Luuka 18:14-42

¹⁴Miiyo kiniwuuzani yoori, namariphisa lumpuru aalawiye owawe ari woohakikhiwa ti Nnyizinku, ila otule woojikhupali wala. Maana otule anjiwulisaaye ontta opushuwisiwa, ila otule anjipushuwisaaye ontta owulisiwa.”

¹⁵Atthu akina khusala awaatiisa asimaana yoori asapiwe ti Yinsa. Ila anakhiyoni awe n'oowoona khusala awaamaruwela.

¹⁶Ila Yinsa khuwaakhuwela asimaana apale araka: “Mwiwaalikhe asimaana akiteele miiyo, mwihiwaakhattaze; maana Ofwalume wa Nnyizinku pu waaya apale eeyiye nkhama asimaana.

¹⁷Miiyo kiniwuuzani khweele yoori wakhula otule ahimpokherelaaye Ofwalume wa Nnyizinku nkhama nsimaana, khanteela weettamo.”

¹⁸Nttunkhulu mmote khumuuzela Yinsa yoori: “Mwanliimu woosaana, kirette niini yoori kipatthe ohaayi wa mileele?”

¹⁹Yinsa khunjipu araka: “Mwaasa wa niini okikhuwelaka yoori woosaana? Khaavo ntthu woosaana woohiiyi Nnyizinku paasi.

²⁰Weeyo onjuwa mirumo za Nnyizinku: ohiraruwe, ohuule, ohiiye, wala ohilawele oshaahiti woovonyeya, onhishimu papaawo na mamaawo.”

²¹Mwinyi otule khujipu yoori: “Waaza osimaana aka zooshi epo kinretta.”

²²Yinsa n'oosiila mattakhuzi apale khumuuza yoori: “Enuusaleela etthu moote. Wuuzanyise vitthu zawo zooshi nzurukhu aya owenkhe asikhini, toowo ontta wiiyana maali pinkuuni; nawiisha ote okilotte.”

²³N'oosiila mattakhuzi apale khwiiya woozinkuwa venkivene, mwaasa yoori ye aari thaajiri nwulweene.

²⁴Yinsa n'oomoona yoori azinkuwa khulupa yoori: “Nanna enlipaazo thaajiri weetta muufwalume wa Nnyizinku!

²⁵Ti yookhweya enkamiiya ovira valiphotto la sikano zayita thaajiri weettamo muufwalume wa Nnyizinku.”

²⁶Apale aari onsiilaaye khumuuzela yoori: “Nkhama pi toowo, paani anwahaaye wuusurukha?”

²⁷Yinsa khujipu yoori: “Etile pinaatamu ahinwahaaye Nnyizinku onwahi.”

²⁸Aphano Pheeturu khumuuza Yinsa yoori: “Woone! Fweeyo nalikha vitthu zetthu zooshi, khusala nuulotta.”

²⁹Yinsa khujipu araka: “Miiyo kiniwuuzani khweele yoori, wakhula otule anlikhaaye nyuupa yawe ama muukhaawe, ama attwiize ama apapaze, ama aanaawe mwaasa wa Ofwalume wa Nnyizinku,

³⁰oto onteela opokhera venkivene vathi attaapha, na omwiisho waya apokhere ohaayi wa mileele.”

³¹Yinsa khuwaakhuwelela othetekele anakhiyoni awe apale khumi na awiri khuwooza yoori: “Mwisiileze! Apha nintta Yeruzaleemu, ottuukho zinttelaawo orettikhana zooshi epile zaatikhiweeyo pi manapiyu monkoni wa Mwaana wa Pinaatamu.

³²Ye onttela winkheleliwa mmakhono wa amalapo, antheye, anveyise, antthemele,

³³anjaphe na amuule. Ila siikhu yattaatthu onttela osisimuwa.”

³⁴Anakhiyoni awe khuhiweeleyi mattakhuzi aya apale maana aari oovitheya, yo khuhijuwi etthu aari olupaaye.

³⁵Yinsa asaleelaka ofiya Yeriko, mwinyi mmote woohooni eekhaliye nshini wa tarikhi alolaka zimola.

³⁶N'oosiila shintto za atthu aari oviraaye, ye khuuzela etthu yaari orettikhanaaye.

³⁷Khuuziwa yoori: “Yinsa wa Nazareeti ti ye anviraaye.”

³⁸Aphano ye khusala akhuwa araka: “Yinsa, Mwaana wa Daawuuda, koonele huruma!”

³⁹Atthu apale aari oviraaye khusala ammaruwela yoori anyamale, ila ye khusala atepa okhuwa araka: “Yinsa, Mwaana wa Daawuuda, koonele huruma!”

⁴⁰Aphano Yinsa khweemela khuruma yoori atiiseliwe mwinyi otule. N'ootiiseliwa khumuuzela yoori:

⁴¹“Ontakha yoori kuurettele niini?” Ye khujipu yoori: “Mbwana, kintakha kirutele woona.”

⁴²Attaaphale Yinsa khumuuza yoori: “Ona! Amini yawo yoovonisa.”