SAN LUCAS 18:14-42

¹⁴Namechiluiya quen inin rendero ihcuac omocuep ichan yitlamelajcan ica in Dios, huan in fariseo ahmo. Tleca in aquin mohueyiliya quixtohuetzosque, huan in aquin ahmo mohueyiliya, yehhua mochihuas hueyi.

¹⁵Noyojqui otehualiquiliyayahque in cocone in Jesús ic mamomachilican ica teman. Huan ihcuac oquitaque in tetlamachticahuan, opeuque quintlacahualtiyahque in aquin oquinualiquiliyayahque.

¹⁶Huan Jesús omonotzque huan omoluihque: ―Xiquincahuacan in cocone manechualiquilican huan ahmo xiquintlacahualtican, tleca in tetlatequiutilistzin Dios inuaxca yehhuan quen inohque cocone.

¹⁷Ic nele namechiluiya, in aquin ahmo quiseliya in tetlatequiutilistzin Dios ipan iyolo quen se conetl quiseliya, ahyic calaquis ompa.

¹⁸Se de inon tlayecancamen otetlahtlani in Jesús: ―Cuali tlamachtiyani, tel, ¿tlen nicchihuas ic nicahsis in nemilistli nochipa?

¹⁹In Jesús omoluic: ―Tel, ¿tleca tiquihtohua molui nicuali? Ahmo oncan ocachi quen seya aquin nele cuali. San Yehhuatzin in Dios.

²⁰Tehhuatl tiquixmati in tlanahuatilten: “Ahmo xisihuaahuilti; ahmo xitemicti; ahmo xiichtequi; ahmo xiistlacati ica niyan aquin; xicmahuestili motata huan monana.”

²¹Inon tlacatl oteiluic: ―Nochin inin nitlacamautoc de ihcuac niquitzinin.

²²Ic omocac in Jesús, omoluic: ―Oc mitzpolohua oc se tlahtoli. Xicnemaca nochin tlen ticpiya huan xiquinmaca in prohues. Huan ijcon ticpiyas motlatlan neluicac, huan niman xihuala huan xinechcuitlapanui.

²³Huan ihcuac inon tlacatl oquicac inon, molui otlocox tleca tequin rico ocatca.

²⁴Quen omotac in Jesús quen otlocox, omoluic: ―Molui tequiyo in ricos calaquisque ipan tetlatequiutilistzin Dios.

²⁵Ahhuel panos in camello ipan itlacoyoc in acoxa. Huan tla cuali yesquiyani, molui tequiyo. Huan ocachi tequiyo in rico calaquis ipan tetlatequiutilistzin Dios.

²⁶Ic inin, in aquin oquicajque oquihtohque: ―Tel, ¿aquin cuali maquisas?

²⁷In Jesús omoluihque: ―In tlen in tlacamen ahhuel quichihuasque, in Dios cuali mochihuas.

²⁸In Pedro oteiluic: ―Notecohtzin, tehhuan ticautoque in tlen ticpiyahque ic titecuitlapanuisque.

²⁹Oncan Yehhuatzin oquinnanquililoc: ―Ic nele namechiluiya; in aquin quicahuas ichan, noso itata huan inana, noso icnihuan, noso isihuau, noso ipiluan, tepampa in tetlatequiutilistzin Dios,

³⁰quiselis ocachi ipan inin tlalticpactli, huan ipan in tlalticpactli tlen hualas quiselis in nemilistli nochipa.

³¹In Jesús omonotzque secnin in mahtlactli huan ome tetlamachticahuan huan omoluihque: ―Axan tiyohue Jerusalén canin tzonquisas ica tlen oquihcuilohque in tlayolchicaucamen ica nehhuatl aquin Nitetiachicau ica nochin tlacatl.

³²Tleca nechtemactisque inmajco in tequihuahmen romanohteco aquin nechahuiltisque, huan nechpactecasque huan nechixchihchahuisque.

³³Huan nechuihhuitequisque, huan satepa nechmictisque. Huan ipan yiyi tonali niihsas den mijcamen.

³⁴Huan yehhuan ahmo tlen oquinnehnehuilihque ica inin, niyan oquimatque ica tlen oquinnonotzaloc, tleca inon tlahtoli ahhuel oquinehnehuilihque.

³⁵Ihcuac in Jesús oahxihuataya ipan in altepetl Jericó, se ixpatzac oyehuatoya itentla in ohtli ic quitlahtlani in limosna.

³⁶Quen oquicacticatca quen opanoticatcahque miyac tlacamen, in ixpatzac otlahtlan tlen panotica.

³⁷Oquiluihque quen opanolotaya in Jesús den altepetl Nazaret.

³⁸Oncan otzahtzic: ―¡Jesús, ixuiu in David, xitlocoya ica nehhua!

³⁹In aquin otlicanayayahque oquitlacahualtihque mamocahua. Huan yehhua ocachi otzahtzic: ―¡Ixuiu in David, xitlocoya ica nehhua!

⁴⁰Oncan in Jesús omoquetzaloc huan omoluihque matehuiquilican. Ihcuac yoteahxiltilihtayahque tenahuac, omotlahtlani:

⁴¹―Tel, ¿tlen ticnequi manimitzchihuili? In ixpatzac otenanquilic: ―Notecotzin, nicnequi nicselis notlachiyalis, tla cuali nitlachiyas.

⁴²In Jesús omoluic: ―¡Xitlachiya! Huan yotipahtic tleca oticneltocac.