1Eme jaŋe ŋeku mâmâc sasawa faharerâ Jesu Pilatorao barambiŋ.
2Erao domahuc kecʒiŋuc muhuc qorickembiŋ: “Ŋic kecʒirec fuŋne ʒiŋuc fokac, e ŋic mâmâc sasawa ɋâiŋ‐jopaekac, ehuc Roma ŋicwofuŋte takesi moneŋ mi râeniŋte muac‐jopaekac, erâ wâc e jahacnere ʒiŋuc muekac: No Kristo ŋicwofuŋ.
3Eme Pilatozi wiocnerâ muwec: “Go Judaŋic jaŋere ŋicwofuŋ me?” Eme Jesuzi muwec: “Ine hâcne mukomec.”
4Mume Pilatozi taha bapa micne â ŋic guru sâko mâmâc jazarâ muwec, “No ŋic ʒirec kiŋ basakopac.”
5Eme jaŋe fotarierâ mujâmbâŋkehuc mumbiŋ: “E jâmbomac ŋic qafeŋ‐jopame dâŋticnezi mâreŋ‐nâŋecko haŋ bafâreekac. E Galilaia mâreŋkonecteaŋ fuŋkerâ ewareku ʒira Judaia mâreŋko ijaha eekac.”
6Iŋuc mupie Pilatozi wio‐jarerâ muwec, “Ŋic e Galilaia mâreŋkonec me?”
7Eme “ine hâcne” mupie Jesu e Herodere gie gaŋkonec, iŋuc manarâ mume Heroderao barambiŋ. Herode e dameŋ ira Jerusalem haeo juwec.
8Herode e Jesu honerâ bune biaŋkewec. E Jesure biŋe gâbâ manahuc honeocte boc ecne jujec. Erâ wâc mâsi moc bame honeocte aŋac focnewec.
9Eme Jesu dâŋ fuŋne fuŋne wiocneme okacne moc mi bâtikiecnewec.
10Ehame taha bapa micne â miti qaqazu jaŋe qoricke sanaŋkehuc domambiŋ.
11Eme Herode â momorifâcne jaŋe Jesu sâckehuc ʒoraŋ ecnembiŋ. Ehuc Herodezi mume Jesu ŋicbomboŋ ŋaqi moc hecnepie hume Pilatorao mocwâc bârisiembiŋ.
12Eme ʒoaŋ gie bapa ira Pilato â Herode jahe ââgo epic, mârâc jaha ine kikisâ ehuc jupic.
13Pilato e taha bapa micne â ŋic fekicne â ŋic omane jaŋe mâmâc hefârec‐jopame fisimbiŋ.
14Eme ʒiŋuc jazawec: “Ŋoŋe ʒiŋuc muhuc ŋic kecʒi norao barâ warembieŋ: ‘E ŋic qafeŋ‐jopaekac.’ Eme noni ŋoŋere maio fuŋne‐ticne bataniŋkepe fâri tâmiric ejec.
15Herodezi iŋuc jaha erâ mume mocwâc bârisierâ bawareŋgopieŋ. Manaŋgopieŋ, kiŋticnezi hâmocte sâc mi bâfuakac,
16irec mupe momori jaŋe kâcbiŋzi qapie firuepemu.”
17Kia e hombaŋ dameŋko ŋic moc firue‐jare jujec hâcne.
18Jaŋe ine micne mic sâc owackerâ mumbiŋ, “E arictac eoc, Baraba ine firue‐nârec.”
19Baraba eki ine ŋic gâcne jaŋehec ʒika qahuc ŋuc moc qâhâmome kâpâcwâru ficko râembiŋ.
20Eme Pilato e harierâ jazawec, “No Jesu firuepemu i!”
21Mume jaŋe hahaŋne bahuc mumbiŋ, “Maripoŋko hâmooc, maripoŋko hâmooc!”
22Eme Pilatozi qatara‐jarehame jahec â moc eme jazawec, “Wemo sâqocne bawecte? No manape kiŋticne hâmocte sâc mi ekacte mupe kâcbiŋ sawa kirâ juzejec.”
23Eme jaŋe fota qatarierâ micne mic ʒereŋ musereckerâ owackehuc mumbiŋ, “Maripoŋko hâmooc.” Murâ qâsifu sâko qarâ fetone fehuc kiare dâŋ bawahambiŋ.
24Eme Pilatozi dâŋ mumbiŋ irec fârine fuaocte mutarawec.
25Ehuc dâŋjeŋic reŋkerâ qaqafeŋte â ʒikare kâpâcwâruo râekicne ŋic e firue‐jarewec â Jesu ine qikiŋne‐jarewec.
26Jaŋe Jesu baraku hatao ŋic moc bâfuambiŋ, ʒâŋene Simoŋ, Kirene hae mâreŋkonec. E gieonec wareme rorâ Jesure maripoŋ ɋawenao râepie hâporâ Jesure râpefuŋko rawec.
27Erâ ŋic ŋokac guru sâkozi bâjâpembiŋ. Ehuc ŋokac jaŋe kio wâwâsic â mu mamakuc ecnembiŋ.
28Epie Jesuzi fotikierâ ʒiŋuc jazawec: “Jerusalemnec ŋokac bureŋ, ŋoŋe nore mi kioniŋ. Ŋoŋe â naru motecfâc‐ŋeŋic ŋaŋacne kioniŋ.
29Manaŋgopieŋ, juku dameŋ moc maickeme ʒiŋuc munʒoŋgopieŋ: ‘Oi, ŋokac hufiŋne â me sawane jaŋe iŋucne junʒapeŋ me!’
