1Jesu e Jeriko haeo fisirâ fotâcnezo ewec.
2Eme hae ira ŋic moc juwec, ʒâŋene Zakaio, e takesi roro jaŋere micne, erâ moneŋ mafa sâko‐ticnehec juwec.
3Eme ŋic eki Jesu hawari‐ticne honeocte ecnewec. Erâ e ŋic bembeŋnere ŋicŋondeŋko domahuc tiŋtiŋne‐bipiewec.
4Iŋuc erâ gagasac jaha ŋic jowaru‐fârerâ ra nemuja hahaŋko ferâ ŋehuc ʒiŋuc muwec: “Jesu ʒira ware rame honepe.”
5Eme Jesu e ira fisirâ fime feme honerâ ʒiŋuc âzâcnewec: “Zakaio go picpac wahac, no miŋecgac ficgao iqicgupemu.”
6Mume izia picpac jaha waharâ bubiaŋ manahuc ficticnao jowame fepic.
7Eme ŋic sasawa jaŋe i honerâ mana sâqorerâ mumbiŋ, “E wemocte ŋic sâqocnere ficko fejec fokac.”
8Zakaio eki ine Jesure maŋfuŋko rarâ muwec: “Manakic, Wofuŋ, moneŋ mafa‐nane sâckoa bâtâc barâ tucne ŋic hapetac jarepemu, â ŋic gâcne moneŋ sâc jâuruhuc jowac ropo ine ropo sâc i fohame baferâ okacne bazu‐jarepemu.”
9Eme Jesuzi muwec: “Ŋic kecʒi Abrahamte ɋâric jaha, irec ere ficko miŋecgac miti fuame biaŋkekac.
10Ŋic Fâri Wâtuŋne e ŋic sâqorekicne rocjoparâ bâpiaŋ‐jopazore wahawec hâcne.”
11Jesu e Jerusalem hae bâqiŋkeme ŋic dâŋticne manambiŋzi mumbiŋ, “Ʒi Anuture uucmaŋ fua taniŋkeocte dameŋne maickekac.”
12Eme irec Jesuzi dâŋ suŋsuŋne moc ʒiŋuc jazawec: “Ŋicbomboŋ moczi, ŋicwofuŋ sâkorao ra mupe mâreŋ soŋaŋ âkendâŋnume risiezepac, muhuc mâreŋ wiwicko rawec.
13Raocte kiŋaŋ motecfâcne 10 hefârec‐joparâ moneŋfoŋ mocjaha mocjaha muhuc jarewec: ‘Ŋoŋe moneŋ ʒi kime kiŋ qahuc basawehuc juhapie risiezepac.’
14Rahame ŋicfâcne ere takic‐jopawecte ŋic kiŋaŋ sorec‐jopapie ʒâhec rarâ ŋicwofuŋ sâko ʒiŋuc âzâcnembiŋ: ‘E mâreŋ soŋaŋ‐nâŋec mi juocte muŋgopeneŋ.’
15Eme ŋicwofuŋ sâko e sifu mâreŋ soŋaŋ âkendâŋneme risiewec. Risierâ kiŋaŋ motec moneŋ jarewec jaŋe ʒiŋuc muhuc hefârec‐jopawec: ‘Moneŋ ŋarepo i giene bahuc hotâckekupie wezimuc fuawec?’
16Hefârec‐jopame kiŋaŋ motec moczi fisirâ muwec, ‘Bomboŋ, go moneŋfoŋ mocjaha naremeŋ izi furune 10 kime fuawec.’
17Mume ʒiŋuc âzâcnewec: ‘Sowine kiŋaŋ motec biaŋne, go wiac omanere gie aimuŋ bameŋte noni hae 10 jaŋere soŋaŋ râecgupe juzemec.’
18Iŋuc mume kiŋaŋ motec moczi fisirâ muwec, ‘Bomboŋ, go moneŋfoŋ mocjaha naremeŋ izi furune 5 kime fuawec.’
19Mume ʒiŋuc âzâcnewec: ‘Sâcne, go hae 5 jaŋere soŋaŋ juzemec.’
20Eme kiŋaŋ motec moczi fisirâ muwec, ‘Moneŋfoŋge ʒi, no qoruczi foŋkerâ aimuŋ râepe fowec.
21Go ŋic gereŋ gereŋne, go gahac wiac mi hurehuc gâcnezi bâfuapie rozo muekic, â go gahac gie he sarac mi ehuc gâcnezi bapie fârine fuame nâzo muekic. Eme no irec araŋ bagarehuc moneŋge aimuŋ bajupo.’
22Mume bomboŋzi ʒiŋuc âzâcnewec: ‘Kiŋaŋ motec sâqocne go, gahac dâŋ mumec ijaha bâtikie‐garekopac; no ŋic gereŋ gereŋne, no nahac wiac mi hurehuc gâcnezi bâfuapie rozo muekopac, â no nahac gie mi he sarac ehuc gâcnezi bapie fârine fuame nâzo muekopac.
