Luk 17:11-25

¹¹Asa Yesu khe howeyate Yerusalem oro Samaria mira koya Galili mira keweroyariwore uyaró.

¹²Uyaro yendé kano mahiní kowí piyimi khumo uni kande irisa ŋunde mahero kheko qeneŋgurí. Qenero tíko kaŋero

¹³kondé ŋande neke kiwaŋgurí, “Yesu, awa, ke noreŋo sikínani te yuno.”

¹⁴Ŋunde yiqo, yiyoro ŋande yimiraró, “Ye uyareya koweye se o qa-qa uni witú yiri.” Ŋunde yiní iŋoro uyareŋgurí muno ŋuno naŋge koweye muko sara tunoqaró.

¹⁵Asa keweroyemo kanata kato kowí qeniní meté tiní, rohoréŋo uyaro ki parámi tero Anutu owí hokaró.

¹⁶Mahero Yesu khímo umbu raŋoro yuŋgunaŋaró. Uni ŋuko Samaria koro wini qu ka.

¹⁷Yesuko uni ŋu qenero yaró, “No iŋoteno, uni kande irisa ŋunde sara teteŋgo. Quko uni kande saŋiyoro nimí kini qu, ŋu dano yoteŋgo?

¹⁸Yuto uni ŋando naŋge meté mahero Anutu koro owí hokoweya, peka?”

¹⁹Yero ŋande miraró, “Ke otoqo uyare. Keŋo iŋondutukepo koriní meté tete ŋu.”

²⁰Asa naru kano Farisi unindo do naruko Anutuko unipareyó wiri yereyote naruyó ŋu maheweya ŋuro Yesu oseseyaŋgurí. Ŋunde yi mande topé yaró, “Ko yendo kondé toŋetero Anutuko unipareyó wiri yereyote naruyó ŋu qenewero mepémo kini.

²¹Unipareto ŋande kama yewaŋgo, ‘Ŋano yote,’ ma, ‘Anduno na.’ Dokoro Anutuko unipareyó wiri yereyote naruyó ŋuko ye quroko yote.”

²²Ŋunde yero iŋo-iŋo rewero uniyó ŋande yimiraró, “Imemoŋgo ye Unindoro Naŋuní ŋuro naru kanata qu qenewero kondé ye iŋowaŋgo, quko qenewero mepémo kini.

²³Ko uni kato yimirowaŋgo, ‘Ŋuno yote,’ ma ŋande yimirowaŋgo, ‘Ŋano na.’ Quko kheŋgeŋo ŋuno ma uyarewero.

²⁴Dokoro Unindoro Naŋuní ŋuro naruyó ŋuko rowá ŋunde qembe tunoqeweya. Rowá ŋundoko kasina-kasina mahero koporé soso hiyóqeyote.

²⁵Quko koretero enendo kowe surumí qambu korowoní unipare itaka yoroteŋgo ŋundo huwóŋowaŋgo.