LUKA 18:14-42

¹⁴Lau na hamaoromuimu, una tau na ena ruma e lou henia mai lalo ḡoevana ida; a hari Farisea tauna be lasi. Badina be sibona e heimodai tauna na baine baia, a sibona e hahemanau tauna na bae imodaia.

¹⁵Haida ese natudia karukarudia ia dekena e laohaidia, ediai baine dau kau eto; to hahediba ese e itadia, bena e gwaudia tubu.

¹⁶A Iesu ese e boiridia, eto, Memero-memero na dekegu aema, asio luludia; badina be enehetomadia na Dirava ena basileia taudia.

¹⁷Na hamaoromui momokanimu, ta ese Dirava ena basileia basine abia mero-mero na heto, ia na basine raka vareai unuseni ai.

¹⁸Lohia ta ese e nanadaia, eto, Hahediba taumu namona e, lau na mauri hanaihanai iabina be ede baina kara toma?

¹⁹Iesu eto, Dahaka dainai namogu o gwauraigumu? Ta dia namo, Dirava mo sibona.

²⁰Taravatu vada dibamu: Basio heuda hanai; Basio ala-ala; Basio henao; Basio hahebade koikoi; Tamamu sinamu ba matauraidia.

²¹Ia eto, Ene iboudiai vada na badinadia, maraḡigu negana amo.

²²Iesu una hereva e kamonai, bena e hamaoroa, eto, Oi na ḡau tamona mo o dabumu: emu kohu iboudiai ba ha hoi, ogoḡami taudia ba harihari henidia, guba kohuna bavabia; bena baoma, murigu ai bame raka.

²³Ia ese una hereva e kamonai, bena lalona e hisihisi bada, badina be ia na taḡa tauna.

²⁴Iesu ese e raraia, eto, Taḡa taudia na Dirava ena basileia iduarana ai bae heloge.

²⁵Kamelo na kobi matuna ai e vareaimu be haraḡa, a taḡa tauna na Dirava ena basileia lalonai baine vareai mai hekwarahina ida.

²⁶E kamonai taudia eto, Be, daika mauri baine davaria?

²⁷A ia eto, Taunimanima ese ikaradia asi dibadia ḡaudia na Dirava ese baine karadia diba.

²⁸Petro eto, Ai na emai ḡau iboudiai vada a rakatani, oi vada a ḡavamu.

²⁹Ia ese e hamaorodia, eto, Na hamaoromui momokanimu, ta ese ruma eiava adavana eiava tadikakana eiava tamana eiava sinana eiava natuna Dirava ena basileia dainai vada e rakatani,

³⁰ia na ina negana ai ḡau momo be abimu, bona nega gabena ai danu mauri hanaihanai baine abia.

³¹Ia ese gwauta-raruosi e hakaudia siri, e hamaorodia, eto, Ita na Ierusalem ta dara daemu, unuseni ai peroveta taudia ese Taunimanima Natuna sivaraina e tore guna herevadia na iboudiai anidia do bae vara.

³²Badina be ia na idau bese taudia ediai taona do bae torea; bae ḡonaḡonalaia; bae ihi-ihiraia; bae kanudia;

³³bae dadabaia; bae alaia mase; a dina ihatoina ai ma baine tore isi lou.

³⁴Ina idoinai na asi dibadia. Hereva e kamonai, to lalodia na asie parara; ia ese e gwaurai herevadia anidia na asie davari.

³⁵Ia na Ieriko e raka henia kahi. Mata-kepulu tauna ta dala isena ai helaina ai e noi hegameva;

³⁶hutuma dala amo e laova reḡedia e kamonai, bena e henanadai, reḡe anina be dahaka?

³⁷Idia ese e hamaoroa, eto, Iesu, Nasaret tauna, e raka hanaimu.

³⁸Bena ia na e boiboi, eto, Iesu, David natuna e, ame bogagu hisi.

³⁹Vairai e raka taudia ese e gwau henia, basine hereva eto; to ia na e boi lalo-dika, eto, David natuna e, ame bogagu hisi.

⁴⁰Bena Iesu vada e gini, eto, A hakaua mai. E raka kahi lao, bena Iesu ese e nanadaia, eto,

⁴¹Dahaka emu ai baina kara? Ia eto, Lohiabada e, matagu boma hapapa.

⁴²Iesu eto, Matamu be papamu; emu abidadama ese vada e hamaurimu.