Lucas 18:14-42

¹⁴Tsemi noqa niyaq: Contribusion cobraq nunam wayinman cuticorqan jutsanpita perdonashqana; peru fariseoqa, manam. Porqui pipis alli tucoq caqqa, penqacushqan canqa; y qollmi shonqu caqqa, alli presisaqmi canqa.”

¹⁵Tsepitanam nunacuna ñushpi wamrancunata Jesusman apayarqan yatar bendisinanpaq. Peru tseta riquecurnam, disipuluncuna wamra apaqcunata piñapäyarqan.

¹⁶Tsenam wamracunata qayecur, Jesus nerqan: —¡Noqaman wamracuna shayämutsun! Ama michäyëtsu. Que wamracunano caqcunapaqmi Diospa mandaquinenqa.

¹⁷Rasonpam niyaq: Sitsun Diospa mandaquininta que wamracunano mana chasquiyanquitsu, manam pepa mandaquininman yecuyanquitsu.

¹⁸Tsechonam Jesusta juc wiraqtsa queno taporqan: —Alli mayestru, wac bidacho wiñepa cawanäpaq, ¿imatataq rurashaq? —nir.

¹⁹Jesusnam yasquerqan: —¿Imanirtaq ‘Alli nuna’ nimanqui? Jucllellam alleqa, y tseqa Diosllam.

²⁰Dios mandacushqancunata qamqa musyanquim: ‘Majayoq quecar, ama jucwan jucwanqa yachacunquitsu; nuna mayiquita ama wanutsinquitsu; ama suwacunquitsu; ama nuna mayiquipaq ulicurcur mana caqta parlanquitsu; tëtequita, mamequita respetanqui’.

²¹Tsenam tse capoqyoq nuna nerqan: —Wamra quenïpitam tsecunataqa llapanta cumplicä —nir.

²²Tseno niptinnam, Jesus queno nerqan: —Tseno captenqa, jucran pishin: Canan ewar llapan imequicunatapis rantiquicur, tse qelleta wactsacunata qoyquï. Tseno ruraptiquim, sielucho mana ushacäcoq fortunequi canqa. Tseno rurarïcur, cutimur qatimë —nir.

²³Tseta wiyecurnam, tse presisaq nuna pasepa llaquicorqan, allapa ricu carnin.

²⁴Jesusnam tse nunata llaquishqata riquecur, queno nerqan: —¡Allapa sasam Diospa mandaquininman capoqyoq nunacuna yecuyänan!

²⁵¡Porqui mas alerim awjapa uchcunpa juc camellu pasarinman, juc capoqyoq nuna Diospa mandaquininman yecunanpitaqa! —nir.

²⁶Jesus nishqanta wiyecurnam, nunacuna tapuyarqan: —Tseno captenqa, ¿pillanataq salbaconqa! —nirnin.

²⁷Jesusnam nerqan: —Nunacuna rureta mana puediyanqantam Diosqa ruran —nir.

²⁸Tsenam Pedru nerqan: —Tëte, noqalläcunaqa llapantam jaqiriyarqö, qamta qatiyänaqpaq —nir.

²⁹Jesusnam pecunata nerqan: —Rasonpam niyaq: Pim jaqirenqa wayinta, warminta, wauqinta, papäninta, mamäninta, tsurincunata Diospa mandaquinincho cananrecur,

³⁰que cawenincho jaqiriyanqanpita mas atscatam Dios qoyconqa; y wac bidachoqa wiñepam cawanqa —nir.

³¹Tsenam Jesus chunca ishque (12) disipuluncunallata juc laduman qayarir nerqan: —Cananmi Jerusalen marcaman ewantsic. Tsechomi llapan cumplicanqa Diospa profetancuna willacuyashqanno, Diospita Shamushqa Nunawan.

³²Diosman mana marcäcoq nunacunapa maquinmanmi marca mayincuna entregayanqa. Pecunanam toqapur tuquïta asharnin, burlacuyanqa.

³³Allapa maqarninnam, wanutsiyanqa; peru quima junaqllatam cawarimonqa —nir.

³⁴Tseno niptinpis, disipuluncunaqa manam ni imata cäyiyarqantsu; ni musyayarqantsu imapaq Jesus parlashqanta “¿Imataraq queno parlar nimantsic?” nishpam, niyarqan.

³⁵Jerico marcaman Jesus disipuluncunawan yecurëcayaptinnam, näni cuchuncho juc wiscu llimushnata mañacur tëcarqan.

³⁶Atsca nunacuna pasaqta mäcurirnam, tse wiscoqa tapucorqan: —¿Imataq pasacun? —nir.

³⁷Nunacunanam willayarqan: —Jesus Nazaret marca nunam que nänipa sharëcamun —nir.

³⁸Tsenam wiscoqa fuertipa qayaquicorqan queno nishpa: —¡Davidpa castan Jesus, ancupëcallämëri! —nir.

³⁹Tsenam puntancunata ewaq nunacuna upällatsita munar wiscuta piñapäyarqan, peru wiscoqa masran queno nir, qayaricachäcorqan: —¡Davidpa castan Jesus, ancupëcallämëri! —nir.

⁴⁰Jesusnam tseta wiyecur, shäcurir, “Taqe nunata pushayämï” nerqan. Pushariyaptinnam, Jesus taporqan queno nishpa:

⁴¹—¿Imata ruranätataq qampaq munanqui? —nir. Wiscunam nerqan: —¡Ricachaquitam munallä, Teyta! —nir.

⁴²Jesusnam nerqan: —Canan riquë. Noqaman marcäcamurmi, cachacärerqonqui.