Lucas 18:14-42

¹⁴»Kambꞌiꞌij kꞌu chiwe: Wa aj tzꞌonol puaq re tojonik xtzelej chirocho ꞌanom chi jusukꞌ che ruma ri Dios; noꞌj ri fariseo, na xkuy ta rumak. Ma china ri kuꞌan nim che ribꞌ, ri Dios kuqasaj uwa uqꞌij; noꞌj china ri kuꞌan chꞌutiꞌn che ribꞌ, ri Dios kuyak uqꞌij» xchaꞌ.

¹⁵E kꞌo jujun raltaq ko akꞌalabꞌ xekꞌam lo chwach ri Jesús chaꞌ Rire kuya ruqꞌabꞌ pakiwiꞌ. Yey rutijoꞌn echiriꞌ xkil waꞌ, xekiyaj ri ekꞌamayom lo ke.

¹⁶Noꞌj ri Jesús xebꞌusikꞌij pan rakꞌalabꞌ y jewaꞌ xubꞌiꞌij chike rutijoꞌn: «Chiyaꞌa luwar chike ri raltaq ko akꞌalabꞌ chepeta na wukꞌ. Mebꞌiqꞌatej; ma ri kakiꞌan e jelaꞌ pachaꞌ rike, riꞌ kuꞌan ke rutaqanik ri Dios.

¹⁷Paqatzij wi kambꞌiꞌij chiwe: China ri na kukꞌul ta rutaqanik ri Dios jelaꞌ pachaꞌ kuꞌan juna ralko kꞌoꞌm, riꞌ na kok ta chupa rutaqanik ri Dios» xchaꞌ.

¹⁸Kꞌo jun aj wach xkꞌun rukꞌ ri Jesús y xutzꞌonoj che: —Lal utzilaj tijonel, ¿saꞌ ri kanꞌano chaꞌ kꞌo nukꞌaslemal na jinta utaqexik? —xchaꞌ.

¹⁹Ri Jesús xukꞌul uwach: —¿Suꞌbꞌe kabꞌiꞌij la “utz” chwe? Ma xa Jun ri lik utz kꞌolik, waꞌ e ri Dios.

²⁰Rilal etaꞌam chi la saꞌ taq Rutzij Upixabꞌ ri Dios: “Matmakun chirij ri kꞌulanikil. Matkamisanik. Mateleqꞌik. Maꞌan raqꞌubꞌal chirij junoq. Chaloqꞌoj kiqꞌij rachu-aqaw” —xcha che.

²¹Rachi xubꞌiꞌij: —Ronoje waꞌ nuꞌanom lo chwi nuchꞌutiꞌnal —xchaꞌ.

²²Echiriꞌ ri Jesús xuta waꞌ, jewaꞌ xubꞌiꞌij che: —Kꞌa kꞌo ri lik chirajawaxik kaꞌan la: E kꞌayij la ronoje taq ri bꞌeyomalil la y jacha kꞌu la chike ri nibꞌaꞌibꞌ; jekꞌuriꞌlaꞌ kꞌo bꞌeyomalil la chilaꞌ chikaj. Tekꞌuchiriꞌ peta la y tereja lo la chwij —xchaꞌ.

²³Ekꞌuchiriꞌ xuta waꞌ rachi, lik xuchap bꞌis, ma rire lik bꞌeyom.

²⁴Echiriꞌ ri Jesús xrilo lik xuchap bꞌis rachi, jewaꞌ xubꞌiꞌij: —Ri e bꞌeyomabꞌ, lik kꞌayew chike kebꞌok chupa rutaqanik ri Dios.

²⁵Ma e ne más kꞌayew ri kok juna bꞌeyom chupa rutaqanik ri Dios chwa ri kikꞌow juna camello chupa rutel juna akuxaꞌ —xchaꞌ.

²⁶Ewi ri xetaw re waꞌ, xkibꞌiꞌij: —We e riꞌ, ¿china kꞌu riꞌ ri kakolobꞌetajik? —xechaꞌ.

