SAN LUCAS 18:14-42

¹⁴Jesús huaniko̱lh li̱lhu̱hua̱ hua̱nti̱ antá̱ xkaxmatma̱kó̱ xtachihuí̱n: “Xli̱ca̱na̱ cca̱huaniyá̱n pi̱ yama̱ chixcú̱ hua̱nti̱ xpu̱qui̱na impuestos, acxni̱ yama̱ quilhtamacú̱ xlá̱ chilh c-xchic, Dios aya xma̱tzanka̱nanini̱t xtala̱kalhí̱n hua̱ntu̱ xlá̱ xtlahuani̱t, chu̱ ni̱ xahua̱ yama̱ fariseo hua̱nti̱ caj tlanca̱ xcatzi̱y c-xlacati̱n Dios. Sa̱mpi̱ hua̱nti̱ luhua xli̱ca̱na̱ tla̱n cristiano li̱ma̱xtucán xacstu, huata xlá̱ nalakmakancán; hua̱mpi̱ hua̱nti̱ li̱ta̱yay pi̱ ni̱tu̱ xlakasi, chu̱ kalhapalay pi̱ makla̱kalhi̱ná, huata xlá̱ nama̱tlanqui̱cán. Huá̱ chuná̱ cca̱li̱huanimá̱n sa̱mpi̱ hua̱nti̱ caj xacstu putzama̱ la̱ntla̱ natatlanqui̱y c-xlacati̱n Dios xalán ni̱ maka̱s tama̱ma̱xani̱y, chu̱ ma̱tu̱tzuhui̱cán; hua̱mpi̱ hua̱nti̱ ni̱tú̱ putzama̱ la̱ntla̱ natalacatla̱ni̱y huata caj li̱ta̱yay pi̱ ni̱tu̱ xlakasi, huata huá̱ chú̱ ti̱ Dios nama̱tlanqui̱y.”

¹⁵Maktum makapitzí̱n xli̱miniko̱y lactzu̱ xcamancán laqui̱mpi̱ Jesús naokspu̱huili̱ko̱y xmacán, chu̱ nasiculana̱tlahuako̱y; hua̱mpi̱ acxni̱ xli̱ma̱kalhtahuáka̱t ucxilhko̱lh, tzucuko̱lh lacaquilhni̱ko̱y hua̱nti̱ xli̱mima̱kó̱.

¹⁶Hua̱mpi̱ Jesús tasaniko̱lh lactzu̱ camán pi̱ calakminko̱lh, chu̱ chuná̱ huaniko̱lh xli̱ma̱kalhtahuáka̱t: —Luhua xli̱ca̱na̱ catlahuátit li̱tlá̱n, ni̱ cali̱huanikó̱tit tama̱ lactzu̱ camán naquilakminko̱y; sa̱mpi̱ Dios caj xma̱n huá̱ ma̱xqui̱ko̱y talacasquín natapaksi̱niko̱y c-xasa̱sti xtapáksi̱t hua̱nti̱ kalhi̱ko̱y xtalacapa̱stacnicán xta̱chuná̱ la̱ntla̱ lactzu̱ camán.

¹⁷Luhua xli̱ca̱na̱ cca̱huaniyá̱n, pi̱ caxati̱cahuá̱ hua̱nti̱ ni̱tlá̱n xtláhualh nama̱paksi̱y Dios la̱ cha̱tum xasma̱lhua actzu̱ kahuasa, ni̱ lay xlá̱ catitapaksí̱nilh c-xasa̱sti xtapáksi̱t tu̱ huili̱putún ca̱tiyatna.

¹⁸Maktum cha̱tum luhua tali̱pa̱hu chixcú̱ kalhásquilh Jesús: —Ma̱kalhtahuaka̱ná, huix luhua xli̱ca̱na̱ tla̱n catzi̱ya, ¿tú̱ luhua tla̱n tatlahu quili̱tláhuat laqui̱mpi̱ tla̱n nackalhi̱y yama̱ li̱pa̱xuhu latáma̱t c-akapú̱n hua̱ntu̱ niucxni̱ nalaksputa?

¹⁹Cha̱nchu̱ Jesús huánilh: —¿Tú̱huan quihuaniya̱ pi̱ quit luhua tla̱n ccatzi̱y? ¿Tú̱ catzi̱ya̱ pi̱ u̱nú̱ ni̱tí̱ anán hua̱nti̱ xli̱ca̱na̱ tla̱n huata caj xma̱n cha̱tum, huá̱ Dios?

