Luka 17:11-25

¹¹Jesu e Jerusalem haeo raocte Galilaia mâreŋ fotâcnerâ Samaria mâreŋ qaŋeŋnao fisiwec.

¹²Fisirâ hae mocko fehame ŋic wicsanaŋ‐jeŋichec 10 jaŋe honerâ taic domahuc

¹³wira wâwâsic ecnehuc mumbiŋ: “O Qaqazu Jesu, go nâŋere mac buge sâqoreoc.”

¹⁴Eme honec‐joparâ ʒiŋuc jazawe: “Ŋoŋe rarâ sahac‐ŋeŋic taha bapa jowatunʒepieŋ.” Mume jaŋe raha rahapie sahac‐jeŋic fâsâewec.

¹⁵Eme jaŋeraonec mocsâkoazi sahacne fâsâeme honerâ risiewec. Risierâ hahaŋne bahuc Anutu muteŋkehuc

¹⁶Jesure kikefuŋko fodaperâ daŋge âzâcnewec. Eme ŋic e Samaria mâreŋkonec.

¹⁷Eme Jesuzi ʒiŋuc muwec: “Ŋic 10 fâsâembieŋ, gâcne sâko 9 jaŋe weni?

¹⁸Jaŋe risierâ Anutu daŋge âzâcneniŋte mi muhuc mâc qâoma erâ rahapie ŋic qâpuc keczi e mocjahazi warekac me?”

¹⁹Iŋuc murâ ŋic e ʒiŋuc âzâcnewec: “Mamanasiŋgere biaŋkekomec, irec fahare rac.”

²⁰Farisaio jaŋe Jesu wiocnerâ mumbiŋ: “Anuture uucmaŋ wezimucko fua tâcneocmu?” Eme jazawec: “Anuture uucmaŋ tâtâc mi fuaocmu,

²¹irec wemocko honerâ ʒiŋuc muzo: ‘O ʒira fuakac, o ocna fuakac.’ Manaŋgopieŋ, Anuture uucmaŋ i ŋondeŋ‐ŋeŋicko fuawec fokac.”

²²Erâ motecfâcne ʒiŋuc jazawec: “Juku dameŋ moc maickeocmu ira Ŋic Fâri Wâtuŋne e ʒoaŋ mocjaha tâtâcko fuame honeniŋte eŋare‐bipieha sifu mi honeniŋmu.

²³Dameŋ ira kecʒiŋuc ŋazaniŋmu: ‘O ʒira nâŋerao fuakac, o ocna jaŋerao fuakac.’ Mupie mi ranʒepieŋ â manapie jâmbomac mi ezejec.

²⁴Bâbâric e sambâŋ ŋifec bâricneme ŋifec qâninipe‐fâreekac, irec sâc Ŋic Fâri Wâtuŋne ere fifisi fuazokac.

²⁵Qanaŋ ine ŋicguru ʒi jaŋe Ŋic Fâri Wâtuŋne râpeckepie ʒâic gie sâko baocte mucnekicne.