeewi mo, wii: —Hee naatugol arsukunte e Laamu Laamɗo ana tiiɗi!

²⁵Sabi ƴaɓɓoraade ngelooba e wuddere mesalal ɓuri newaade, diina naatugol arsukunte e Laamu Laamɗo.

²⁶Hettindantooɓe mo ɓee mbii: —Ndennoo, homo woni kisoowo?

²⁷Iisaa jaabii: —Ɗo yimɓe ɗum laatataako, kaa eɗum laatoo to Laamɗo.

²⁸Piyeer jaɓɓitii, wii: —Minen, min njoppii ko min njogii fuu, min njokkii e maa.

²⁹O wii ɓe: —Miɗo haalana on goonga: neɗɗo fuu joppirɗo galle mum naa jom suudu mum naa sakiraaɓe mum naa saaraaɓe mum naa sukaaɓe mum saabe Laamu Laamɗo,

³⁰heɓan cowe keewɗe e oo ɗoo wakkati mo ngon-ɗen e mum jooni, heɓa nguurndam nduumiiɗam e wakkati garoyoowo oo duu.

³¹Iisaa noddi taalibaaɓe mum sappo e ɗiɗon ɓee, wii ɗum'en: —Kettinee, eɗen nii ŋabbita Urusaliima. Ko annabaaɓe mbinndunoo haala Ɓii Neɗɗo koo fuu, tabitan.

³²Sabi o waɗete e juuɗe heeferɓe, ɓe njaayra mo, ɓe torra mo, ɓe tutta e makko,

³³ɓe piya mo dorri, ɓe mbara mo. Kaa ɲalooma tataɓo oo, mo wuurtan.

³⁴Taalibaaɓe ɓee paamaali haala kaa. Maanaa makka suuɗanike ɓe, ɓe anndaa ko o yiɗi wiide.

³⁵Nde Iisaa ɓadinoo Yeriko ndee, tawi bumɗo ana jooɗii sera laawol ngol, ana garbinoo.

³⁶Oon maati jamaa ana ƴaɓɓoo, lamndii ko ɗum woni?

³⁷Ɓe mbii mo: —Iisaa Nasaraatunke oo ɓettotoo ɗoo.

³⁸O wulli, o wii: —Iisaa, taanii Daawuuda, yurmam!

³⁹Ardiiɓe ɓee ndarii ana njahoo e makko, ana mbiya o deƴƴinoo. Kaa o ɓeydii wullude, omo wiya: —Taanii Daawuuda, yurmam!

⁴⁰Iisaa darii yamiri ɓe ngadda mo e mum. Nde mo ɓadinoo ndee, Iisaa lamndii mo, wii:

⁴¹—Koɗum njiɗ-ɗaa mi waɗane? O wii: —Moobbo, mi hewta gite am!

⁴²Iisaa wii mo: —Wumtu, goonɗinal maa danndii ma.