Luka 18:14-42

¹⁴Motong la Yesu iyei ne, “Awete pang nen. Ye kene tani in tool ke sodaningi pat in imulu a ila pang rumu ki nga, ngan ya taleu in la Maro ikamata ben ya in tool noonoonoo ye matana i. Bong tool san in tiap, yesoo sei tool yo ya taunu iyitmaki le ilo ete i, in ole Maro itaru le idu lopo ni. Bong sei tool yo ya taunu itaru le idu lopo i, in ole Maro iyitmaki le ilo ete ni.”

¹⁵Di tooltool tikap di natudi yo kakase nga, ngan a tise pang ye Yesu be se ipaloko baene lo kutodi, inbe ipamede di ye betanga dook mata. Ngan le di galiunu tikamata di, le nga tipasak pang di a tisoror di.

¹⁶Bong Yesu ikiu di kakase tina a timan potai ye, inbe iwete pang di galiunu nen, “Ai, kin kasoror di kakase ngan be! Bong kamalum pang di a timan pang yau, yesoo di tooltool yo be lo tigaua ye di tooltool yo Maro be matan kala di nga, ngan dawa ben di kakase tina nga.

¹⁷Awete pang moolmool nen, kumata le tool atu imalum pang Maro be iyei tool mai panga inbe matan kala dawa ben di kakase tina ngan tiap nga, ngan o ke be lo igaua ye di tooltool yo Maro be matan kala di, ngan tiap.”

¹⁸Motong la tool kuto mai atu in itoro Yesu nen, “Pannoongoo, ong in tool dook mata. Nga be atorong, ole ayeie soo so, a be nen ngan akaua yepongo dook mata yo taukan motingi in nga?”

¹⁹Motong la Yesu iraua betanga ki nen, “Nga yelei be kukiu au ye tool dook mata nga? Idi nga tool sa yo dook mata, ngan tiap, bong Maro ya taleu in la dook mata i.

²⁰Ong in lom galanga ye ger yo Maro ikap pang Mose ngan oo. Ger tina ngan iwete nen: kin kuyei bauk be, inbe kin kuraumata di tooltool be, inbe kin kupinoo be, inbe kin kusopo koom ye betanga doko be, inbe kuraua pang tamam le tinam a kulongo betanga kidi.”

²¹Motong la tool ene mai tani iyei ne, “Ye kene yo au kase go le se nookoot au mai nga, ngan atoo ger tina yo kuwete ngan le imot.”

²²Ngan Yesu ilongo betanga ki yo iwete nga, motong la iwete mulu panga nen, “Dook mata, bong so atu la kuyeii tiao i. Ngan nanga, ole kuyawar so kiong le imot, inbe kop pat ki a kop pang di tooltool yo ballingadi tiap nga. Kumata le be kuyei nen nga, ngan la be pang dama ni ngan Maro ole ikap so dook mata yo iken ye malala ki ngo pong nga. Ngan kuyei nen a imot, lo ngan be kuman man kutoo au.”

²³Ngan tool tani in ilongo betanga tina yo Yesu iwete nen nga, le lon modoko ye san, yesoo ya in tool ballingana le so ki alunu san.

²⁴Yesu matana pang ye tool tani, inbe iwete nen, “Atoo! Di tooltool yo ballingadi nen nga, ngan ole urata mai pang di be tilo tigaua ye di tooltool yo Maro be matan kala di nga.

²⁵Le moolmool, kumata be asara mai ke solanga burum yo ene kamel i, in ikapye be idewe ye sar gumono mitiap in nga, ngan ole yelei, urata imoo panga, too? E, moolmool! Ngan ole gaongo leu, kumata le tool yo ballingana in lono be ilo igaua ye di tooltool yo Maro be matan kala di nga, ngan ole urata imoo panga nen lapau.”

²⁶Ye kene tani in di tooltool tina yo tiye di tiyepe nga, ngan tilongo tina yo iwete nen nga, le nga titoru nen, “Ona tiap! Be nen nga, ngan ole sei tool be Maro ipamule ye so dook tiap yo be igarungu i?”

²⁷Motong la Yesu iwete pang di nen, “So yo nen nga, ngan imoo pang di tooltool le tisak ye. Bong be Maro nga, ngan so le imot ngan imarra panga le ke be isak ye tiap.”

²⁸Motong la Pita iwete panga nen, “Am nga amyege so kiam le imot sila ikino, inbe la amman be man amtoo ong nga.”

²⁹Ngan Yesu iwete pang di nen, “Awete pang moolmool nen. Kumata tool atu be iyege rumu ki, too di toonoo le taini, too tamana le tinana, too di natunu, inbe man itoo au a iwetewete pang di tooltool ye dada yo Maro be matan kala di tooltool ki ye in nga,

³⁰ngan ole nookoot ye kene yo iyepe ye tana i nga, ngan Maro ole ikap wele so dook mata panga le illos so ki yo iyege koot nga. Inbe pang dama ni nga, ngan ole ikaua yepongo dook mata yo taukan motingi i.”

³¹Motong la Yesu ikap di galiunu tina yo sangaul be ru nga, ngan a iye di leu tila manga mooloo kasin la iwete pang di nen, “Kapalongo, nookoot nga be talo pombe Yerusalem nga, ngan ole so tina le imot yo muku ngan di Maro koonoo tiwodo betanga ki a iken ye rau be ole pombe pang ye Tool Moolmool ke Maro nga, ngan ole kanono pombe moolmool.

³²Ngan talo ngan ole tisuketi la di tooltool yo tipa ye rara kidi Yuda tiap ngan baedi, a nen ngan tikan paseme, inbe tipalele sere ye a tikorokoronaii.

³³Inbe tikap koro a tiwalisi tinini ye, inbe tiraumate le imata. Bong ole iken ye ke ru, lo ngan be ye ke tol ki ngan ole imadit mulu ye ni ke matenge.”

³⁴Di galiunu tilongo tina yo iwete nen nga, ngan le lodi galanga dook ye betanga ki tina ngan punu tiap, yesoo betanga yo iwete nga, ngan punu iken mallangana pang di be nen ngan lodi galanga ye tiap.

³⁵Yesu iye di galiunu tipa le timan pombe potai pang malala mai Yeriko nga, ngan titauarai tool mata kis atu yo iwurur dada gigini a igaugau pat le so ye di tooltool be tikap panga i.

³⁶Ngan ilongo di tooltool malala mai tina yo koodi ngaungaube a tise a be se tikapusu nga. Le nga itor nen, “Ai, di tooltool nga tiyei soo?”

³⁷Ngan tiwete panga nen, “Ona, Yesu ke Nasaret la ipa a ise i, ngan be ikapusong.”

³⁸Motong la tool mata kis tani in koonoo le mai nen, “Yesu, ong in Dawiti natunu. Lom pau a kulonau!”

³⁹Le nga di tooltool tina ngan kapala yo timuku nga, ngan tipasak panga a tilele be koonoo dookoot. Bong ngan tool tani in koonoo le mai mulu nen, “Atoo, Dawiti Natunu, lom pau a kulonau!”

⁴⁰Motong la Yesu ikodo, inbe iwete pang di tooltool tina ngan atu be idede a iman pang ye. Tool mata kis tani in iman potai ye Yesu, motong la Yesu itoru nen,

⁴¹“Ai, soo so lom be ayeii pong i?” Ngan tool mata kis tani in iyei ne, “Tool Mai, au i lok be matak rere a akamata ni.”

⁴²Motong Yesu iwete panga nen, “Ole kumata ni mulu. Ngan lo medana kiong yo kutaru i, in la ilonong a ikaratong le matam dook mata i.”