San Lucas 18:14-42

¹⁴Seetanujuanaa nia sequeyanijia, cumaneeca masejonaari Pueyaso jiyanooshano tacateyarohua cutara. Fariseo pueyanoori saniniuujia jiyanoyaquishoo tacateyarohuacujua. Naacuajitij, cante tama na cuaqueyajaaja jiyateya juhua maninia pueyano na quiniuria tamajaajani, nojuajaari cararosaanutaniya. Saniniuujia, cante sesa na miishano seetaaquijiani Pueyaso jiyanooniuria nojuajani, Pueyasoori cuno pueyano jiyatenutaniya seetanujuanaa sesa miyaquijia na quiniuria.

¹⁵Jiyacaritij, conaajaari poosaariquiaa Jesuucua, Jesu nianura nojoriicua na juaashiquia, Pueyaso jiitianura maninia nojori. Jesu saquiriojosano pueya jaara niquiquiaari conaaja pooshiyano Jesuucua, nojoriiri na poonaa juaarii.

¹⁶Jesuuri saaja conaaja poonaa sequeree, conaaja cuaara nocua poosaaria. Na nuhuaji, na pueya sequereeri: —Naatujoori cuaara poosaaria cucua. Maja na poonaa tenujunu. Cante Pueyaso muerasura quiniu paniyani, nojori cuaara jiyateera tama na cuaqueyajaaja juhua nio naatujooriria.

¹⁷Seetanujuanaa nia sequeyanijia, cante tama na cuaqueyajaaja jiyateyaquiya juhua naatujooriria Pueyaso rupaacua na tiuuniuriani, cuno pueyanoori maja na naata Pueyaso muerasura na quiniu.

¹⁸Tamonu Judiocuaca camarnuuri Jesu nequesotaquiaari: —Maninia niishitiojonanaa, ¿taa cua miiniutianiyani, jiya puequesacari cua samiitianishaanura, pueyaracaanu quijiara cua quiniuria Pueyasotani?

¹⁹Jesuuri na riucuaree: —¿Casaara quia sequeya janiya maninia pueyanotani? Saaja Pueyaso cutaraari seetanujuanaa maninia. Majaari socua tamonu quiniu.

²⁰Pueyanonaa, quiaacuajaari Moisés Rootasano niishijia. Naa naajiotasanocuajaari quiya: “Maja quia camishoo maaji numuetucunu. Maja monu. Maja nohuasenu. Maja tamonuucuara saquiriojotanu quia sapojonuta. Quia que, quia nucua tojijia quia quiri”.

²¹Pueyanoori Jesu riucuaree: —Janiyacuajaari cua naatujuajiniji puetunu cuno tojijiajanaani.

²²Naa na sequesacaritij, Jesuuri na sequeree: —Quiyajaari niquiriyatu casaa quia miishoojua. Nio quia miiri: puetunu quia jiitiasanojuanaa quia niquitiojore cumaneecara. Na nuhuaji, casamiijiuniucua pueya cuno cumaneeca quia niquitiojore nareja. Naacuajitij, quiaari jiyanohua casamiriaca quiniutianiya cutara jiyocuacaanu. Na nuhuaji, quiocua nimiohua cutara, cua pueyano quia quiniuria.

²³Na tojishacari Jesu sequesano, nojuajaari jiyanohua taraajequee, jiyanohua queraatia casamiriaca na quishacari.

²⁴Jesu niquishacari nojuaja taraajeyano, Jesuuri na pueya sequeree: —Casamiriaca pueyara, jiyanohua jiyajenetaari Pueyaso muerasu nojori quiniuria.

²⁵¿Camelloteeri na naata cusupuetaja cuhuoco tamajiria tajiniu? Maja na naata. Naajuhuaj, casamiriaca pueyanora, socua jiyanohua jiyajenetaari Pueyaso muerasu na jatanishaanura.

²⁶Pueya tojishacari naa Jesu sequesanotej, nojoriiri naa na nequesotaree: —¿Canteeri Pueyaso muerasura quiniutianiyanitioj?

²⁷Jesuuri nojori riucuaree: —Maja pueya na naata tama na cuaqueyajaaja jiyatenu Pueyaso muerasu nojori quiniuria. Naajaa, Pueyaso cutaraari na naata.

²⁸Pedroori Jesu sequeree: —Jiyaniijianaa, ¿canaarijiataj? Canaari puetunu canaa jiitiasanojuanaa tiujiaquiaarini canaa nuhuajiniuria quiajaniya.

²⁹Jesuuri na riucuaree: —Seetanujuanaa nia sequeyanijia, cante na panishano casaa tiujiaquiaari Pueyasora na poonijionurani: na tia, na que, na nucua, tapueyocuaca, necocua, necohua, nojuajaari socua jiyanohua queraatia masenutaniya mijiria na quishacarijia.

³⁰Na nuhuaji, samiitianishano quiniutianiyari pueyaracaanu shuquiriaatia na quiniuria Pueyaso shipinishocoriquiano quiarinio jiyajinia.

³¹Jesuuri saaja na doce saquiriojosano pueya jiyataaree tamocora. Naa nojori sequereeri: —Paari quiarijia Jerusalén tiacajinia quiaani. Janiyari quiniqui puetunujuanaa miishaanutaniyani taa tariucuacaanu pueyara Pueyaso sequesano caminiujiuniaa sequequiaaricuaja janiyajinijini.

³²Naacuajitij, janiyari tahua niquitiosaanutaniyani. Nojoriiri cua macaatiniutianiya. Taraatia cua miitiuniutianiyari. Cua riocojotunutaniyari.

³³Cua piquitiuniutianiyajaariuhuaj. Na nuhuaji, cua motunutaniyari. Naajaa, jiuujianaraca juucajinia, janiyari samiitianutaniuhuani.

³⁴Majaari Jesu pueya niishiniu quiriquiaa quenaaja na sequesano. Majaari nojori niishiniu quiriquiaa casaa Jesu sequeriquiaani. Juhua miriqui sequesanoori quiriquiaa nojoriria.

³⁵Na pueyata Jesu quishacari tari cateca Jericó tiacaacuara, cariyojuaru pueyanoori nuu shuucuaji cajiriquiaa, cumaneeca na masejonura pueya tajishacari nucuaco.

³⁶Cariyojuaru tojishacari queraatia pueya tajiyano, pueya nequesotareeri: —¿Casaatejanojoni?

³⁷Pueyari na sequeree: —Nazaret tiacajinijinio Jesucuaja tajiya.

³⁸Cariyojuaruuri nacaquee: —¡Jesunaa! ¡Supuetana David niquiohuacuajinio supueno pueyanonaa! ¡Cucua quia taraajere quenaaja!

³⁹Jesu puetanaa pueyari na juaarii na sanaajanura juucua. Nojuajaari saaja socua jiyanohua nacaree: —¡Supuetana David niquiohuacuajinio supueno pueyanonaa! ¡Cucua quia taraajere!

⁴⁰Jesu tojishacari nojuaja, nujuaseeri. Jesuuri pueya sequeree cariyojuaru cuaara jaatucusaaria nocua. Cariyojuaru tiuquishacari nocua, Jesuuri na nequesotaree:

⁴¹—¿Casaa quia paniya cua miiniuria quiajaniyani? Cariyojuaruuri Jesu riucuaree: —¡Jiyaniijianaa, niquijiara quiniu paniuhuanijia!

⁴²Jesuuri na sequeree: —¡Niquijiara quia quiriohua! Quia namijiacuaja tari jeequerohua cucua quia tiuushacari.