SAN LUCAS 17:11-25

¹¹Msñi Jesús tuwiin ndyaa nde Jerusalén, bra kanꞌ mdijin neꞌ lo yuu ꞌin Galilea, ndyaa neꞌ nde lo yuu ꞌin Samaria.

¹²Mdiya Jesús ska kichen xuwe, bra kanꞌ ndyukwa taꞌa yu loꞌo tii neꞌ tiꞌí nu wa ndijyan seꞌen ndiꞌin yu; kicha nu ngatsuꞌ kunaꞌ msñi ꞌin neꞌ kanꞌ. Ti tijyuꞌ ti nduun neꞌ seꞌen ndiꞌin Jesús,

¹³kwen ꞌa ykwiꞌ neꞌ loꞌo yu bra kanꞌ: ―¡Yu kula Jesús! ―ndukwin neꞌ bra kanꞌ―, ¡chka tꞌnan tiiꞌ ꞌwa!

¹⁴Xa wa naꞌan Jesús ꞌin neꞌ, bra kanꞌ ndukwin yu: ―Tyaa lya wan seꞌen ndiꞌin sti joꞌo chaꞌ ñaꞌan yu tyukwi ñaꞌan wan ―ndukwin Jesús ꞌin neꞌ tiꞌí kanꞌ. Mdoꞌo neꞌ ndyaa neꞌ bra kanꞌ. Seꞌen yaa neꞌ tuwiin, ndii tiꞌ neꞌ chaꞌ ngwa luwi kunaꞌ neꞌ xiyaꞌ; wa mdyii chaꞌ tiꞌí neꞌ bra kanꞌ.

¹⁵Kanꞌ chaꞌ mxitukwi ska yu tiꞌí kanꞌ, kwen ꞌa ykwiꞌ yu chaꞌ yꞌni tnun yu ꞌin Ndiose.

¹⁶Bra kanꞌ mduun xtyinꞌ yu seꞌen ndiꞌin Jesús, yaa sti yu mstya tloo yu lyuu chaꞌ ndya yu xuꞌwe ꞌin Jesús. Loꞌo neꞌ Samaria lka yu kanꞌ, neꞌ xka laꞌa tsuꞌ lka yu.

¹⁷Bra kanꞌ ykwiꞌ Jesús loꞌo yu: ―¿Ta siꞌi tii neꞌ nu ngatsuꞌ kunaꞌ neꞌ nchkaa neꞌ tsan a? ¿La ngwa xa chkaa neꞌ kanꞌ ni a?

¹⁸Ska ti yu re nu siꞌi neꞌ Israel taꞌaan lka yu, kanꞌ lka nu mxitukwi chaꞌ kuꞌni tnun yu ꞌin Ndiose.

¹⁹Bra kanꞌ ykwiꞌ Jesús loꞌo yu kiꞌyu kanꞌ: ―Tyituun lyaa, tyaa ni ―ndukwin―. Wa nchkaa ni, chaꞌ ndyaa ñaꞌan tiiꞌ chaꞌ nu ykwiǐnꞌ loꞌoo.

²⁰Loꞌo bra kanꞌ mnichaꞌ neꞌ fariseo ꞌin Jesús sa ñaꞌan bra nu kan Ndiose chaꞌ ka Ni ndloo la ꞌin nten. Mxkwen Jesús ꞌin neꞌ bra kanꞌ: ―Siꞌi ska nan nu chkanꞌ ndijyan tijyuꞌ lka chaꞌ kanꞌ.

²¹Ja ka chkwianꞌ chaꞌ re: “Nde ti nduun Ni”; ja ka chkwianꞌ: “Nde kwa ndukwa Ni.” Nan wa lka Ndiose ndloo niꞌ kasiya ꞌin nten bra ni.

²²Bra kanꞌ ykwiꞌ Jesús loꞌo neꞌ nu ngiꞌni xaꞌan chaꞌ ꞌin yu: ―Nde loo la tiya bra nu ka ꞌa tiꞌ wan ñaꞌan wan ꞌñaǎn, ni siya xka tsan ti tyiꞌiǐn loꞌo wan lo chalyuu ka tiꞌ wan, naꞌ nu wa msuꞌwa Ndiose ꞌñaǎn ndijyaǎn chaꞌ kaǎn nten; loꞌo ja ka ꞌa ñaꞌan wan ꞌñaǎn bra kanꞌ.

²³Chkwiꞌ neꞌ loꞌo wan chaꞌ ꞌñaǎn bra kanꞌ: “Nde ti nduun yu”; loꞌo chkwiꞌ neꞌ: “Nde kwa nduun yu.” Ja tsaa ñaꞌan tiꞌ wan ꞌin neꞌ kanꞌ, ja xñi wan chaꞌ kwiñi nu nchkwiꞌ neꞌ kanꞌ ―ndukwin Jesús ꞌin neꞌ―.

²⁴Suꞌwa ñaꞌan nchka tiꞌ bra nu ndyuwi tyukwi ñaꞌaan niꞌ kwan, ngwañaꞌan ka ꞌñaǎn bra nu tiya tsan chaꞌ ñaꞌan neꞌ ꞌñaǎn ndyaǎn xiyaꞌ, naꞌ nu wa mdiyaǎn chaꞌ lkaǎn nten.

²⁵Ti kulo ndiꞌin chaꞌ kaꞌan ꞌa nu tiꞌí kaja ꞌñaǎn. Kwiꞌ ngwañaꞌan, neꞌ taꞌa kichen tyiǐn kulaa yaꞌ neꞌ ꞌñaǎn.