²⁷Xubꞌiꞌij kꞌu ri Jesús chike: —Ri tikawex na kakikolobꞌej ta kibꞌ kitukel, ma waꞌ lik kꞌayew chikiwach; noꞌj ri Dios kuꞌano ma na jinta kꞌayew chwach Rire —xchaꞌ.

²⁸Ekꞌuchiriꞌ, xubꞌiꞌij ri Pedro: —Qajawal, e riꞌoj qayaꞌom kan ronoje y oj teran chiꞌij la —xchaꞌ.

²⁹Ekꞌu ri Jesús xubꞌiꞌij chike: —Paqatzij wi kambꞌiꞌij chiwe: China ri uyaꞌom kan rocho, ebꞌuyaꞌom kan ruchu-uqaw, ri ratz-uchaqꞌ, ri rixoqil o ri ralkꞌoꞌal ruma rutaqanik ri Dios;

³⁰ruma taq kꞌu waꞌ wa uyaꞌom kanoq, lik kꞌi ri rajil ukꞌaxel kukꞌul wara che ruwachulew. Yey chiqawach apanoq kukꞌul na ri kꞌaslemal na jinta utaqexik —xchaꞌ.

³¹Ri Jesús xumol kichiꞌ ri kabꞌlajuj utijoꞌn y jewaꞌ xubꞌiꞌij chike: «Chitapeꞌ. E waꞌ kojpaqiꞌ Jerusalem y chilaꞌ kuꞌana ronoje ri tzꞌibꞌital kan kuma ri qꞌalajisanelabꞌ chwi Ralaxel Chikixoꞌl Tikawex:

³²kayaꞌ kꞌu pakiqꞌabꞌ ri na e ta aj judiꞌabꞌ, kachꞌamixik, kayoqꞌik y kachubꞌaxik.

³³Echiriꞌ lik jichꞌom chi upa, kakamisaxik. Noꞌj churox qꞌij kakꞌastaj lo chikixoꞌl ri ekaminaq» xcha ri Jesús.

³⁴Pero rutijoꞌn na jinta xkimaj usukꞌ che waꞌ, ma kꞌamajaꞌ kayaꞌtaj chike kakimaj usukꞌ.

³⁵E xuꞌan waꞌ echiriꞌ ri Jesús xa naqaj chi kꞌo wi che ri tinamit Jericó. Kꞌo jun potzꞌ tzꞌul chuchiꞌ ri bꞌe, kutzꞌonoj limoxna.

³⁶Ekꞌuchiriꞌ xuto katajin kikꞌowik ukꞌiyal winaq, xutzꞌonobꞌej: —¿Saꞌ laꞌ la katajin rikꞌowik? —xchaꞌ.

³⁷Y kꞌo xebꞌiꞌn che: —E Jesús ri aj Nazaret katajin rikꞌowik —xechaꞌ.

³⁸Ekꞌuchiriꞌ, rire lik ko xsikꞌinik, jewaꞌ xubꞌiꞌij: —¡Jesús, lal ri Ralkꞌoꞌal kan ri rey David, chinjuchꞌ kaꞌn ko cheꞌla! —xchaꞌ.

³⁹Yey ri winaq e nabꞌejinaq xkichꞌaꞌbꞌej upa chaꞌ na kasikꞌin ta chik. Noꞌj ri potzꞌ más ne ko kasikꞌinik, jewaꞌ kubꞌiꞌij: —¡Lal ri Ralkꞌoꞌal kan ri rey David, chinjuchꞌ kaꞌn ko cheꞌla! —xchaꞌ.

⁴⁰Ekꞌuchiriꞌ ri Jesús xtakꞌiꞌik y xutaq ukꞌamik ri potzꞌ. Y echiriꞌ xkꞌam lo chwach, ri Jesús xutzꞌonoj che:

⁴¹—¿Saꞌ ri kawaj kanꞌan chawe? —xchaꞌ. Y ri potzꞌ xubꞌiꞌij che: —Wajawal, ꞌana la chwe kintzuꞌnik —xchaꞌ.

⁴²Ekꞌu ri Jesús xubꞌiꞌij che: —¡Chat-tzuꞌn bꞌa riꞌ! Ma ruma ri kubꞌulibꞌal akꞌuꞌx wukꞌ, at kunutajinaq chik —xchaꞌ.