Luk 18:14-42

¹⁴Eno dagebolo obao, e bidi aga beba ma peyu, Godigo aga yali dwai sę sela sąwai bidi dao. U Farisi hani bidi te tiwai menio. Mena bidigo te aga nogi me ugwaba sobaso, Godigo te bidi aiyaba elaluaibao. Ma, mena bidi imilasa bidibaso, teda Godigo te bidigo nogi ugwaba saibao,” Jisasgo te po wali.

¹⁵Te we bidi augwa wai puluba Jisas pageba magasali. Augwaligo agabolo te po wai hagede, ‘Nago nogo e wai puluba tobolude munama, bugagia bidabo po wao.’ Tiali goli, te Jisas wali pabo bagego te wai puluba dabe sela asobo sulama, tama te we bidibolo “Te sę ebo tagalao” po wali.

¹⁶Tiali goli, Jisasgo te wai puluba aga pageba i wali, te aga wali pabo bidi dabebolo te po wai, “Te wai puluba enaba asomainao. Tagala wagio. Eno wabo po e wai pulubago odalio. Te baso augwaligo ena tia sali. Tama te tobage homu ebo we bidi augwali Godigo we bidi tonalubo madigi tomoba asagameo. Konealuao.

¹⁷Ogwa dali wegi dali augwaligo Godigo wabo po odama, tia sali. Tama te tobage homu isąwai we bidi augwali Godigo we bidi tonalubo madigi tomoba pogobeo,” Jisasgo te po wai.

¹⁸Te Juda dabe tomode bidai nogi yai bidi me Jisas pageba asali. Agai Jisas hanalu wali, “Po ola mabo dwagi yai bidi, eno mena sę ebaso, ena tigidali sogo bidibo ula selama bidaibawe, ma gamonabo ula selama, bidada paibawe?” wali.

¹⁹Tama Jisasgo te bidigo po wei ponoyu, te po hanalu wali, “Enabolo magi baso dwagi yai bidi waliwe? Te dwagi yai bidi me menio. Te God deli naga te dwagi yai bidi dao.

²⁰Nago te Godigo mani bomo yai po koneani. Te bomo yai po te da, penani sę egio, bidi ela mugio, bidi nai wi sigio, tibo po wagio, naga aya ida nogi ugwaba sao,” Jisasgo te po wali.

²¹Tama te nogi yai bidigo te po wei ponani, “Ao, ena gesi ogwade bidibadi, te bomo yai po te eno wali pabo gagalali. Tama wali pelama, megi me tama te pode me bidibao,” wali.

²²Te Jisasgo te bidigo wali po odama, tama agabolo te po wali, “Magi nai me deli elalubuo, te sę nago ebeo. Nago beba pelama, naga doado bage tigidali selama, maketba munama, tama gasa bidi dabego abelaibao. Tama te doado bagede sali mone sobaso, te nai meni yai we bidi dobayao. Nago te sę ebaso, Godigo bidibo madide nago doado bage hauwa mu elaluaibao, nosali. Tama nago te sę elama, nage ena wali asao,” Jisasgo te po wali.

²³Tiali goli, te nogi yai bidi agai Jisasgo wali po odama, aga homu sęgę mu yali. Magi baso meni. Agai sibage me, doado bage me, kisu delalubo, te nai tagalogobeo.

²⁴Tama Jisasgo te bidi aga homu sęgę mu ebo suyu, te po wali, “Te walu hauwa munalubo we bidi, sibage hauwa munalubo bidi, augwali Godigo bomo tomoba pai hagede, te moni sinabo sę mu yaibao, tabiaibao.

²⁵Te moni kibu kamel te ugwa hobolobo medabu agabele tomodu dula pabo si, teda sinabo sę eyu, tabigobeo, te masigi hauwa kisu munalubo bidi Godigo bomo tomo dologoba dula pai hagede, moni sę mu yaibao, tabiaibao,” Jisasgo te po wali.

²⁶Jisasgo wali po odali we bidi noma siyu, augwaligo aga hanalu, te po wali, “Tama tibaso, Godigo mena we bidi ma dobola somainogo usu yaibawe?”

²⁷Jisasgo te po wei ponani, “Te sę ebo, bidigo te sę yabo usu egobeo, te Godigo te sę ebo usu yaibao.”

²⁸Tama te bidi nogi Pita agai Jisasbolo te po wali, “Suao. Dago be dabe tagalama, nage wali asobao,” wali.

²⁹“Ao,” Jisasgo wali, “tama eno dagebolo e po obao, bidi mego aga be dabe, aga we, aga ama dede, aga ida aya, aga wai puluba tagalama, Godigo we bidi tonalubo sę tobade,

³⁰tama te bidigo te tagalali nai genuai mu ma saibao, e tǫde bidibo sogode. Agai nosali sabo nai te polobadu tagalali nai te edelaibao. Tama nosali aga bida bida paibao, gamonaibao,” Jisasgo te po wali.

³¹Te Jisasgo aga wali asobo bidi nogo si olama, sągą me badu si selama, augwali te we bidi tagalama, augwa tedali bidali. Agai augwalibolo te po wali, “Edao. Da Jerusalem be naniba pobao. Tama da tede bidibadi, te polobadu bidai bidi dabego enade asęani po mu po pedelaibao. Ena da Godigo Bidi Mu dao. Augwaligo te Godigo enade wali po asęani, te po mu po pedelaibao, Jerusalem be nanide.

³²Te Juda dabe augwaligo ena te Juda hani isąwai bagego nogoba mawaibao. Tama menama, te Juda hani isąwai bagego enabolo usu saibao, dwai po weyu, ena tigiba pesa sąwaibao.

³³Augwaligo kibu wali bigo ena tudi badu elaibao. Tama augwaligo ena ela muaibao. Tiali goli, giliga sela sogo elama, ena ma hodaluaibao, bidaibao,” Jisasgo te po wali.

³⁴Jisasgo te po olama, aga wali asobo bidi augwaligo te po page gisiga konebeo. Te po page geme dualali, tama Jisasgo magi naibolo waliwe augwaligo konebe.

³⁵Te Jisas tųdu pobadi yaide, te dwasianu taun nogi Jeriko te pąba sabolama, te gedu widai bidi deli te tų sesegede dulaluyu, masigi gonodu bidali.

³⁶Tama te gedu widai bidi agai te we bidi hauwa ela soabo u wabo odama, te po hanalu wali, “Magi ebawe?” wali.

³⁷Tama augwaligo agabolo wali, “Te Nasaret bulu bidi nogi Jisas ela sobao,” wali.

³⁸Te gedu widai bidigo i wali, “Jisas, te polobadu nogi yai bidi Devitgo Ogwa. Nage enade homu dene eyu, tau mao,” wali.

³⁹Te polalubo bidi dabe augwaligo agabolo “Te po tagalao, sagia sao,” wali. Tiali goli, agai bomonama ma i wali, “Devitgo Ogwa, enade homu dene eyu, tau mao.”

⁴⁰Tama tibaso, Jisas bilibo tagalali. “Te gedu widai bidi nogo tolasa asao,” wali. Tama te gedu widai bidi Jisas pąba asama, tama Jisasgo hanalu wali, “Nage eno magi sę emainuwe?”

⁴¹Te gedu widai bidigo po wei ponani, “Genuai Bidi, nago eno gedu ma dodolobaso, te eno gedu ma bulu ula bolo ma sueibao,” wali.

⁴²Tama Jisasgo te po wali, “Suao. Nago enade tia sobaso, nago gedu dwagi yai ma ilai dao,” wali.