Lucas 18:14-42

¹⁴Jabi masahacaquë toa joni jocha iquia ra. Jia tsi jahari jahuë xobo qui ja cani quiha. Jama, toa fariseobo rë. Ja bëhoxhai ca Diós nicayamaniquë. Masahacayamani quiha jahuë jocha. Jatsi quiniacaxëcahuë. Jamë oquëhuamisxënicabo tëquë noitihuaxëhi quiha Dios. Jasca, oquëhuahacaxëhi quiha jato jocha bërohuacanaibo tëquë —nëa tsi Jesu nëcaniquë.

¹⁵Jatsi Jesu qui baquë mishni bo nohiria bá bëniquë, jato ja shomahuano iquish na. Jama, jato jisi tsi jahuë rabëti bá raahaniquë; —Xocobo bëyamacahuë —iquiina.

¹⁶Jatsi xocobo Jesú quënaniquë: —E qui xocobo bëcano ra. Jato chitiayamacana. Nëca cabá-na tsi xo Diós otohaina ra.

¹⁷Mato parayamaquia. Bëroria tsi Chama Dios qui chahahuacani quiha xocobo ra. Jabi xocobo jascaria pi chahahuayamahi tsi nai qui jicoyamaxëqui mato ra —i Jesu niquë.

¹⁸Jatsi huësti ca jodioba chamá Jesu nicaniquë: —¿Jënahuaxëhi ni ëa, maestro jiaxëni cató, bëso-bësopaoxëna? —iquiina.

¹⁹Jatsi Jesú quëbiniquë: —¿Jënixo tsi jiaxëni ca ëa mi quënaha? Yama tsi xo jiaxëni cato. Jaroha ca jia ca tsi xo Dios.

²⁰Tonia Moisés yoba cahëqui mia tia. “Joni huëtsa ahui biyamahuë; joni ayamahuë; yomayamahuë; quiahuayamahuë; mi ipa, mi ihua, tihi cabo noihuë” tihi ca tsi ii quiha jahuë yoba —i ja qui Jesu niquë.

²¹Jatsi chama chaniniquë: —Xocobo xo rohari tsi toa yoba bo tëquë ë nicaniquë ra —iquiina.

²²Jatsi Jesú quëbiniquë joni nicaxo na. —Jari huësti ca jahuë narisqui mia axëna. Mi jahuë bo tëquë iniahuë. Iniaxo tsi noitiria cabo qui toa parata mëahuë. Tocapimino tsi naipá ca jahuë bo bixëqui mia ra. Jaquirëquë johuë. Ea mi banahuano —i joni qui Jesu niquë.

²³Nicahax cohuënaniquë chama, rico ja ini quëshpi na.

²⁴Cohuë ja ini ca Jesú jisniquë. Jatsi, —Bëroma tsi xo toa rico cabo Diós otohai ca qui jicohaina ra.

²⁵Jato chama yoí tsi Diós otohai ca qui jicocascani quiha; toa quiniá tsi ja jicocanomari —i Jesu niquë.

²⁶Jatsi, —Yama tsi xo xabahamahacati mëtsa cato rë —i nicanish cabo niquë.

²⁷Jatsi Jesú jato yoaniquë: —Jamë xabahamatimaxëni tsi xo nohiria. Dios roha tsi xo toa nohiria xabahamahaina —iquiina.

²⁸Jatsi Pedro chaniniquë: —Noba jahuë bo tëquë no jisbërianiquë mia banahuaxëna —iquiina.

²⁹Jesú jato quëbiniquë: —Mato parayamaquia. Ibo Diós otohai ca iqui pi jahuë xobo, jahuë ahuini, jabë xatë bo, jahuë nabo, jahuë xocobo, tihi cabo jisbëriaquí tsi huëstima ca huino ca jahari bixëqui mato.

³⁰Jaboqui bësoquí tsi oquë ca copi bixëqui mato ra. Jasca, mato bëso-bësopaomaxëhi quiha Dios ra, toa tsëquëxëhai ca xaba paxá no —i Jesu niquë.

³¹Jatsi jahuë doce ca rabëti bo Jesú biniquë jato qui chanixëna. —Jaboqui Jerusalén qui caqui noa. Toá tsi jatihuahacaxëhi quiha Dios Chani yoanish cabá quënënina ëa yoati na.

³²Carayanabo qui ëa mëacaxëcani quiha. Mëaxo ëa mahuacaxëcani quiha pë. Ea yosicaxëcani quiha rë. E qui coshocaxëcani quiha.

³³Jatsi ëa rashacaxëcani quiha. Jaquirëquë namëhacaxëquia. Jama, tres barí tsi bësotëquëxëquia —i Jesu niquë.

³⁴Jama, Jesú yoani ca jahuë rabëti bá cahëyamani quiha. Jato joma quiha. Cahëtimaxëni ja icani quiha.

³⁵Yaca Jericó qui tsi Jesu basimano tsi quiha bahi quëpë́ tsi bëco ca joni tsaho iniquë. Parata bënahi ja ini quiha.

³⁶Tsahoxo tsi nohiria misco tarabihai ca ja nicaniquë. Nicahi tsi, —¿Tsohuë ni toa ëa tarabihaina ra? —i ja niquë.

³⁷Jatsi, —Tarabihi quiha Jesu, naa Nazarét conish cato —i ja qui nohiria bo niquë.

³⁸Jatsi Jesu quënatsijahuaniquë: —Ea shinahuë, David yamabá Baquë —iquiina.

³⁹Jatsi, —Pasihuë. Pasihuë —i ja qui rëquë ca nohiria bo niquë. Japi oquë tsi ja quënatëquëniquë: —Ea shinahuë, David Baquë —iquiina.

⁴⁰Jatsi Jesu niiniquë. Niihax, —Nëri toa joni bëcana —i ja niquë. Jatsi joni joniquë.

⁴¹—¿Jahuë ó quëëhai? ¿Jënahuaxëhi ni ëa mi bax na? —i ja qui Jesu niquë. Jatsi, —Taiscasquia, Ibobá —i joni niquë.

⁴²—Taishuë. E qui mi chitimihai cató tsi mi jënimahuahacaquë ra —i ja qui Jesu niquë.