²⁰¿Tú̱huan chi̱nchu̱ quili̱kalhasquina̱ xpa̱lacata tú̱ mili̱tláhuat? Sa̱mpi̱ huix catzi̱yatá̱ la̱ntla̱ huí̱ kampa̱ca̱hu li̱ma̱paksí̱n hua̱ntu̱ Dios macamá̱xqui̱lh Moisés; chuná̱ huan: ‘Ni̱ caxakatli̱ tanuj pusca̱t lapi̱ huí̱ mimpusca̱t; niucxni̱ tí̱ timakni̱ya; niucxni̱ tí̱ tili̱ya̱huaya̱ ta̱ksaní̱n; niucxni̱ tí̱ timakkalha̱nana; na̱ cama̱xqui̱kó̱ ca̱cni̱ mintzí, xa̱hua̱ mintla̱t.’

²¹Yama̱ chixcú chuná̱ kalhtí̱nalh, huá̱: —Xli̱pacs tama̱ hua̱ntu̱ huix quihuanípa̱t, hasta la̱ntla̱ actzu̱cú̱ xacuani̱t ctzucuni̱t ma̱kantaxti̱y.

²²Acxni̱ káxmatli̱ Jesús yumá̱, chuná̱ huánilh: —Tla̱n la̱ntla̱ huana, hua̱mpi̱ huí̱ a̱kampa̱tum hua̱ntu̱ tzanka̱nimá̱n mili̱tláhuat, casta̱t xli̱pacs tu̱ kalhi̱ya, chu̱ cama̱xqui̱kó̱ mintumi̱n hua̱nti̱ lakli̱ma̱xkaní̱n, laqui̱mpi̱ chuná̱ huix nakalhi̱ya̱ lhu̱hua̱ mintamacú̱n c-akapú̱n. Acxni̱ chú̱ chuná̱ natlahuako̱ya, tuncán natana laqui̱mpi̱ xli̱pa̱án naquista̱laniya.

²³Hua̱mpi̱ acxni̱ xlá̱ káxmatli̱ hua̱ntu̱ huánilh Jesús, yama̱ chixcú̱ luhua li̱puhua̱, sa̱mpi̱ luhua ma̱tamacu̱nú xuani̱t.

²⁴Acxni̱ úcxilhli̱ Jesús pi̱ li̱pe̱cua̱ xtali̱puhua̱ni̱ni̱t, chuná̱ huá̱: —¡Ca̱na̱ li̱pe̱cua̱ tuhua̱ xpalacata̱ hua̱nti̱ ma̱tamacu̱nú̱ natanu̱y c-xtapaksi̱t Dios!

²⁵Huata ni̱ xatuhua̱ xtánu̱lh tantum camello c-xlhucu li̱tzapan, ni̱ caj la̱ntla̱ pala cha̱tum ma̱tamacu̱nú̱ ti̱ lakcatzán xtumi̱n tla̱n natanu̱y c-xtapaksi̱t Dios.

²⁶Makapitzí̱n ti̱ xkaxmatko̱y hua̱ntu̱ xlá̱ huá̱, chuná̱ quilhtzucuko̱lh: —Lapi̱ chuná, ¿tí̱ chú̱ luhua naakapu̱taxtuy?

²⁷Jesús chuná̱ huaniko̱lh: —Xli̱ca̱na̱, hua̱ntu̱ xpa̱lacatacan chixcuhuí̱n, ni̱ lay ma̱tla̱ni̱ko̱y hua̱ntu̱ quit cquilhuama̱, hua̱mpi̱ hua̱ntu̱ xpa̱lacata Dios, pacs ma̱tla̱ni̱y xli̱pacs hua̱ntu̱ puhuán natlahuay, ni̱tú̱ tuhua̱ xpalacata.

²⁸Pedro chuná̱ huánilh: —Quimpu̱chinacán, quin pacs cakxtakmakani̱tahu hua̱ntu̱ xackalhi̱ya̱hu caj xpa̱lacata cca̱sta̱lanimá̱n.

²⁹Puschí̱ Jesús chuná̱ kálhti̱lh: —Xli̱ca̱na̱ cca̱huaniyá̱n pi̱ xli̱pacs hua̱nti̱ naakxtakmakán xchic, usu xtla̱t, chu̱ xtzi, usu xnata̱lán, usuchí̱ xpusca̱t, usu pala xcamán, caj xpa̱lacata kalhakaxmatputún Dios c-xtapáksi̱t,

³⁰pus huata tlak luhua lhu̱hua̱ hua̱ntu̱ nama̱xqui̱cán ni̱ xahua̱ la̱ tu̱ xkalhi̱y u̱nú̱ ca̱tiyatna, chu̱ na̱ nama̱xqui̱cán yama̱ latáma̱t c-akapú̱n hua̱ntu̱ niucxni̱ nalaksputa.

