Luke 17:11-25

¹¹Iesu au Jerusalem igeg ato On inai tafanam ruam Samaria a Galilee asi sanaf on basunai nan igat.

¹²On inai mafamai nan irur ato sabu auyotoat usis gawu gawudis on sinat sinefotai. Osi nanenei nan sitawar,

¹³ato siyoku siyau, “Iesu! Bada ekaberei!”

¹⁴Iesu osi ites ato auris iyau, “Omi wonai priest auris ato osi sininateteim.” Osi si’nan eta nenenai on engon siyawasis.

¹⁵Osi sabu amosi orot kaitamom on toun inateteai on iyawas, ato on imatabir men fonan gagaminai God ifain.

¹⁶On Iesu nanai ifeu sindan irou ato ikakaiwai. On orot on Samaria emon inat.

¹⁷Iesu ikakafun iyau, “Sabu on auyotoat nanaba siyawas; ato sabu nimtereban baibatin on menan nan i?

¹⁸Aibo mes orot touman on ekesin mom inat God inikakaiwai mes i?”

¹⁹Ato Iesu on orot aurin iyau, “Om emisir enai; am baitutum emon uyawas.”

²⁰Pharisee yangan fani Iesu sitetemai on meyan arimon God an Baiaiwab innat. On an baiyafot on iyau, “God an Baiaiwab on men eta taniai nan innat unitai on.

²¹Ato men iyafan tani arimon inau, ‘Eite, atonio’ o ‘Ato nan!’ yabin God an Baiaiwab on omi amomui yen.”

²²Namon On baigibubunuotis auris iyau, “Wera innat arimon ra tani wongogoi Orot Natun wonitai baise arimon men wonitai on.

²³Ato osi sabu arimon sinawurem, ‘Eite, ato nan!’ o ‘Eite, atonio nin!’ Baise omi men wongat wonnuen mes.

²⁴Orot Natun innanat men an ratafin on arimon nanamar ba inboai kasakasauai inbokiai ato tafanam engon intagawai.

²⁵Baise On ainau on arimon inikokosarai bag a ari ra on sabu arimon sinisisiweiai.