1Ʒoaŋ mocte Jesuzi Genesarete riqic moŋgeŋnao juhame ŋic Anuture dâŋ mananiŋte fisirâ qazu orâŋ mâretec ecnembiŋ.
2Ehame moŋgeŋko woke jajahec ŋepic, rune jaŋe ine wokeonec waharâ wasaŋ‐jeŋic ʒurehuc domambiŋ.
3Eme Jesuzi woke i hâcne honerâ moc Simoŋte biŋe ira ferâ mume piticne âke sueme rame miti jaza qazuc ehuc ŋewec.
4Jaza qazuc efârerâ Simoŋ ʒiŋuc âzâcnewec: “Riqic ʒâʒâŋiŋko rarâ wasaŋ behepie qowi jowaoc.”
5Mume Simoŋzi ʒiŋuc âzâcnewec: “Qaqazu, nâŋe ŋafe ʒora wasaŋ behe‐bipiehuc qowi moc mi rombeneŋ, gore micte ine sifu mocwâc behepemu.”
6Eme wasaŋ behepie qowi bocjaha jâmbâŋ jowame wasaŋ tâcnezo ewec.
7Eme fâre‐bipierâ âgofâc‐jeŋic woke mocko jumbiŋ jaŋe meoric qajarepie ware bafic‐jopambiŋ. Ehuc qowi ropie woke jajahec huku fusucmame ŋeutuckezo epic.
8Eme Simoŋ Petorozi i honerâ Jesure maŋfuŋko fodaperâ muwec: “Wofuŋ, no ŋic sâqocnere behecnu rac.”
9Qowi guru sâko honerâ e jahacne â ŋic gâcne mâmâc manapie hâhâwicne eme iŋuc hâcne muwec.
10Erâ e jahacne sawa mâcne, âgo jahec‐ticne Jakobo â Johane, Ʒebedaiore ŋokâ, jahe iŋuc jaha ejactewec. Eme Jesuzi Simoŋ ʒiŋuc âzâcnewec: “Go mi hâwicguoc, go qowi rorozi ŋic roro erâ jucmu.”
11Iŋuc mume jaŋe woke moŋgeŋko fârepie feme wiac sasawa beherâ Jesu bâjâpembiŋ.
12Jesu e juku hae mocko fisirâ juhame ŋic moc wicsanaŋzi sahacne banʒaŋne‐fârewec, eki Jesu honerâ ware maŋfuŋnao ʒâŋe maine mâreŋko hetutuckerâ ʒiŋuc muhuc wâsickewec: “Wofuŋ, go bâsomiecnuzo murâ sâcne bâsomiecnucmu.”
13Mume Jesuzi meticne sicnerâ sahacne bâuahuc muwec: “Mana‐garekopacte fâsâec.” Mume izia sahac‐ticne fâsâe‐fârewec.
14Eme Jesuzi dâŋ ʒiŋuc âzâcnewec: “Go irec dâŋ binaŋ ŋic mi jazahuc mâc rarâ sahacge taha bapa jâututec honezejec, ehuc fâsâekomecte Mosere micdâŋte bâzi riketec fuŋne mana taranʒepieŋ.”
15Eme ŋic fâsâewec irec biŋe hae sâc rafâreme ŋic jaŋe manarâ mitire mecne â hucte mecne qiŋ qururuŋko Jesurao fisihuc domambiŋ.
16Fisihuc boc ecnepie mâreŋ herâricne mocko ra juhuc nunumu gie bawec.
17Ʒoaŋ mocko Jesuzi ŋic miti jazahuc juwec. Eme Galilaia mâreŋkonec â Judaia mâreŋkonec â Jerusalem haeonec farisaio â sâcmutâc qaqazu jaŋe fisirâ ŋic jaŋere ŋondeŋko mâmâc ŋembiŋ. Ŋehapie Wofuŋte tâpirizi Jesu neŋgoc ŋesiŋ ŋecnehame ŋic bâpiaŋ‐jopawec.
18Ehame mi ŋic ʒeke puriŋ moc kanʒeo reŋke warenʒepieŋ i! Erâ ficko baferâ Jesure maŋfuŋko râeniŋte ŋic jaŋerao hetakirembiŋ.
19Iŋuc erâ fic bupuo baferâ bâropierâ ŋic kanʒehec âke suepie ŋicŋondeŋko Jesure maio wahawec.
20Iŋuc epie Jesuzi mamanasiŋ‐jeŋicte fuŋne hone manac erâ ŋic ʒeke puriŋ ʒiŋuc âzâcnewec: “Ŋicmae, sâqocne mutâmire‐garekicne.”
