San Lucas 17:11-25

¹¹Jare Jesús ooñoi Jerusalén cotɨ. Jayave oo uvãe Samaria jare Galilea ipãu pe.

¹²Jare oo penti tenta guasu-raɨ pe uvãe, jare joco pe yugüeru Jesús cotɨ diez cuimbae ipire ocui vae reta. Ẽrei jae reta upɨta mbɨrɨ catu Jesús güi.

¹³Jayave jae reta iñeeãta reve jei Jesús pe: —Jesús, oporomboe vae, oreparareco.

¹⁴Jare Jesús uecha reta yave, jei chupe reta: —Pecua sacerdote reta pe, jae reta umae vaerã peré —jei. Jare yugüɨraa rambueve, aramoiño ocui'ã ma ipire.

¹⁵Jare penti cuimbae ou ye ĩru cuimbae reta ipɨte güi jare iñeeãta reve jei: —Tumpa tuyembɨadoraca. Echa'ã uicuaa ucuera ma co imbaerasɨ güi.

¹⁶Jayave uyeatɨca Jesús jovai jare umee yasurupai chupe. Jae co Samaria pegua.

¹⁷Jayave Jesús jei: —Ambɨgüera diez cuimbae reta. Ẽrei nueve yugüeru'ã ye —jei—.

¹⁸Cua pentiño ou ye umbɨadora vaerã Tumpa. Jare cua judio'ã co —jei.

¹⁹Jayave jei cuimbae pe: —Epũa iyemboɨ jare ecua nerenta pe. Ndecuera ma, nderovia cheré ramo —jei.

²⁰Jare fariseo reta upɨrandu Jesús pe quirãi yave ra uyecuaata Tumpa iporoyocuia. Jayave Jesús jei chupe reta: —Tumpa iporoyocuia ndarau uyecuaa pe reta pesareco jese vae rupi —jei—.

²¹Jae ramiño vi ndarau quía jei: ‘Mase, co oĩ’, ani: ‘Mase, pee oĩ.’ Echa'ã Tumpa iporoyocuia ime ma pepɨte pe oĩ —jei.

²²Jayave Jesús jei jemimboe reta pe: —Outa ara reta pipota vaerã tẽi cherecha - che cuimbaerã ayeyapo vae - penti ara yepe, ẽrei ndarau cherecha —jei—.

²³Jayave ĩru vae reta jeita peve: ‘Mase, co oĩ’, ani: ‘Mase, pee oĩ.’ Ẽrei agüɨye pecua jae reta ndive —jei—.

²⁴Tamɨjaanga ama uvera vae. Ama uvera vae uyecuaa opaete ara re. Jae ramiño vi che cuimbaerã ayeyapo vae ayecuaata opaete vae pe ayu ye yave —jei—.

²⁵Ẽrei aiporara eteta rani jare añave yugüɨreco vae reta ndarau uipota aico vaerã juvicha guasurã —jei—.