23Go fuŋne‐nane iŋuc manahuc moneŋ‐nane moneŋŋic jaŋerao râetec jaŋe kime kiŋ qakupie sawehame risierâ rozapo.’
24Iŋuc murâ ŋic domambiŋ jaŋe ʒiŋuc jazawec: ‘Ŋoŋe moneŋfoŋ‐ticne jâoc rorâ 10 bajukac e râceniŋ.’
25Eme jaŋe mumbiŋ, ‘Hâc, bomboŋ, e 10 bajukac i!’
26Eme muwec, ‘No ŋazape mananiŋ, moc e wiac râcnekicne bajume kiqecnecnezo, â moc e wiac râcnekicne mi bajume jâoc rozo, eme mâc juzejec.
27Râsifâc‐nane ŋicwofuŋ‐jeŋic mi jupere muŋgopieŋ, ine bacjopa warerâ honehape jopa mizieniŋ.’”
28Jesu e dâŋ i mufârerâ Jerusalem haeo fisiocte rawec.
29Raku Oliwa tikio ferâ Betefage â Betania hae bâqiŋ‐jofawec. Ehuc motecfâcne jaŋeraonec jajahec ʒiŋuc muhuc sorec‐jofawec:
30“Hae rajecko ŋekac ira ranic. Rarâ doŋgi motecne niŋgiŋko domakac i bâfuanicmu. Motecne i ŋiczi fainao mi ŋekicne furune. Eme i bâfuarâ firuerâ bareniŋ.
31Firuepire ŋic moczi ‘wemocte rokopirec?’ mume ʒiŋuc muhuc âzâcnenic: ‘Wofuŋzi irec mukac.’”
32Mume motec jahe rarâ muwec sâc bâfuapic.
33Eme doŋgi firuepire rune jaŋe mumbiŋ, “Ŋohe wemocte goroŋkekopirec?”
34Jahe mupic, “Wofuŋzi irec mume rokoperec.”
35Iŋuc murâ Jesurao bararâ fainao ŋaqi‐jeŋic râerâ Jesu sâsepie fewec.
36Ferâ rame ŋaqi‐jeŋic hatao rumacke rambiŋ.
37Eme Oliwa tiki heâŋnao huhuctecne kikefuŋ gurufâc‐ticne jaŋe mâsi‐ticne fuŋne fuŋne honembiŋ irec manasurâ ʒeri ehuc Anutu mucne bacnembiŋ.
38Ehuc fânâŋkehuc ʒiŋuc mumbiŋ: “Ŋicwofuŋ‐nâŋec Wofuŋte micte warekac e mumbiaŋkenaŋ, faic sâmbâŋko wama bumâteŋ fokâc â hae faic micne ira ʒeri mumuteŋ fokac.”
39Iŋuc muhuc fânâŋkepie farisaio moc moc ŋicŋondeŋko jumbiŋ jaŋe ʒiŋuc âzâcnembiŋ: “Qaqazu, qâjâpecfâcge qatara‐jaretec beheniŋ.”
40Mupie jazawec, “No ŋazape mananiŋ, jaŋe niniŋkeniŋmuo qânâzi owackeniŋmu.”
41Eme rarâ Jesu e Jerusalem hae mai jaha ŋeme hone‐fârerâ bune herickeme kiohuc muwec:
42“Go akio juhâmocmurâ irec hatane dameŋ ʒiŋuczia hone taranʒaŋ me! Go ine ʒâŋege hâpokicnere wiac mi ʒâŋitaekic.
43Juku dameŋ moc maicgume râsi jaŋe fisirâ somâcgurâ ŋebâzicgupie nanamaŋ bititi erâ bâŋeŋkecmu.
44Erâ fic ʒoŋ hae ʒoŋ egarehuc motecfâcge qâmiziec‐jopapie raŋe siaeŋ foraniŋmu. Eme haege ŋetâ qâtâtieme sesucne fuarâ foocmu. Anutuzi maicguha râpeckemeŋ, irec wiac i fua‐gareocmu.”
45Dâŋ i mutararâ ra taha ufuŋko fewec. Ferâ wiac nareŋ gareŋ ehuc domambiŋ jaŋe ʒiŋuc muhuc jâpec‐jopawec:
46“Fic kecʒirec dâŋ ʒiŋuc mukicne: Ficnane i nunumu fic ŋezejec, ŋoŋe ine epie fiuc sindaŋ jaŋere qânâuŋ‐tinac ekac.”
47Eme ʒoaŋne ʒoaŋne taha ufuŋko miti jaza qazuc ehuc juwec. Ehame taha bapa micne â miti qaqazu â micne bapa sasawa jaŋe ine qapie arictac eocte dâŋne mumbiŋ.
48Erâ ŋic omane mâmâc sasawa miti‐ticne manarâ erea boc ejarewecte quŋkembiŋ.
