Lukas 18:14-42

¹⁴“A taki mua, a Vure i puga vuroki a naro hale na bakovi ni bole a takis, pali a Pariseo iea, i uka ma i puga vuroki a naro hale vona, a vuhuna e rei a viri i bibi rike mule ia, a Vure bara i vakakirokoa. Pali e rei a viri i vakakiroko mule ia, a Vure bara i kavurikea.”

¹⁵E huriki ri boko valai ne Isu e huriki a koma kiroko, ge padoi ria. Pali na tahuna e huriki a murimuri ri matai, ri tahate ria.

¹⁶Pali e Isu i taki e huriki ri gi boko valai vona e huriki a koma nga, lakea i ta maea, “Naha ni hatekakari e huriki a koma. Mu taparaki ria ri gi valai nau, a vuhuna a harikianga na hunu ne vone ria e huriki a hulu nga.

¹⁷A taki muholi mua, e rei a viri i uka ma i ngaru a Harikianga na Vure ge manga e huriki a koma nga, i uka ma ge dili vona.”

¹⁸Muri, a bakovi dagi tara i nanea e Isu i ta maea, “Mari ni tovo, o kamumu hateka. A ra maki ga ratea ga bole a nimahuri vakaroro?”

¹⁹Lakea e Isu i koli, i ta maea, “I navai o taki iau a kamumu? I uka tara viri ge kamumu. A Vure kikeri kunana a viri i kamumu.

²⁰O lohoka vona a vinara nga: naha ni mole, naha ni rabalaki a viri, naha ni panaho, naha ni padi virihi tavula a viri na ngava. O togo e tamamu e kinamu.”

²¹Lakea i ta maea, “A vinara lobo nga a muri mai, a vakatubu na tahuna a kiroko vona.”

²²Na tahuna e Isu i longoa, i takia, “A maki tara i uka ma o ratea ma. O vano o habi a maki lobo vomu ni gi kona. O bole a mapana o habi ne huriki a matasia, bara o tahoka a mahala na hunu. Muri o valai o muri nau.”

²³Na tahuna i longoa a ngava iea, i dodo hateka, a vuhuna i tahoka a mahala i kupo.

²⁴Lakea e Isu i mata lakea vona i ta maea, “I madihi hateka na bakovi na mahala ge dili na harikianga na Vure!

²⁵Muholi hateka a kamel i keri ni dili na dupi na kavato. I mavonga kunana, a bakovi na mahala i uka ma ge dili na harikianga na Vure.”

²⁶E huriki ri longoa a ngava iea ri turutu, ri nana, “Pali e rei ngane ge bole a nimahuri vakaroro?”

²⁷Pali e Isu i koli, i ta maea, “A maki i keri e huriki a bakovi, a Vure i kara ge rata.”

²⁸Lakea e Petrus i ta rike, i ta maea, “Pali mia, mi pe pali a tanga ne mia, mi muri vomu!”

²⁹E Isu i koli i ta maea, “A taki muholi mua, e rei a viri i lohopile a tanga vona, e girihina, e turana, e tamana, e kinana, e huriki e tuna, ge longototo a Vure,

³⁰bara i bole tabu i kupo hateka koea na malala. Muri ma meli na hunu bara i mahuri vakaroro.”

³¹E Isu i tuli lakea na gaga a murimuri vona ala ravulu a polona i rua, i taki ria, i ta maea, “Ngane si gi sike o Ierusalem, lakea a ngava lobo e huriki a propet ri here puru virihi mai a Tuna Bakovi bara i bele muholi.

³²Bara ni habi ia na limane huriki a bakovi i uka ma ria a Iuda. Bara ri padikedea, ri rata halea, ri kalupe tahoa,

³³ri hotua, muri bara ri rabalakia. Muri na parava i tolu, bara i pesi rike mule na matenga.”

³⁴Pali e huriki a murimuri i uka ma ri longokilalea a ngavane Isu. A pelegona ngava ni ruhulolo ne ria, i uka ma ri longokilalea.

³⁵E Isu i bele tabukoi o Ieriko. A bakovi tara, a kepa, i mamade na dahana dala, i nonongi a maki ne huriki.

³⁶Na tahuna i longo e huriki ala kupo ri laho polo, i nana ria vona a ra maki i bele.

³⁷Lakea e huriki ri takia ri ta maea, “E Isu o Nasaret i laho polo ngane.”

³⁸Lakea i gale tala, i ta maea, “Isu, Tune Davit, o dodo iau!”

³⁹E huriki ri laho muga ri tahatea, ri takia ge vulai. Pali i gale hateka tabu, i ta maea, “O Tune Davit, o dodo iau!”

⁴⁰Lakea e Isu i pesi tata, i taki e huriki ri gi tuli vilia vona a bakovi iea. Na tahuna i valai tabukoi, e Isu i nanea,

⁴¹“A ra o ngarua ga ratea?” I koli i ta maea, “Bakovi Dagi, a ngaru ni matapara.”

⁴²Lakea e Isu i takia, “O matapara. O tavaga ngane, a vuhuna o luhoi tora iau.”