21Mume miti qaqazu â farisaio jaŋe dâŋ i manarâ maŋjeŋiczi ʒiŋuc manasumbiŋ: “Hâc, e wemo‐ticnere Anutu âkehockekac, sâqocne bâbâtâmire i Anutuzi buc eekac.”
22Iŋuc manasupie Jesuzi maŋjeŋicko dâŋ i mana tararâ ʒiŋuc jazawec: “Maŋŋeŋiczi wemocte dâŋ iŋucne manasuŋgopieŋ?
23Gie wenimo izi afecne? Ŋic ʒeke puriŋ ʒiŋuc âzâcnezo: ‘Sâqocnege bâtâmire‐garekicne’ me ʒiŋuc âzâcnezo: ‘Fahare rac’?
24Ŋic Fâri Wâtuŋne e mâreŋko sâqocne bâtâmireocte tâpiri focnekac irec fuŋne hone tarariŋ.” Iŋuc murâ ŋic ʒeke puriŋ ʒiŋuc âzâcnewec: “No gazape faharerâ fofoge rorâ haegao rac.”
25Mume izia ʒâŋe mai‐jeŋicko faharerâ fofo‐ticne rorâ haeo rahuc Anutu muteŋkewec.
26Eme ŋic jaŋe i honerâ manapie hâhâwicne eme warecke sâqorerâ Anutu mucne bacnehuc mumbiŋ: “Miŋecgac wiac ʒâŋe furu fuame honeŋgopeneŋ.”
27Eme Jesuzi fickonec waharâ hata rawec. Rarâ takesi roro ŋic moc ʒâŋene Lewi e moneŋfic‐ticnao ŋehame honerâ ʒiŋuc âzâcnewec: “Ware bâjâpecnuc.”
28Mume Lewi e wiac‐ticne sasawa râpeckehuc fahare Jesu bâjâpewec.
29Erâ Jesure bâzi rikerâ takesi roro â ŋic gâcne hefârec‐jopame fisirâ mâmâc nâmbiŋ.
30Eme farisaio â miti qaqazu âgofâc‐jeŋic jaŋe irec manapie sâqoreme Jesure motecfâc ʒiŋuc jazambiŋ: “Ŋoŋe wemocte takesi roro ŋic â sâqocne bapa jaŋehec tiwa bâzi nâŋgopieŋ?
31Mupie Jesuzi manarâ ʒiŋuc jazawec: Ɋiɋicne jaŋe doktare mi mueŋgopieŋ, huchec jaŋe ine mueŋgopieŋ.
32Ŋic tiŋne mâcne, sâqocne bapa hefârec‐jopape maŋjeŋic bârisieniŋte wahapo.”
33Jesuzi iŋuc mume jaŋe dâŋ ʒiŋuc âzâcnembiŋ: “Johanere motecfâc jaŋe gâbâ jaha nânâ sowa juhuc nunumu gie baeŋgopieŋ â fârisaio jaŋerezi iŋuc jaha eeŋgopieŋ, â go gahacne jaŋe ine nânâ opâ kosa nâeŋgopieŋ.”
34Mupie Jesuzi ʒiŋuc jazawec: “Ŋicwofuŋ e kikefuŋfâc‐ticne jaŋehec juhame ŋoŋe sâcne ejarepie sowa juniŋmu me?
35Juku ŋicwofuŋ jowac ropie basahuc dameŋ ira sowa juniŋmu.”
36Iŋuc murâ dâŋ herâricne moc ʒiŋuc jazawec: “Mozi ŋaqi ɋâricnaonec qoruc susuc moc bâtâcnerâ ŋaqi raŋɋanao ɋâtâocmu? Moc e iŋuc erâ muzac ŋaqi ɋâricne maŋgâŋ sipirickezac â qoruc susuc ɋâricnezi ŋaqi raŋɋanao sâctiri jaha ezac.
37Erâ wâc waiŋ opâ ɋâricne ʒopo raŋɋanao mi qoŋgiŋkepie huekac. Iŋuc eniŋmuo wiaŋ ɋâricnezi ʒopo raŋɋane âtefâuckeme waiŋ mecne ʒopo mecne mâmâc sipirickenicmu.
38Irec hâcne waiŋ ɋâricnezi ʒopo ɋâricnao hume sâckeocmu.
39Â moc e waiŋ raŋɋane nâku maŋne eweczi waiŋ ɋâricne ʒiŋuc muhuc qikiŋneocmu: Raŋɋane nâpe aŋacne ekac.”
