San Lucas 17:11-25

¹¹Jare Jesús ojoñoi Jerusalén cotɨ. Jayave ojo ovae Samaria jare Galilea ipau pe.

¹²Jare ojo metei tenta pe ovae, jare joco pe yogüeru Jesús cotɨ diez cuimbae ipire ocúi vae reta. Erei jae reta opɨta mombɨrɨ Jesús güi.

¹³Jayave jae reta iñeeata reve jei Jesús pe: —Jesús, oporomboe vae, oreparareco.

¹⁴Jare Jesús oecha reta yave, jei chupe reta: —Pecua sacerdote reta pɨri, jae reta omae vaera peré —jei. Jare yogüɨraja rambueve, güɨramoiño mbaeti ma ocúi ipire.

¹⁵Jare metei cuimbae ou ye iru cuimbae reta ipɨte güi jare iñeeata reve jei: —Tumpa toñemboeteuca. Echa oicuaa ocuera ma co imbaerasɨ güi.

¹⁶Jayave oyeatɨca Jesús jóvai jare omee yasoropai chupe. Jae co Samaria pegua.

¹⁷Jayave Jesús jei: —Ambogüera diez cuimbae reta. Erei nueve mbaeti yogüeru ye —jei—.

¹⁸Cuae meteiño ou ye omboete vaera Tumpa. Jare cuae mbaeti co judío —jei.

¹⁹Jayave jei cuimbae pe: —Epúa eñemboɨ jare ecua nerenta pe. Recuera ma, rerovia cheré rambue —jei.

²⁰Jare fariseo reta oparandu Jesús pe quirai yave ra oyecuaata Tumpa iporoocuaia. Jayave Jesús jei chupe reta: —Tumpa iporoocuaia ngaraa oyecuaa pe reta pesareco jese vae rupi —jei—.

²¹Jae ramiño vi ngaraa quia jei: Mase, co oi, ani: Mase, pee oi. Echa Tumpa iporoocuaia pepɨte pe oi —jei.

²²Jayave Jesús jei jemimboe reta pe: —Outa ara reta peipota vaera tei cherecha - che cuimbaera ayeapo vae - metei ara yepe, erei ngaraa cherecha —jei—.

²³Jayave iru vae reta jeita peve: Mase, co oi, ani: Mase, pee oi. Erei agüɨye pecua jae reta ndive —jei—.

²⁴Tamojaanga amavera. Amavera oyecuaa opaete ara re. Jae ramiño vi che cuimbaera ayeapo vae ayecuaata opaete vae pe ayu ye yave —jei—.

²⁵Erei aiporara yaeta rani jare añave yogüɨreco vae reta ngaraa oipota ayeapo vaera juvicha guasura —jei—.