³¹Maktum Jesús caj tánu̱ ta̱anko̱lh kalhacu̱tuy xli̱ma̱kalhtahuáka̱t, chu̱ chuná̱ huaniko̱lh: “Huixín catzi̱yá̱tit pi̱ la̱nchú̱ ama̱hu c-Jerusalén laqui̱mpi̱ antá̱ nakantaxtuya̱chá̱ xli̱pacs hua̱ntu̱ tili̱chihui̱nanko̱lh profetas acxni̱ titzokko̱lh c-Li̱kalhtahuaka̱ hua̱ntu̱ naquiakspulay quit, Xatalacsacni Chixcú.

³²Pus antá̱ naquimacama̱sta̱cán c-xmacancan chixcuhuí̱n hua̱nti̱ a̱lacatanuj xalaní̱n hua̱nti̱ ni̱ judíos; xlacán naquili̱kalhakama̱nanko̱y, chu̱ cala̱huá̱ naquintlahuaniko̱y hasta naquilacachujmani̱ko̱y.

³³Tla̱n naquihuili̱niko̱y, chu̱ a̱li̱sta̱lh naquimakni̱ko̱y; hua̱mpi̱ caj xli̱aktutu quilhtamacú̱ naclakastakuanán ca̱li̱ní̱n.”

³⁴Yama̱ xli̱ma̱kalhtahuaka̱t Jesús ni̱tú̱ xatú̱ xakata̱ksko̱y hua̱ntu̱ xuaniputún xtachihuí̱n; xa̱huachí̱ hasta ni̱ pala tzinú̱ xcatzi̱ko̱y xatú̱ xpa̱lacata̱ chuná̱ xli̱ta̱chihui̱nama̱kó̱, sa̱mpi̱ yama̱ xtakalhchihuí̱n caj la̱ xatze̱k tachihuí̱n qui̱taxtuniko̱lh.

³⁵Acxni̱ Jesús lacatzuhuá̱ xlati̱lhay c-xaca̱chiqui̱n Jericó, cha̱tum lakatzí̱n xuí̱ c-xquilhpa̱n tiji, csquinima̱kó̱ limosna hua̱nti̱ antá̱ xlactla̱huanko̱y.

³⁶Acxni̱ xlá̱ káxmatli̱ pi̱ luhua li̱lhu̱hua̱ xtla̱huama̱kó̱, kalhasquiní̱nalh xatú̱ tla̱n xlama̱.

³⁷Pus huanica̱ pi̱ Jesús xala c-Nazaret antá̱ xlactla̱huama̱.

³⁸Acxni̱ xlá̱ káxmatli̱ hua̱ntu̱ huanica̱, chuná̱ quilhánilh: —¡Jesús, xquilhtzucut xamaka̱n rey David, caquinkalhi̱ni̱ talakalhamá̱n!

³⁹Hua̱nti̱ xpu̱lati̱lhako̱y c-tiji̱ tzucuko̱lh lacaquilhni̱ko̱y laqui̱mpi̱ nakatxtaka. Hua̱mpi̱ xlá̱ a̱tzinú̱ luhua li̱huacá̱ tzúculh quilhaniy: —¡Jesús, xquilhtzucut xamaka̱n rey David, catlahua̱ li̱tlá̱n caquilakalhámanti!

⁴⁰Jesús tachókolh, chu̱ ma̱tiyí̱nalh c-xlacatí̱n. Acxni̱ antiyá̱ lacatzú̱ xlakalaya̱, chuná̱ kalhásquilh:

⁴¹—¿Tú̱ lacasquina̱ nactlahuay mimpa̱lacata? Xlá̱ chuná̱ huánilh: —Quimpuchiná, quit clacasquín xaclacahuá̱nalh.

⁴²Jesús chuná̱ huánilh: —¡Pus la̱nchuj tuncán calacahuá̱nanti! Huix aya talacatla̱ni̱ni̱ta̱ sa̱mpi̱ xli̱ca̱na̱ ca̱najla, chu̱ quili̱pá̱huanti pi̱ tla̱n nacma̱pacsayá̱n.