Luke 17:11-25

¹¹Mara kesana, Iesu i tauya ku Jerusalem wai, Samaria ba Galilee biyisi asi bi paraparatai wata i nenae.

¹²Ba ku meyaga kesana iriuriu wai sebasebare asi ten, ereronowasi kasi gubaga leprosy, si verabeyei. Ba rabarabai si msiri.

¹³Ba si parara si wona “Bada Iesu ki nuwanuwanikai!”

¹⁴Iesu i kinanisi wai i wona, “Ko nae priest kurisi sina bo kinakinanimi.” Ba si nenae wai keta dobonai si yawasa.

¹⁵Ba kamosi yai sebare kesana, maranai i kinani kata i yawasa wai, i veramaga gamona kaikaponai God i bokabakabari.

¹⁶Ba Iesu kaenai ku tano i peku ba i kaikaivi. Ba kona sebarena wai, Sameria biyina.

¹⁷Iesu i toiruba i wona, “Pipiya asi ten si yawasa ba asi nine memena?

¹⁸Awaika kairavina niko pipiya tumana i kesina i veramaga God ebi kaikaivi.

¹⁹Ba Iesu kurina i wona, “Ke bomsiri ba ke nae, am bi geruwana i yawasim.”

²⁰Mara kesana Pharisee biyisi Iesu si toirubai, kata meyana God ana Basileiya ita botu. Iesu i kaobeya i wona, “God ana Basileiya ina botu wai, kega aba kina kinanina.

²¹Kona pipiya sina wona, nina karaku! kona noi karaku! basuna God ana Basileiya wai komi kamomi yai.”

²²Ba ana Nonorayauna kurisi i wona, “Mara e botubotu kona maranai ami waina kata Sebare Natuna kota kinani, saba kega kona kinani.

²³Pipiya kurimi sina wona, sebarena noi! kona sina wona sebarena nina! kega kona vera kibikibisi.

²⁴Kairavina, Sebare Natuna ana botuna marana wai bage guba ebo kadari rutainina. Ebo kadari wai sapama erau yasegana e nenae ku sepina.

²⁵Saba kainaona niko kimta sini sinikikiyei, ba sini nomosa kaikapona ina yauni.