Luke 18:14-42

¹⁴Jesus ikwer-rnem angkew, “Artwa apwert akarreley-angker arratyerreynew Akngey-angkwarran, rarl angkew, ‘Ayengan apmwarl!’ Akngeyel renh irrarlkew, apmwangkwarrel alhenh-penh, rap ikwer inkwerelhew. Artwa Pharisee-an arrangkwarl, arratyerrey-angenh Akngey-angkwarr, ra nakelhewarl. Akngeyan ikwer inkwerelhey-angenh, arrangkw. Kel nthakenh nga nakelhey-angenh, mwerr antwelhey-angenh, Akngeyelan ngenh apmwa antwewerr. Nga angkem, ‘Ayengan apmwa!’, Akngeyelan apmwa ngkweng-they irrarlkemarl, mwerr antwemel.”

¹⁵Akngerr ilkelhew, ampernem akngetyeyew Jesus-warl, raw renh-rnem itepel arnep-arneyew, Akngey ayernemel ikwer-rnem. Kwertengerl ikwerenh-rnemel arew, rernemap renh-rnem irrentew.

¹⁶Jesus-anap athamerrew ampa ikwer-rnem, rap angkew, “Ampernem menty apetyey atyeng-warl, arrngert angkey-angenh ikwer-rnem. Akngey-wenh-rneman ampa nhernem-apenyarl.

¹⁷Mwanty awelhenh-arey arrantherr! Ampernemelarl ilkwernem awem, rernemap iterrem alakenh, ‘Innga wenh! Irrtywerremel iley-angenh.’ Alakenh-anyem arrantherr angka atyenh awemer. Apmwel-ayeth iterrey-angenh, ayeng irrtywerrerl-anentyew-arrpantey. Arrantherr atyeng awelhenty, arrantherrap intemarl Akngey-itwel aney-alpem.”

¹⁸Artwa rltwa tyaty Jew-rnem-wenh-areny ra angkew Jesus-ew, “Ngan akalty-anthey-angker mwerrarl. Ila ayenh, nthakenharl ayengan irrem, ayeng aney-alpeyew Akngey-itwel intem-antey?”

¹⁹Jesus-el tyernew, “Ilekewarl ntwa ayenhan mwerr antweyel? Akngey rant anyent mwerr aneyel.

²⁰Angka weth Moses-wenh ntwa iterl-areyel. Ran alakenh aynteyel: ‘Anew ingwerentyak-wenh-itwel ayntey-angenh, ipmew atwey-angenh ingwerentyak, ayntengeny irrtyert-iney-angenh, court-itwew ilerl-aney-angenh ingwerentyak irrtywerremel, awelh-aynta aynewengkw-then amewengkw-then iylpareth.’”

²¹Artwa rltwan angkew, “Akely-they athan angka nhenh-rnem ingkerrenh awew iylparethel. Aleyan atha iylparethel awelheyel-antey.”

²²Jesus-el renh awew, rap angkew-anem, “Kel mwerr. Angka anyentant-anem ingweran aynteyel, nga awelheyew. Ilek-ilek ngkwenh ntwa tharlemelemer. Ntwa apwert inem-penh, ntwa irrepern-rnem angayakw amern-weny-rnemew antha. Ntwap ayenh apenta iltyantel-anem. Akngeyelan ngenh mwerr-angkwarr arntarnt-areman, ngarl alpemel aney-alpeyew ikwer-itwel.”

²³Artwa rltwelarl awew alakenh, rap arlka apmwerreyelpew, ran apwert akngerrarl atnyenew ilek-ilek-then.

²⁴Jesus-el arew, rarl apmwerreyelpew, rap ingkerrenhew-anem angkew, “Ingwerenty apwert akngerrarl atnyeneyel ilek-ilek-then, rerneman arraty iterrey-angenharl Akngeyew. Rernem alakenh iterrem, ‘Athan atnyenem ilek-ilek-then apwert-then. Akngeyew ayeng iterrey-angenh.’ Irrpetyapelant renh inngan atyetyart antweyenh.

²⁵Tangkey ampwal-akert nthakenh aylpey-angenh arriw tyet-angkwarr, arrangkw. Alakenh-anyem rlterrk apwert akngerr-akert-rnemew aynteyel, Akngey-angkwarr alheyewan.”

