Luka 18:14-42

¹⁴Yesu ngalenga, “Nannenge kweli ntocha kodi abuja kachakwe kongo abonekana jwambone nnongi ja Nnoongo. Nambu Mfalisayo joje. Magambu kila ojwa kitondobe aba kuuluigwa na kila ojwa kiuluya aba kutondobaigwa.”

¹⁵Bandu bange ngabampelekela Yesu ingota ilumikigwe. Akinapunji apabalola genia ngabakanakia,

¹⁶nambu Yesu ngaikema ingota nu kulenga, “Mileke ingota iike kwango mikikanakiaje, magambu Kingwana cha Nnoongo kibekigwe kwa bandu anda benia.

¹⁷Nkombakela yene! Mundu jwajwoa nukukipokelaje Kingwana cha Nnoongo anda mwana, ajingije mu Kingwana chenie.”

¹⁸Kilongoi jumwe ngankonya Yesu, “Aboli mambone ndendabole, mbate bwomi gwa machoba goa pangapela?”

¹⁹Yesu ngankonya, “Kwanike kungema ne nambone? Abije jwambone nambu Nnoongo jika jakwe.

²⁰Magamanyi Malagilo ga Musa, ‘Makabe na ngongolaje, makakomaje na makajibaje na makapanga uchaili gu uwangije kajali awawa binu na amama binu.’ ”

²¹Jwenio ngalenga, “Genia goa nagaagabile tango apanakiba nakakombo.”

²²Kingobu Yesu apajoa genia, ngannenge mundu jwenio, “Kiigi kilebe chimwe chikipaligwa kamula. Makauche ilebe yoa einkweti uloi gwene mapegange akahocho na mama manuloi kumbengu, penia nhwike ungengame.”

²³Nambu mundu jwenio pajoa genia, ngachimwa muno magambu akiba nuloi muno.

²⁴Yesu apalola akachimwa yenie, ngalenga, “Ibibole apibi kujundupa kwa bina uloi kujingila mukingwana cha Nnoongo.

²⁵Elo, nga kindema muno ngamia kupeta pililanga lya chingana, kumpeta juna uloi kujingi mukingwana cha Nnoongo.”

²⁶Bandu ba apabajoanga genia, ngabalenga, “Nga meneke ojwapakuoto ukomboka?”

²⁷Yesu ngajanga, “Gangawechekana kwa mundu, ku Nnoongo kuwechakana.”

²⁸Petulo ngankonya, “Na twe bole? Tuilekite ilebe ito yoa tunkengime!”

²⁹Yesu ngabalengela, “Kweli nannenge, mundu jwajoa ojwalekite nyumba andaje munkege andaje akakamundu andaje achikibelei bakwe andaje ingota kwa magambu ga Kingwana cha Nnoongo,

³⁰apakupokela ndu muno ngoe, na bwomi gwa machoba goa pangapela mangobu agapakuika.”

³¹Yesu ngabatolanga komi na abele umbwega, ngabalenge, “Mpenakiange! Tujenda Kuyelusalemu na kwenio kila kilebe echikiandikigwe na akalondoli ba Nnoongo nhwalo gwa Mwana jwa Mundu makilenganila.

³²Bapankamuya kwa bandu banga Akayahudi angweto mabantendela gangambone na kunhuni mata.

³³Mabamputanga iboko na kunkoma, nambu lichoba lya tatu mayoka.”

³⁴Nambu angweto bamanyangitije nhwalo gwenio ata kichoko, bakate kuiigwa mana ga malobe genia, na bamanyangitije agagalongaligwe.

³⁵Mangobu Yesu apabandakila ku Yeliko, pakiba na mundu jumwe jwangalola atamite papipi akajopa.

³⁶Apajoa nkengeni gwa bandu gwakapeta ngakonya, “Kubi nike?”

³⁷Ngannengela, “Yesu juku Nazaleti atendakupeta.”

³⁸Jwombe ngatondobea lilobe ngalenga, “Yesu, Mwana jwa Daudi, umone kia!”

³⁹Bandu abakiba nnongi ngabankalapila ngabannenge akotoke, nambu jwombe ngayangala kuchobela, “Mwana jwa Daudi, umone kia!”

⁴⁰Yesu ngajema, ngaamulicha bannete nnongi jakwe. Jwangalola jola apaika papipi, Yesu ngankonya,

⁴¹“Mpala nantende nike?” Jwombe ngajanga, “Angwana, nyopa nhoto kulola.”

⁴²Yesu ngannengela, “Nname! Imani jinu jinnamie.”