Luka 18:14-42

¹⁴Sizə deyirəm ki, o farisey yox, vergiyığan evinə saleh sayılaraq getdi. Çünki özünü yüksəldən hər kəs aşağı tutulacaq, özünü aşağı tutansa yüksəldiləcək».

¹⁵Adamlar körpələri də İsanın yanına gətirirdilər ki, İsa onlara toxunsun. Bunu görən şagirdlərsə onlara qadağan etdilər.

¹⁶Amma İsa uşaqları yanına çağırıb dedi: «Uşaqları buraxın, qoy Mənim yanıma gəlsinlər! Onlara mane olmayın! Çünki Allahın Padşahlığı belələrinə məxsusdur.

¹⁷Sizə doğrusunu deyirəm: kim Allahın Padşahlığını bir uşaq kimi qəbul etməsə, oraya əsla daxil ola bilməz».

¹⁸Rəhbərlərdən biri İsadan soruşdu: «Ey yaxşı Müəllim, mən nə etməliyəm ki, əbədi həyatı irs olaraq alım?»

¹⁹İsa ona dedi: «Mənə niyə yaxşı deyirsən? Tək Allahdan başqa yaxşısı yoxdur.

²⁰Onun əmrlərini bilirsən: “Zina etmə. Qətl etmə. Oğurluq etmə. Yalandan şahidlik etmə. Ata-anana hörmət et”».

²¹Bu adamsa dedi: «Bunların hamısına gəncliyimdən bəri riayət edirəm».

²²İsa bunu eşidib ona dedi: «Sənin bir şeyin çatışmır: nəyin varsa, satıb yoxsullara payla. Onda göylərdə xəzinən olacaq. Sonra qayıt, Mənim ardımca gəl».

²³Amma bu sözləri eşitdikdə həmin adamı dərin kədər bürüdü, çünki çox varlı idi.

²⁴İsa onun dərindən kədərləndiyini görəndə dedi: «Var-dövləti olanların Allahın Padşahlığına daxil olması nə qədər çətindir!

²⁵Doğrudan da, dəvənin iynə gözündən keçməsi varlı adamın Allahın Padşahlığına daxil olmasından asandır».

²⁶Bunları eşidənlər dedilər: «Elə isə, kim xilas ola bilər?»

²⁷O isə dedi: «İnsan üçün qeyri-mümkün olan, Allah üçün mümkündür».

²⁸Peter isə dedi: «Bax biz hər şeyi qoyub Sənin ardınca gəlmişik».

²⁹İsa onlara dedi: «Sizə doğrusunu deyirəm: Allahın Padşahlığı uğrunda ya evini ya arvadını ya bacı-qardaşlarını ya ata-anasını və yaxud uşaqlarını atan elə bir kəs yoxdur ki,

³⁰bu dövrdə bundan neçə qat artıq, gələcək dövrdə isə əbədi həyat almasın».

³¹İsa On İki şagirdi kənara çəkib onlara dedi: «Bax Yerusəlimə qalxırıq, Bəşər Oğlu üçün peyğəmbərlər vasitəsilə yazılanların hamısı tam yerinə yetəcək.

³²Çünki O, başqa millətlərə təslim ediləcək. Onlar Onu ələ salıb təhqir edəcək, Ona tüpürəcək

³³və qamçılayıb öldürəcəklər. O, üçüncü gün diriləcək».

³⁴Amma şagirdlər bu sözlərdən heç bir şey başa düşmədilər. Bu sözlər onlar üçün gizli saxlandı və onlar deyilənləri anlamırdılar.

³⁵İsa Yerixoya yaxınlaşanda bir kor adam yol kənarında oturub dilənirdi.

³⁶Yanından çoxlu adamın keçdiyini eşitdikdə soruşdu: «Nə olub?»

³⁷Ona xəbər verdilər: «Nazaretli İsa buradan keçir».

³⁸Onda o qışqırdı: «Ey Davud Oğlu İsa! Mənə rəhm elə!»

³⁹Qabaqda gedənlər ona qadağan edib susdurmaq istəsələr də, o «Ey Davud Oğlu! Mənə rəhm elə!» deyə daha ucadan bağırdı.

⁴⁰İsa dayanıb əmr etdi ki, onu yanına gətirsinlər. Adam yaxınlaşarkən İsa ondan soruşdu:

⁴¹«Nə istəyirsən, sənin üçün edim?» O dedi: «Ya Rəbb, gözlərim açılsın».

⁴²İsa ona dedi: «Qoy gözlərin açılsın, imanın səni xilas etdi».