Luuka 17:11-25

¹¹Nde Iisaa yahannoo Urusaliima ndee, ƴaɓɓorii hakkunde leyɗe Samariya e Galili.

¹²O wari faa o naata ngeenndi ngootiri, non seppaaɓe sappo worɓe peewti mo, ndarii to toowti,

¹³eewnii, mbii: —Moobbo Iisaa, yurma min!

¹⁴Nde o yiinoo ɓe ndee, o wii ɓe: —Njehee, kolloyee ko'e mon yottinooɓe sadaka ɓee. E ley yaadu maɓɓe nduu, ɓe cellinaa.

¹⁵Gooto maɓɓe, nde yiinoo sellii ndee, wirfitii ana yetta Laamɗo e daande toownde.

¹⁶O diccii yeeso Iisaa, o yetti ɗum. Oon yo Samariyanke.

¹⁷Iisaa jaɓɓitii, wii: —Tama wanaa sappo ɓee fuu cellinaama? Hoto njeenayon ɓee nee ngoni?

¹⁸Walaa miilɗo wirfitaade yetta Laamɗo so wanaa janano oo naa?

¹⁹Caggal ɗum, o wii gorko oo: —Imma yaa e laawol maa, sabi goonɗinal maa danndii ma.

²⁰Nden Farisa'en ɓee lamndii Iisaa mande Laamu Laamɗo oo warata? O jaabii ɓe, o wii: —No Laamu Laamɗo wardata nii, yiyataake.

²¹Fay gooto waawaa wiide omo nii naa omo naa. Anndee, Laamu Laamɗo ana hakkunde mon.

²²Caggal ɗum, o wii taalibaaɓe makko ɓee: —Wakkati waran mo muuyaton e mum yiide ɲalaaɗe Ɓii Neɗɗo oo, fay so ɲannde wootere, kaa on njiyataa.

²³On mbiyete: «Omo too», naa «Omo gaa», pati njehee, pati njokkee ɓe.

²⁴Sabi no majere fooynirta kammu fuu nii, hono non Ɓii Neɗɗo laatortoo ɲannde gartol mum.

²⁵Kaa ko adii ɗum, ana tilsi o torree torraaji keewɗi, yimɓe oo ɗoo jamaanu tippitoo mo.