Luuka 17:11-25

¹¹Yinsa eettaka Yeruzaleemu, aaviriye enakatthi-nakatthi ya Samariiya na Kalileya.

¹²N'oofiya nti aya opo, khuta anamakuttula khumi khweemela peetiwene

¹³khusala ankhuwela araka: “Yinsa, Mwanliimu, noonele huruma!”

¹⁴Ye n'oowoona khuwooza yoori: “Mwilawe mwajithoonyeze wa mahaakhimu a tiini.” Eettaka olawa etthiipile, yo khwiiya oovona.

¹⁵Mmote wa apale khumi, nawoona yoori avona, khuruti ansifwaka Nnyizinku na huula yoonyakula.

¹⁶Khukokhora khufiyisa ajihi yawe vathi, khunshukhurwela Yinsa; ye aari nsamariiya.

¹⁷Yinsa khumuuzela yoori: “Khahi atthu khumi avoniyeeyo? Khi apa akina tiisiya ari vayi?

¹⁸Khaavo awahiyeeyo oruti oteela onshukhurwela Nnyizinku, woohiiyi otu wa malaponi?”

¹⁹Yinsa khumuuza yoori: “Olankhe olawe amini yawo yawuusuru.”

²⁰Yinsa eetta wuuzeliwa pi a mafwarizeewu wakathi waari weettelaavo ota Ofwalume wa Nnyizinku. Ye khujipu araka: “Ofwalume wa Nnyizinku otaaka khunttela wiiya etthu enooneyaaye.

²¹Khina anttelaaye olupa yoori: ‘Moone, opu ori apha!’ ama ‘Opule oriiye okhule!’ Maana ofwalume wa Nnyizinku ori vakatthi venu.”

²²Attaaphale khuwooza anakhiyoni awe yoori: “Onteela ofiya wakathi mwinttelaaye otakha wiiyana vamote nenkawu siikhu moote Mwaana wa Pinaatamu, ila ehisala ewaheya.

²³Akinoko anlawa alupe yoori: ‘Ori okhule!’ ama ‘Ori apha!’ ila mwihilankhe olawa omweekesa.

²⁴Nkhama etthiipo taari enzerimaaye phantte moote yeettaka phantte kiina, enteela wiiya etthiipo siikhu anttelaaye ota Mwaana wa Pinaatamu.

²⁵Ila mwanzo ye ona yoohoowa venkivene na okatthaliwa pi atthu a leelo.