SAN LUCAS 18:14-42

¹⁴An xin_nuu̱ —kitsu Jesús—, kionga xutabi kiji ngani ndaba, je kuachatꞌare jere, tunga bi xuta fariseo. Ngatꞌa xi tu kui tajngu nkꞌa ꞌbaxje yojore, kui= xi kjuiꞌnaxjenima. ꞌBa xi kꞌuaxjenima yojore, kui= xi sakure kjuaje.

¹⁵ꞌBa nde jaꞌechanire Jesús kiꞌndi nisti, tuxi sichikuntaꞌenni nga kuanere ntsja; tunga xutare jatiko xi inyafaꞌeko.

¹⁶Tunga Jesús kinchjare kiꞌndi nistiu ꞌba kitsure nchjabiu: —Taꞌeꞌndio nga kiꞌndi nistiu kjuaꞌekunna̱, bi ꞌbechjaꞌnde_ru, ngatꞌa ña batexuma Naꞌenchana kui= xi joni nisti tseꞌe.

¹⁷Ngatꞌa jngu kiꞌndi taꞌa kjebe mé= xi baꞌere. ꞌBa kjuakixi= xi xin_nuu̱, tuꞌyañu xi bi ꞌba tsaꞌen skjebe kjuandare Naꞌenchana nga ku̱akjainre nga kui xi batexuma, niñajanni ku̱an kjuaꞌasꞌen ña batexuma= Naꞌenchana.

¹⁸ꞌBa jngu xuta ngaku tsiningiyare Jesús: —Ji Maestru xi ndai, ¿mé= xi saꞌaa̱n, tuxi sꞌe̱nina̱ kjuabenichun xi bi fetꞌa?

¹⁹ꞌBa Jesús kitsure: —¿Ánñu xuta nda ꞌmininaa̱? Tsajainjín xuta xi nda, tu Naꞌenchana sani.

²⁰Je ꞌye mé= xi tsu kjuatexumo: “Bi siꞌen kjuachajngi; bi sikꞌen; bi cheje siꞌen; bi en ndesu kjuinukjuai ngatꞌare xi yakꞌa; chakuin naꞌenri ko nari.”

²¹ꞌBa xutabiu kitsu: —Ngayéje kibiu tetsikꞌetjusaa̱n ꞌndani nga kindia̱.

²²ꞌBa kionga Jesús kjintꞌe kibi, kitsure: —Ngijngu tsajmi chaja ngisari: tꞌikateñe ngayéje xi tjinri ꞌba xuta xi ni̱ma̱ taꞌe_ri, ꞌba ꞌbatsaꞌen sꞌe̱ri kjuanyina ngankꞌaa; ꞌba ndetjenngina.

²³Tunga kionga xutabiu kjintꞌe ion, ꞌñu kuabare, ngatꞌa ne ꞌñu nyina.

²⁴ꞌBa kionga Jesús tsabe nga kuabare xutabiu, kitsure: —¡Á tsaꞌen naꞌen ku̱anire xuta xi nyina nga kjuaꞌasꞌen ña batexuma Naꞌenchana!

²⁵Ngisa= bi naꞌen ku̱anre nga jngu chakameyu kjuaꞌasꞌen ntsꞌare nindu, tsa jngu xuta nyina kjuaꞌasꞌen ña batexuma Naꞌenchana.

²⁶ꞌBa xuta xi kjintꞌere tsiningiyare: —Ngu, ¿ꞌyá= xi ku̱anre kjuinikꞌangi tsuꞌba?

²⁷ꞌBa Jesús kitsingojore: —Mé xi bi mare tsaꞌen xuta, kui= xi mare tsaꞌen Naꞌenchana.

²⁸ꞌBa Pedro kitsure: —Naꞌen, ji̱n kjinikꞌejña yejenii̱ mé= xi tjinni̱, ꞌba tsetjenngiri̱.

²⁹ꞌBa Jesús kitsure: —Kjuakixi= xi xin_nuu̱, tsa ꞌyáñu xi ꞌejña ndaba, chjunre, ntsꞌe, xichare, asa kiꞌndire, tuxi sjaꞌndeni nga Naꞌenchana kuatexumare,

³⁰kui xi tsꞌaxtiu kuaꞌere ngasunꞌndebi, ꞌba nixtjin xi saꞌe ndiba sꞌe̱re kjuabenichun xi bi fetꞌa.

³¹ꞌBa Jesús jakotꞌaxin xutare xi tejó, ꞌba kitsure: —Tasen ñojon. Temangin=ña naxinanda Jerusalén ña ku̱ajngu yeje xi kitsiꞌindu nchja chinga profeta ngatꞌa tseꞌe Kiꞌndire Xuta xiꞌiun.

³²Ngatꞌa ku̱angantsjare xuta xi bi tseꞌe Israel, ꞌba kui kuejnuke, chꞌo siko, kꞌuetiajunre,

³³kuajare ꞌba jaskan sikꞌen. Tunga xi majánni nixtjin kjuaꞌaya nganire ngajinre mikꞌen.

³⁴Tunga xutare nimé kuankjinre, ꞌba ninga bi be mé= ngatꞌa tseꞌe xi titsu Jesús, ngatꞌa kisꞌejñaꞌmore kibiu.

³⁵ꞌBa kionga Jesús tifechutiña naxinanda Jericó, jngu xuta ka tijñandai ndiyo nga tjimiꞌa ton chje.

³⁶ꞌBa kionga xutabiu kjintꞌe nga nkjin xuta inyafaꞌa, tsiningiya mé= xi tjima.

³⁷ꞌBa kikꞌinre nga Jesús xi tseꞌe Nazaret tifaꞌa kio.

³⁸ꞌBa meni kiskiꞌndaya nga kitsu: —¡Ji Jesús, ntjere David, chanima kakunnaa̱!

³⁹ꞌBa xuta xi tjentitjun jatiko, tuxi kꞌuejñaxiuni, tunga tu ngisa= ꞌñu kiskiꞌndaya nga kitsu: —¡Ji ntjere David, chanima kakunnaa̱!

⁴⁰ꞌBa kio Jesús tsakasenꞌñu, ꞌba ꞌexa nga kuechjaꞌa xuta ko. ꞌBa kionga je jaꞌe, Jesús tsiningiyare:

⁴¹—¿Mé= xi mejénri nga saꞌaa̱n ngatꞌa tsiji? ꞌBa xuta ko kitsure: —Naꞌen, mejénna̱ ku̱atsejen nganina̱.

⁴²ꞌBa Jesús kitsure: —Ngatjamatsejenri. Ngatꞌa kuakjainri, kui kjua kuandani.