LUKA 18:14-42

¹⁴Yesu kawalongela, “Ija imuwila kodi kabwela ukae yopetigwa kutenda gamnogele Mulungu kubanza ija Imfalisayo. Kwavija munhu yoyose yokiinula mwenyego kohumuluswa, na ija yoihumulusa mwenyego kokwinuligwa.”

¹⁵Wanhu wamgalila Yesu wana zao wadodo yawekile makono yawamoteze. Wanahina zake viwawawene wotenda vija, wawakomhokela.

¹⁶Ila Yesu kawakema iwana kumwake kalonga, “Walekeni wana wadodo weze kumwangu, sambimuwagomese. Kwavija Undewa wa Mulungu una wanhu wali kamba wano.

¹⁷Nowalongeleni ikweli! Munhu yoyose yahaleka kuubokela Undewa wa Mulungu kamba viyali mwana mdodo havidahika kuwingila.”

¹⁸Mkulu imwe wa Wayahudi kamuuza Yesu, “Mkulufunzi Unogile, nhende choni kileka mana niuhale ugima wa digunge?”

¹⁹Yesu kamuuza, “Habali ung'hema nie ninogile? Haduhu munhu yanogile ila Mulungu yeiyeka.

²⁰Kuzitanga ndagizi? ‘Sambiutende ugoni, sambiukome, sambiwibe, sambiulave usindila wa uvwizi, wahishimile tataako na mamaako.’ ”

²¹Ija imunhu kalonga, “Gano gose nigatenda songela ning'hali mdodo.”

²²Yesu viyahulike gano kamulongela, “Kusigaza kinhu kimwe chuulondigwa kutenda. Guza vinhu vose vuulinavo na zihela uwagwelele wakumbulu, avo kowa na ngama kuulanga, abaho, wize ung'holeleze.”

²³Ila munhu ija viyahulike gaja, kanyunguala ng'hani kwavija kakala na mali bwando.

²⁴Yesu kamulola, abaho kalonga, “Vino vivo vondaviwe vidala wagoli kwingila Muundewa wa Mulungu!

²⁵Vibuha ngamia kubita mkizonzo cha shindano kubanza mgoli kwingila Muundewa wa Mulungu.”

²⁶Wanhu wagahulike gano wamuuza, “Avo yalihi basi yondayadahe kukomboligwa?”

²⁷Yesu kawalongela, “Gaja hagadahika mwa wanhu ha Mulungu godahika.”

²⁸Abaho, Petulo kamulongela, “Lola! Tweye tuleka vinhu vetu vose, tukukweleleza gweye.”

²⁹Yesu kawalongela, “Nowalongela ikweli, munhu yoyose yalekile kae, ama mtwanzi wake, ama wandugu, ama watata na wamama, ama wana sama ya Undewa wa Mulungu,

³⁰kobokela vinhu bwando ng'hani mkipigiti kino, na kubokela ugima wa digunge mkipigiti kikwiza.”

³¹Yesu kawagala wanahina zake longo dimwe na wabili hamgwazo, kawalongela, “Tegelezeni! Tokwela Yelusalemu, aho kila kinhu chawandike wahokozi kinilonga nie, Mwana wa Munhu, chovikila.

³²Nogeligwa mmakono ga Wamhazi awo wondawanitendele uponela, woniliga na kunitemela mate.

³³Wonilanha, abaho, wonikoma, ila mdizua da ikadatu nozuka.”

³⁴Ila wanahina zake hawazimanyile mbuli zija. Nhegulo ya mbuli zija ikala ifisigwa kumwao, na hawagamanyile gaja gayawalongele.

³⁵Yesu viyakalile behi na wambo da Yeliko, kukala na kimbugumbugu imwe yakalile mumgwazo wa inzila yopula.

³⁶Viyahulike dale da wanhu dobita, kauza, “Kuna choni?”

³⁷Wamulongela, “Yesu wa Nazaleti kobita.”

³⁸Kenula dizwi yolonga, “Yesu, Mwana wa Daudi, nyonela bazi!”

³⁹Wanhu walongole wamkomhokela wamulongela yanyamale. Ila heyo kagendelela kwinula dizwi kulu ng'hani, yolonga, “Mwana wa Daudi, nyonela bazi!”

⁴⁰Avo Yesu kema, kawalagiza wamgale hamwake ija imunhu kimbugumbugu. Viyavikile behi, Yesu kamuuza,

⁴¹“Kolonda nikutendele choni?” Na heyo kamwidika, “Mndewa, nolonda kulola kabili.”

⁴²Yesu kamulongela, “Lola! Nhamanila yako ikuhonya.”