30Eme dameŋ ira tiki jaŋere ʒiŋuc muniŋmu: ‘Ŋoŋe herickerâ waha ŋefac‐nâponiŋ’, â hârâc jaŋere muniŋmu, ‘Ŋoŋe fâuckerâ bârâraŋ‐nâponin’.
31Wiac ʒiŋucne jâc ɋâricne ecneŋgopieŋko hâmocne weniŋuc ecnezo?”
32Eme sâqocne bapa jajahec ehec mâmâc jopaniŋte bacjopa rambiŋ.
33Eme raku mâreŋ moc ʒâŋene Utusiec ira fisirâ Jesu maripoŋko qambiŋ, â sâqocne bapa moc ŋifec â moc ŋifec mâmâc jofambiŋ.
34Eme Jesuzi numuhuc muwec, “Mamac, jaŋe wiac eŋgopieŋ i fuŋne kâuc baŋgopieŋte kiŋjeŋic behec.” Momori jaŋe ine ŋaqi‐ticnere jaŋaczia ɋâsâi qapie âke fuac‐jopame sâc rauckembiŋ.
35Ŋic ine wemo afecne ijaha domahuc wiac hone‐fârembiŋ. Ehuc ŋic fekicne jaŋe sâke itic ecnehuc mumbiŋ, “Gâcne bafic‐jopaweczi e jahacne sahac bafickeoc me! E Kristo Anuture joroc jukacko iŋuc eoc me!”
36Momori jaŋe iŋuc jaha mu ruruc ecnembiŋ, ehuc waiŋ opâ ʒaʒacne sicnecnehuc mumbiŋ:
37Go Judaŋic jaŋere ŋicwofuŋ jukomecko sahacge ŋezickec me!”
38Eme Jesure qizec botâŋko dâŋqâreŋ ʒiŋuc râembiŋ: “Ʒi Judaŋic jaŋere ŋicwofuŋ.”
39Eme sâqocne bapa moczi maripoŋko domahuc bafic‐joparâ sâke kiki ecnerâ muwec, “Go iŋucnezi Kristo me? Murâ gahacne sahac batararâ nâhe mâmâc batarac‐nâfoc.”
40Iŋuc mume âgonezi dâŋ mucnehuc muwec, “Go ʒikare biŋe mâmâc ekicnezi Anuture mi hâwicguha iŋuc mukomec?
41Nâhâc kiŋnâhecte sâcko wiac sâcne enâctekicne, ŋic kecʒizi ine sindaŋ moc mi ewec.”
42Iŋuc murâ muwec, “Jesu, go Wofuŋ tâpirigehec juku fisirâ nore manasuzemec.”
43Mume Jesuzi ʒiŋuc âzâcnewec: “No jâmbomac gazape, miŋecgac jaha nohec Paradisio jucmu.”
44Eme 12 kilok ehame ʒoaŋ gâpâreme dapâc fuarâ mâreŋ sâckerâ fohame 3 kilok ewec.
45Ehame taha ufuŋko qoruc ââketâc sâko ʒâʒâŋiŋ jaha hâŋ fâucke waharâ qatarawec.
46Eme Jesu e wiwic jaha wirahuc muwec, “Mamac, megao maŋ qâqâtâc‐nane râekopac.” Iŋuc murâ hâmowec.
47Eme momori soŋaŋzi wiac i hone manac efârerâ Anutu mumbiaŋkehuc muwec, “Ŋic kecʒi e jâmbomac bahacmâc.”
48Erâ ŋic gâcne sâko wiac hone aŋac eniŋte fisimbiŋ jaŋe wiac i sasawa hone manac erâ maŋjeŋiczi tutuc qajarehame risiembiŋ.
49Jesu e jahacne wiacfâc â Galilaia mâreŋkonec ŋokac bâjâperâ warembiŋ jaŋe ine taicko domahuc wiac hone manac embiŋ.
50Ŋic moc juwec, ʒâŋene Josefe; hae‐ticne Judaia mâreŋko ŋewec, ʒâŋene Arimataia. Ŋic e micne sâko jumbiŋ jaŋere guruonec, erâ e ŋic wamane â tiŋne.
51Âgofâcne jaŋe Jesu dâŋ qacnehuc ʒikao râepie maname mi sâckewec, erâ e Anuture uucmaŋ fua tâcneocte woŋec juwec hâcne.
52Ŋic eki hâcne Pilatorao rarâ Jesu qâŋɋâŋ‐ticnere âzâcnewec.
53Eme manacneme ra maripoŋkonec batararâ qoruc qaŋqaŋzi râpâckerâ bararâ qânâ hâŋko hawec ʒâŋeruŋte biŋe gufukicne ira Jesure qâŋɋâŋ râewec. Hawec i furu fowec, ira mârâc jaha qâŋɋâŋ moc mi râekicne.
54I ʒaʒawie dameŋte owâ gieo fuawec, sabata hombaŋ maickezo eha.
55Ŋokac tucne Jesuhec Galilaia mâreŋkoneŋ warembiŋ jaŋe Josefe bâjâpehuc honehapie Jesure qâŋɋâŋ ʒâŋeruŋko râewec.
56Eme wiac hone‐fârerâ haeo risierâ wokemaŋ âsu biaŋ â kâŋâ wiac bâmockembiŋ. Erâ sabata hombaŋko sâcmutâc dâŋ reŋkehuc ŋemanambiŋ.
