SAN LUCAS 17:11-25

¹¹Are Jesús joinchehe sigue viajé para Jerusalén, jehe vatto ngain regioen Samaria co Galilea.

¹²Are joiji na chiaon ngain ná rajna, ngandehe rajna mé te tte xí que teninxin chin lepra co joichoenxin xa Jesús ngatja nttiha pero ẍa icjin de jehe tavinttengattjen xa

¹³co vinttendac̈ho xa sén: ―¡Jesús, Maestro, ttiaconoana ni ra janha na!

¹⁴Are Jesús vicon cain xí mé jehe ndac̈ho ngain xa: ―Sattji ra co dicjagohe ra xidána que iẍonhi chin chonda ra. Co are satettji xí mé, chinhi xa ndavitján chin.

¹⁵Cottimeja ná de jehe xa are vicon xa que iẍonhi chin jichonda xa, sacjan xa co coyao xa co joinchecoanxinhi xa Dios.

¹⁶Co vettoxin nttajochjihi xa ngain Jesús, co visé xa hasta tti ngataha nontte, para que joanjo xa gracias ngain Jesús. Co xí mé Samaria nonttehe xa.

¹⁷Cottimeja ndac̈ho Jesús: ―¿Apoco jeha tte xí que xingamehe xa de ixin chinhi xa? ¿Quettinó te tti icha xí?

¹⁸¿Ajeho xí jihi que joixin iná nontte tti cjan para joinchecoanxinhi Dios?

¹⁹Cottimeja ndac̈ho Jesús ngain xí mé: ―Dingattjen co sattji; jaha ondaxingamaha ixin vitticaonna.

²⁰Cain xifariseo joanchiangui xa ngain Jesús ixin quesa tsí tti ttetonha Dios, co Jesús ndac̈ho ngain xa: ―Are tsí tti ttetonha Dios, mé jeha cosa que nchao sicon ni.

²¹c̈hoha rrondac̈ho ni: “Nttihi jí”, o “Nojiha jí”, ixin tti ttetonha Dios ojí ngayaha ra.

²²Cottimeja ndac̈ho ngain tti chojni que vacao: ―Tsí tiempo are jaha ra sinao ra que janha, tti Xí que joixin de ngajni, sarihi nganji ra masqui nacoa nchanho, pero janha ic̈hoha sarihi nganji ra.

²³Co masqui rrondattjo ra chojni que nttihi rrihi janha o nojiha rrihi, pero jaha ra ditticaonha ra tti jehe na rrondac̈ho na, ni ttjiha ra tti jehe na rrondac̈ho na.

²⁴Ixin jañá inchin dicon ni ẍoí rayo de ná lado hasta iná lado de ngajni, jamé tsonhe ngain mero nchanho que janha, tti Xí que joixin de ngajni, sihi iná.

²⁵Pero saho chonda que anto tangui tsonna co chojni de ngain tiempo jihi rrondac̈ho na ixin janha ẍonhi rentte na.