Luk 17:11-25

¹¹Ra o Iesu i wan nanan usapat o Jerusalem, i wan epotor tan aru papor Samaria ma o Galili.

¹²I ruk una matansako ina tamon, ma det etorom nama noino musano ra det misait nama lepra. Det tur bakbak taru ut,

¹³ma det kakabo dekdek lena, “Iesu, a Labino, un maris met.”

¹⁴Ra o Iesu i tama det, i watungi tandet lena, “Mot in nan, ma mot in ese tar mot torom a kum tene etabor torom o God.” Ra det wan nanan, det langolango mut.

¹⁵Ara tagun det i tama i lena i sa langolango, i milet melet, ma i watung ulabo pas o God namin labino walngano.

¹⁶Ma i kis but keke nisan aru kikin o Iesu ra i watung wakak toromi. A musano ra, a te Samaria.

¹⁷O Iesu i tingi lena, “Pepetlai, ka di ulangolango pas a noino rop? A lisu kai awai det mo?

¹⁸Ilai ra katutaio i milet melet sur in watung ulabo pas o God? Ikut a usirolik ri.”

¹⁹Ra i watungi tano, “Un katutur, ma un nan. Anum a nurnur i sa ulangolango pas ui.”

²⁰A ramano kum Parisi det ting o Iesu lena, “Nangisin a matanitu anun o God in nanpat?” Ra i balu det lena, “A matanitu anun o God ken nanpat nama kum ukinalong ra din tama i.

²¹Ma ka din watungi lena, ‘Iri mi!’ o, ‘I mo ra i!’ Uni a matanitu anun o God kura ut un mot.”

²²O Iesu i watungi tan anun a kum nat na ususer lena, “A du bung in nanpat ra mot in nemi sur mot in tama tar a bung tagun a kum bung anun a Nutun a Musano, ikut ka mot in tama i.

²³Lako taro det in watungi tamot lena, ‘Tama i, i mo ra i!’ o, ‘Kuri i nin!’ Gong mot mur tar det.

²⁴Uni una bung ra a Nutun a Musano in nan pat, a taro rop det in tama i. In elar namin nememe, ra i meme i tagitong un ara papor maino, tuk un ara papor kai.

²⁵Ikut a Nutun a Musano in taramo mugu a susut na ngunungut, ma a taro tagun uniri det in rosumur gusuni.