Ducasën Dada uaid 17:11-25

¹¹Adashic, Edusaden yacno nidequi nidaid Cadidia caid ënëdacno nidaid Samadia caid yacno datambëtsenec

¹²shubu daëdpactsëc yacno Esus chopanëdash. Ambo choshobien daushumbocquidon 10tedishun Esus bëquedtuidpanëdash.

¹³Adquido yec uano tabadquin: —Ëbitedi bëdamboen tantiaquin nadatiambocquin naban, icbo —cabededpanëdash comapenen cuënquin.

¹⁴Adsho tantiashun Esusën: —Isadaidbo tsusiobo yacno nidshun ismetanta —capanëdash. Adoac nidanequi abitedi bëdambudnepanëdash.

¹⁵Adoac bëdamboed abentsëc dëbidiadanec Nuquin Papan naid chiec onquec choaic

¹⁶Esusën taëno tsadbudash: —Mimbi bëdameboc bëdambo iquebi —quepanëdash Esus caic. Aidi Samadia yacnocquid isadaidpembo nepanëdash.

¹⁷Adoaquien: —¿Diestedidambi bëdamepo? —quepanëdash Esus dëbidiadanec choboed caic.

¹⁸Aden chiashic iccuededquidtedi caic: —Nëidi isadaidpembo yequi dëbidiadanec choash Nuquin Papan naid chiec onquenubi ambi chiacpadomboen bëdameboed utsibo isadaidbo icquimbi Nuquin Papan naid chienquio icpec —quepanëdash Esus.

¹⁹Aden chuishumbic: —Mimbi tantiacpadequi mibi bëdanoque. Nidtoanec nid —capanëdash Esusën daushumbo icboedi chuiquin.

²⁰Adshumbic: —¿Chuiquid dapa abentsëcbëd bëdamboec tabadte ushë choaid mitsipadënquio nuqui ispeque? Tantianu. Ëbi chui —capanëdash padiseyobon Esus chuiquin. Adoaquien: —Chuiquid dapabëd bëdamboec tabadte ushë chote ismete nibëdendac.

²¹Adecbidi, nëmbobi chuiquid dapa abentsëc choeque. Is, quetiapimbo matses icpec. Adecbidi, Umbo choeque. Is, quetiapimbo matses icoaic. Chuiquid dapa abentsëcbëd tabadte nëmbobi iquec caimbi —quepanëdash Esus padiseyobo abi chuimeboedo caic.

²²Aden padiseyobo chuishumbic abëd icquido Esusën nadopanëdash: —Yuecash natiamiantequid icnuc abuc Esusbëd tabadte ushë chopashun, quec ëbi iste mibi bunquimbi ëbi isenquio mimbi iquendac.

²³Adec ëbi iste bunubien: “Bëdamboec tabadte chuiquid ambo choshe. Istan,” cac abëdi nidenda. Adembidi: “Nëmbobi choshe. Isnu. Cho,” cac istanenda.

²⁴Nuquin Papa yacno bëdamboec tabadte ushë chonoc abu bedquetaniacbimboec uëshëmbo chënquec ëbi chosho abitedishun isbededendac.

²⁵Aid ushë choabicnuc ëbi natiametequid iquendac. Adembidi, chuiquid dapa nec cainquiocquin ëbi isadaidbon chieshëmbededec —quepanëdash Esus.