San Lucas 17:11-25

¹¹Ca zexíaj Jesús zéaje̱' Jerusalén, gudée̱' lu xe̱zr la xu chee̱ xe̱zre ca' zaj nababa Samaria, ne xe̱zre ca' zaj nababa Galilea.

¹²Gate bzrine̱' tu xé̱zredau', bedajlechaga Le̱' chi benne' zaj de̱'e̱ we̱' guzru', na' belezé̱' zítu'la,

¹³ne gulebezre xe̱'e̱, dxelenné̱': ―Jesús, Benne' Wese̱de, bexache lazre' netu'.

¹⁴Gate ble'e Jesús le̱', na' gunné̱': ―Le chjaca le cheajlué'e cuínale lau bxruze ca'. Dxácate̱ zjaque̱' na', na' belexexaque̱' chee̱ xízrawe̱' chee̱'.

¹⁵Nadxa tu benne' ca', gate guque bé'ene̱' ba bexaque̱', na' bebi'e̱, dxue lá'ane̱' Dios du lazre̱'.

¹⁶Bzu zribe̱' lau Jesús, ne gudíxrujte̱' lawe̱' lu xu, dxe̱'e̱ Le̱': “Xcalenu'.” Benne' nigá naque̱' tu benne' Samaria.

¹⁷Nadxa gunná Jesús: ―¿Quegá chie̱' na' belexexaque̱' lu xízrawe̱' na'? ¿Gazra na' xegué̱'?

¹⁸¿Tuze benne' zitu' nigá belá' güe lá'ane̱' Dios?

¹⁹Nadxa Jesús guzre̱' benne' na' bexaque̱': ―Bexasa, bexíaj. Ba bexacu' lawe' da guxéajle̱'u chia'.

²⁰Benne' fariseo ca' buluche̱be̱' Jesús bátala la' xel-la dxenná bea chee̱ Dios, na' beche̱be Le̱': ―Ca la' xel-la dxenná bea chee̱ Dios quebe naca na da lé'ele.

²¹Quegá nu nna: “Nigá zua na”, u “Na' zua na”, lawe' da ba zua lu'ule le'e xel-la dxenná bea chee̱ Dios.

²²Nadxa guzre̱' benne' ca' dxusé̱dene̱': ―Wazrín zra gate le'e gaca lázrele lé'ele tu zra zua' neda', Benne' Gulje̱' Bénneache, na' quebe lé'ele na.

²³Che xelenná bénneache, xelé̱'e̱ le'e: “Nigá zue̱'”, u: “Na' zue̱'”, quebe chéajle, ne quebe gaule benne' ca'.

²⁴Ca dxeajsúa xesa chalá'a zran xabáa, na' nalá'te̱queze na xechalá'a zran xabáa, ca'an gaca gate xelá' neda', Benne' Gulje̱' Bénneache, lu zra xelá'a neda'.

²⁵Nédxula dxal-la' téle̱'a xel-la zi', na' benne' zaj zre̱'e̱ lu zra na'a zra xuluzúe̱' neda' chalá'ala.