Rookashi 17:11-25

¹¹Ikanta rowaaganaa Jesoshi, ikinayitanakini okaakini oweyaantawonta Jamaaryaki eejatzi Karireeyaki. Roshiretakawo rareetya Jerojareeki.

¹²Roojatzi rareetapaaka paashiniki nampitsi, iñeeyawakirini patheenkaripaeni, ikaateeyini 10. Ikatziyeeyakani eekitziroeni jaga.

¹³Ikaemakoeyawakirini: —Jesoshi, eeroka nopinkathateeyirini, petakoeyenani, petsiyatakoeyenani.

¹⁴Iñaantakariri riraga Jesoshi, ikanteeyakirini: —Piyaateeyeni janta ijeekinta ñaanakowenantatsiri, poñaagapaeyaari. Ari ikemijantaperoeyakirini, riyaateeyanakini. Janta niyanki awotsi ari retsiyatakoeyaneeni.

¹⁵Iñeeyantawaani etsiyatakoeyaneeni, ipiyanaa apaani janta Jesoshiki. Icheraaperotaki, ikantzi: —Tema ikameethataki Tajorentsi, retsiyatakotakina.

¹⁶Rotziwerowashitapaakari Jesoshi, roeyotashitaperotakari, ipinkathataperotakiri, ipaasonkitaperotapaakiri. ¡Ipoñaa irika shirampari Jamaaryaki!

¹⁷Roojatzi ikantakiri Jesoshi: —Tema ikaateeyini netsiyatakoeyakirini 10. ¿Tsikama paashinipaeni?

¹⁸Apatziro irika paashinijatzitatsiri atziri ipiyashitapanaatana, ipaasonkitakina, eejatzi iñaaperotakiri Tajorentsi. Riroma asheninkaperopaeni naawita, tee ipiyapanaataa ipaasonkitantyaariri rirori.

¹⁹Roojatzi ikantziri otziwerowashitakariri: —Iroñaaka pikatziyee, okameethatzi piyaatee. Pameentakari Tajorentsi, rootaki pawijakotantaari.

²⁰Riraga warijeeyopaeni rojampiteeyakirini Jesoshi, ikantziri: —¿Tsika okaate ipoke Tajorentsi ipinkathariwenteeyanteerini? Rakanakiri: —Aririka ipinkathariwenante Tajorentsi, omaanta eero piñaaperotziri.

²¹Eero pimatziro pikante: “Eeniro jaka”, eejatzi: “Eeniro janta”. Kyaaryo, eero ikoñaataperotzi: okameethataki pipinkathashireeyerini maawaeni.

²²Eejatzi ikanteeyakirini riyotaanewopaeni: —Tema naaka poñaachari jenokinta, nokoñaatapaaki jaka kipatsikika, omaanta eero nokantatyeeyaani kijokiro nowaeyeemini. Iinja pikowaeyawitaneeyaani piñagaenami eejatzi, omaanta eero piñagaana.

²³Eejatzi aririka ikanteetemi: “Piyapaa Jesoshi, ari ijeekapaaki janta”. Paashini ikanteetemi: “Ari ijeekapaaki jaga”. Omaanta kaarina naaka. Eero patsipetashitawo piyaatashitana.

²⁴Aririka omonkaataperotapaakya nopokanteeyari, ari piyotaperotawaena. Okimitaaganki aririka aamorenkiranki maawaeni jenoki morek, morek, eejatzi nokimitapaeya naari aririka nopiyee eero nomanapaa, eero pikompitawaana.

²⁵Omaanta nityaawo nokemaatsitayityaawoni osheki katsiri, eejatzi itheenkaeyenani atziripaeni.