²⁶Akngerrel awew, rarl alakenh angkew. Rernemap apmwel-ayeth iterrenh alakenh: “Apwert akngerrarl ilek-ilek-then atnyeneyel-rnem, Akngeyel ikwer-rnem anthem. Ra renh-rnem anthem alakenh, rarl inkwerelhem ikwer-rnem. Innga ampwal akngerr-akert-rnem Akngey-wenh-rneman.” Apmwel-ayeth alakenh iterremel rernem angkerrenh, “Akngeyel ingwer-rnem ampwal akngerr-akert-rnem iwerlelpem, ilek-apenyarlap ikwerenh-rneman?”

²⁷Jesus-el tyernew, “Ntwa amentel nthakenh mpwarey-angenh alakenh, arrangkw. Akngeyelant ngenh iteth atnyenem, ikwer-itwel intem aney-alpeyew.”

²⁸Peter angkew ikwer, “Anantherr-alew? Anantherran ngenh apenteyel. Warrk-then warl-then altyernem-then iwerlelpew ingkerrenh.”

²⁹Rap angkew ikwer-rnem, “Mwanty awelhenh-arey arrantherr! Ingwerenty apek apmer ikwerenh iwerlelpem, ikwerenh-rnem anteng apmer-itwew, raw Akngeyew warrkerrey-alkenh.

³⁰Ingwer-ingwer Akngeyel renh anthem ilek-ilek mwerr-angker. Rap aney-alpem Akngey-itwel intem-antey.”

³¹Jesus-el kwertengerl ikwerenh-rnem akarrelew, rap angkew, “Awelhenh-arey arrantherr! Awank-akerr angkakert Akngey-wenh-rnemel angka atyeng-akert ingkwernew, angka Artwa Innga Akngey-wenh ikwer-akert. Ingwer-ingwer aynteyenh, rernem ingkwernew-angkwarr. Arrantherr kel iterl-areyel, anantherrarl alheyel Jerusalem-warl.

³²Apmer yanh-itwew artwa Jew ilkwernemel ayenh antwerrkeyenh, ayenhap ahayiweyenh artwa ahelengkw-rnemew-anem, artwa Rome-areny ikwer-rnem. Rernemap ayenh kwantheyenh, apelh-then atyeng-warl iweyenh, ayenh atweyenh whip-el artewenty. Ayengap arwerl iylpeyl-atherrel ilweyenh-anem.

³³Ingwa atherr-penh ayeng angkep itetherrenhey-alpeyenh ipmepenh.”

³⁴Kwertengerl-rneman apatemel iterrenh-antey alakenh, “Jesus-an atyetyart anewantherrenh, nthakenh ilwey-angenh, arrangkw.”

³⁵Jesus alpenh ikwerenh-rnem-akert tawen Jericho-warl. Apmeran arrer-anem irrew. Iwerr-ampenyel artwa aparrng anenh, rap apwertew ayerneyam-ayntenh.

³⁶Rarl awenh, akngerrarl alpenh anper, rap arlkew-anem, “Ay! Nthakenh irreyel arrantherran?”

³⁷Rernem renh tyernew ilelhemel, “Anantherran alpeyel Jerusalem-warl Jesus Nazareth-areny-angkwarr.”

³⁸Rarl alakenh awew, artwa aparrng rap arlkew, “Jesus-ay! Ngan Atyetyart David-wenh-rnem-they! Amperrngerra atyeng!”

³⁹Arrwekelarl alpenh-rnemel renh iltew, “Akeleyterra!” Ran arlkenh-antey ikwer irrkaty-angkwarr, “Jesus-ay! Ngan Atyetyart David-wenh-rnem-they! Amperrngerra atyeng!”

⁴⁰Jesus rtneyelpew, rarl renh awewel. Rap ilanthew, “Akwethey atnwenheyew renh, akngetyeyew atyeng-warl.” Rernem renh akngetyew Jesus-warl. Ra renh ayernew,

⁴¹“Ilekay? Nthakenh ilem atha ngenh?” Ran tyernew, “Atyetyart, ayengan ilkelheyel, atha areyew.”

⁴²Jesus-an angkew ikwer, “Annga altywerela! Aranem ntwa! Ntwa iterl-arew, atha ngenh mwerreley-angker, ntwap mwerr-anem areyel aleyan.”