SAN LUCAS 18:14-42

¹⁴Xique sasaj icon aaga naxey nesap mitomiün cambaj quiaj, apmajtsor najneajay omeaats cos Teat Dios tanguiay nej andeac. Nganüy aaga fariseo ngwüy. Atquiaj ajlüy cos jane nelombojchay, nicuajind nej, apmamongoch monxing. Nganüy jane ayaag nicuajind nej, Teat Dios apmapiüng, najneajay arang ―aw Teat Jesús.

¹⁵Condom taquiüraab niüng ajlüy Teat Jesús tegüy namix nine matepeayiw nej majend nej omalüw. Minipilan nej wüx tajawüw aag ayaj, tapots maliquiaw monquiiüb namix nine.

¹⁶Quiaj Teat Jesús tapaj minipilan nej masaj: ―Ijchan miünüw a namix nine niüng sajlüy, nde mepalan. Jangantanej apmajmel tiül micambaj Teat Dios netam majlüy atnej ajcüwa namix nine cam.

¹⁷Naleaing sasaj icon jane andiüm majmel tiül micambaj Teat Dios, sitiül ngo mandiüm marang atnej nop nine, nómban ngondom majlüy tiül ―aj nejiw Teat Jesús.

¹⁸Nop nenajiüt tiül judíos tatün manguiay Teat Jesús, tasaj: ―Teat, sajaw ique najneaj irang. Nganüy isaj xic Teat, ¿cuane netam narang, nguineay alndom napac meáwan nüt tiül cielo? ―aj.

¹⁹Quiaj tasaj nej Teat Jesús: ―¿Neol tepiüng xique nerangas najneaja? Nejinguind nipilan ngo marang najneaj; áagan Teat Dios arang najneaj.

²⁰Ique lamenguiay leaw andiüm Teat Dios, cos apiüng: “Nde mejiür minajtaj; nde membiy nipilan; nde merneed; nde merwaiich; iyar andeac miteat, mimüm” ―aj nej Teat Jesús.

²¹Quiaj tasaj nej aaga naxey quiaj: ―Teat, meáwan aag ayaj sayac wüx ximeaats nde sajngot miün ―aj nej.

²²Wüx tanguiay aag ayaj Teat Jesús, quiaj tasaj: ―Alíünan alinoic nganaw merang. Quiür inüüb leaw almejiür, condom imbaag ombeat meaach leawa nipilan ngo majiür, quiaj apmejiür tiül cielo xeyay nembeatmbeat, ndoj tewiün mendüüb xic ―aj.

²³Aaga naxey wüx tanguiay aag ayaj ngo majneaj mayaag, tamix omeaats, ngo mandiüm mandrooch ombas leaw ajiür, cos nop nej nejiür xeyay.

²⁴Wüx Teat Jesús tajaw amix omeaats aaga naxey, quiaj tapiüng: ―¡Xowüy laél majmeliw tiül micambaj Teat Dios ajcüwa monjiür xeyay!

²⁵Más ngo maél nop camello mamong amb tiül owil nots ndiüc, ngo matnej aél ocueajiw a nipilan monjiür majmeliw tiül micambaj Teat Dios ―aw.

²⁶Meáwan leawa tanguiayiw aag ayaj tapiüngüw: ―Sitiül atquiaj ajlüy, ¿jane alndom maw wüx asoet neje? ―awüw.

²⁷Quiaj tasaj nejiw Teat Jesús: ―Leaw nipilan nómban ngondom marang, Teat Dios alndom marang ―aj nejiw.

²⁸Condom tasaj nej teat Pedro: ―Teat, xicona tacueatasan meáwan leaw tajiürasan para nandüjpiün ic ―aj nej.

²⁹Quiaj tasaj nejiw Teat Jesús: ―Naleaing sasaj icon, ngo majlüy nejinguind macueat aniüng nej, miteat nej, mimüm nej, micoj nej, michiig nej, mintaj nej, micual nej, para majlüy tiül micambaj Teat Dios,

³⁰leaw ngome apmüünd majiür alinomb meáwan leawa tacueat ningüy wüx aaga iüt cam, at alinoic nüt apmüünd mapac meáwan nüt tiül cielo ―aj nej.

³¹Condom Teat Jesús tawün ninguiün quiriw ajcüwa gajpiüp minipilan nej, tasaj: ―Nganüy tabaats matüchiiüts Jerusalén. Quiaj apmajlüy atnej lamapiüngüw mondeac andeac Teat Dios nguineay apmarangüch wüx ombas a Teat Naxey.

³²Cos apmayacüch teowixaw napeay miün nipilan; apmitsojow nej mandeacüw ngo majneaj wüx ombas; apmateontsüw wüx ombas nej onts ombeayiw nejiw.

³³Apmatoliw, condom apmambiyaw nej nómban. Ndoj, wüx er nüt apmapac alinomb ―aj nejiw Teat Jesús.

³⁴Pero nejiw ngo maxomüw omeajtsüw wüx aag ayaj, ngo majawüw cuane wüx amb apiüng; cos ngo müjndiw majawüw.

³⁵Teat Jesús wüx laliüc mapeay tiül cambaj Jericó, alquiaj nop naxey nesomb alchetem mbeay tiiüd teatüneay.

³⁶Aaga naxey quiaj wüx tanguiay xeyay nipilan teamong, quiaj tatün manguiay cuane najlüy.

³⁷Quiaj tasoic Teat Jesús naw Nazaret namong amb quiaj.

³⁸Condom tepaj napac: ―¡Teat Jesús, micual David, ijiür xic lasta! ―aw.

³⁹Quiaj taliquiaw nej leaw monmong ombas, macueat apaj. Pero nej tayac wüx alquiriw apaj, tapiüng: ―¡Micual David, ijiür xic lasta! ―aw.

⁴⁰Quiaj Teat Jesús lembet, tapiüng mamb majanüch aaga naxey quiaj. Wüx tapeay niüng ajlüy nej, tatün manguiay, tasaj:

⁴¹―¿Cuane ipiüng, teat? ―aj. Quiaj tasaj nej aaga naxey: ―Teat, sandiüm meaach majneaj xiniiüg, sandiüm naxom najaw ―aj nej.

⁴²Quiaj tasaj nej Teat Jesús: ―Nganüy apmexom mejaw; lerneaj cos teyac imeaats wüx xique ―aj nej.